|
ജാതി സര്‍ട്ടിഫിക്കറ്റ് നല്‍കുമ്പോള്‍ മറ്റ് പിന്നോക്ക വിഭാഗത്തിലെ (ഒബിസി) കുടുംബങ്ങളുടെ കാര്‍ഷിക വരുമാനവും വേതനവും കണക്കിലെടുക്കരുതെന്ന് ആവശ്യപ്പെട്ട് തമിഴ്നാട്ടിലെ എല്ലാ ജില്ലാ കളക്ടര്‍മാര്‍ക്കും ഡിഎംകെ സര്‍ക്കാര്‍ ഉത്തരവ് പുറപ്പെടുവിച്ചു. ഒബിസി വിഭാഗത്തിന്റെ 'ക്രീമി ലെയര്‍' നിര്‍ണ്ണയിക്കാന്‍ 'കുടുംബ വരുമാനത്തിന്റെ' ഭാഗമായി കാര്‍ഷിക വരുമാനവും ശമ്പളവും ഉള്‍പ്പെടുത്താനുള്ള കേന്ദ്ര സര്‍ക്കാരിന്റെ തീരുമാനത്തോടുള്ള തമിഴ്നാട് സര്‍ക്കാരിന്റെ കടുത്ത എതിര്‍പ്പാണ് ഉത്തരവില്‍ പ്രകടമാകുന്നത്.
കേന്ദ്രസര്‍ക്കാര്‍ പ്രഖ്യാപിച്ച പ്രകാരം ഒബിസി വിഭാഗങ്ങളുടെ പട്ടിക തമിഴ്നാട് സര്‍ക്കാര്‍ പുറത്തുവിട്ടതായി പുതിയ ഉത്തരവില്‍ പറയുന്നു. ഒബിസി ജനറല്‍ ക്വാട്ട സംവരണത്തില്‍ നിന്ന് 'ക്രീമി ലെയറിന്' (സാമൂഹികമായി മുന്നേറിയ) ആളുകളെ ഒഴിവാക്കാന്‍ കേന്ദ്ര സര്‍ക്കാര്‍ മാര്‍ഗ്ഗനിര്‍ദ്ദേശങ്ങള്‍ പുറപ്പെടുവിച്ചിട്ടുണ്ടെന്നും ഉത്തരവില്‍ ചൂണ്ടിക്കാട്ടി. എന്നാല്‍, 'ക്രീമി ലെയര്‍' വിദ്യാര്‍ത്ഥികളെ വേര്‍തിരിക്കുന്നതിനായി മാതാപിതാക്കളുടെ വരുമാനം കണക്കാക്കുമ്പോള്‍, പ്രതിമാസ ശമ്പളവും കൃഷിയിലൂടെയുള്ള വരുമാനവും പരിഗണിക്കേണ്ടതില്ലെന്ന് തമിഴ്നാട് സര്‍ക്കാര്‍ പ്രഖ്യാപിച്ചതായി 'ദി ന്യൂസ് മിനിറ്റ്' റിപ്പോര്‍ട്ട് ചെയ്തു.
നിലവില്‍, ഒബിസി വിഭാഗത്തില്‍ നിന്നുള്ള വ്യക്തികള്‍ക്ക് സിവില്‍ തസ്തികകളിലും സേവനങ്ങളിലും 27% സംവരണം നേടാനും വിദ്യാഭ്യാസ സ്ഥാപനങ്ങളില്‍ പ്രവേശനത്തിനും അര്‍ഹതയുണ്ട്. ഒഴിവുള്ള ഈ തസ്തികകള്‍ നേരിട്ടുള്ള നിയമനത്തിലൂടെയാണ് പൂരിപ്പിക്കുന്നത്. എന്നിരുന്നാലും, പ്രതിവര്‍ഷം എട്ട് ലക്ഷം രൂപയില്‍ കൂടുതല്‍ വരുമാനം ലഭിക്കുന്ന കുടുംബങ്ങള്‍ ഉള്‍പ്പെടുന്ന ഒബിസി വിഭാഗത്തിലെ 'ക്രീമി ലെയറിന്' ഇത് ബാധകമല്ല. ആരെയാണ് 'ക്രീമി ലെയര്‍' എന്ന് തരംതിരിക്കുന്നതെന്നും റിസര്‍വേഷനില്‍ നിന്ന് ഒഴിവാക്കുന്നതെന്നും നിര്‍ണ്ണയിക്കാന്‍ കേന്ദ്ര സര്‍ക്കാര്‍ നിശ്ചയിച്ചിട്ടുള്ള മാനദണ്ഡങ്ങളിലൊന്നാണ് വരുമാന പരിധി. |
