|
'ഗ്രില്' ചെയ്ത 'റെഡ് മീറ്റ്'ഉം 'പ്രോസസ്ഡ് മീറ്റ്'ഉം പതിവായി കഴിക്കുന്നത് ഹൃദയ സംബന്ധമായ രോഗങ്ങള്ക്ക് ഇടയാക്കുമെന്നാണ് അടുത്തിടെ പുറത്തുവന്ന പുതിയൊരു പഠന റിപ്പോര്ട്ട് ചൂണ്ടിക്കാട്ടുന്നത്. 'യൂണിവേഴ്സിറ്റി ഓഫ് സൗത്ത് ഓസ്ട്രേലിയ'യില് നിന്നുള്ള ഗവേഷകരാണ് ഈ പഠനത്തിന് പിന്നില്.
വലിയ തീയില് നേരിട്ട് കാണിച്ച് 'റെഡ് മീറ്റ്' പാകപ്പെടുത്തുമ്പോള് ഇതില് 'എജിഇ' എന്ന് വിളിക്കപ്പെടുന്ന ഒരു പദാര്ത്ഥം ഉത്പാദിപ്പിക്കപ്പെടുമത്രേ. ഇത് ശരീരത്തിനകത്ത് പുറന്തള്ളപ്പെടാതെ കിടക്കുമെന്നും പിന്നീട് കോശങ്ങളുടെ സാധാരണഗതിയിലുള്ള ധര്മ്മങ്ങളേയും പ്രവര്ത്തനങ്ങളേയും മോശമായി ബാധിക്കുമെന്നും പഠനം വിശദീകരിക്കുന്നു. ഈ സാഹചര്യം ക്രമേണ ബാധിക്കുന്നത് ഹൃദയത്തെയാണെന്നും പഠനം ഓര്മ്മിപ്പിക്കുന്നു. |
