മൂന്നാര് കുണ്ടള എസ്റ്റേറ്റ് പുതുക്കുടി ഡിവിഷനില് ഉരുള്പൊട്ടല്. രണ്ട് കട മുറികളും ഒരു ക്ഷേത്രവും ഒരു ഓട്ടോറിക്ഷയും മണ്ണിനടിയിലായി. ആളപായമില്ല. രാത്രി ഒരു മണിയോടെയാണ് ഉരുള്പൊട്ടലുണ്ടായത്. അതിനാല് പ്രദേശത്ത് ആളുകളുണ്ടായിരുന്നില്ല. പുതുക്കുടി ഡിവിഷനില് ദുരിതാശ്വാസ ക്യാമ്പ് തുറന്നു. നാട്ടുകാര് അറിയിച്ചതനുസരിച്ചെത്തിയ പൊലീസ് ഫയര്ഫോഴ്സ് സംഘം 141 കുടുംബങ്ങളിലെ 450 പേരെ മാറ്റിപ്പാര്പ്പിച്ചു.
രാത്രി ഇതുവഴി വാഹനത്തില് വന്ന ആളുകളാണ് ഉരുള്പൊട്ടി റോഡിലേക്ക് പതിച്ചിരിക്കുന്നത് കണ്ട്. ഇവര് അറിയിച്ചതിനെ തുടര്ന്ന് കുടുംബങ്ങളെ പൂര്ണമായും അടുത്തുള്ള സ്കൂളുകളിലേക്കും മറ്റും മാറ്റി. സ്ഥലത്തെ രണ്ട് കടകളും ക്ഷേത്രവും പൂര്ണമായും മണ്ണിനടിയിലായിട്ടുണ്ടെന്നും ആളപായമില്ലെന്നും ദേവികുളം എംഎല്എ എ രാജ പറഞ്ഞു.
ജലനിരപ്പ് ഉയരുന്ന സാഹചര്യത്തില് ഇടുക്കി അണക്കെട്ട് നാളെ തുറക്കും. ജലനിരപ്പ് അപ്പര് റൂള് ലെവലിലേക്ക് എത്തുന്ന സാഹചര്യത്തില് ആണ് തീരുമാനം. രാവിലെ പത്തു മണിക്ക് തുറക്കും. ഇടമലയാറില് സംഭരിക്കാന് കഴിയുന്ന അളവില് കുറച്ചു വെള്ളം മാത്രം തുറന്നു വിടുമെന്ന് മന്ത്രി റോഷി അഗസ്റ്റിന് അറിയിച്ചു. 50 ക്യുമെക്സ് വെള്ളം ആയിരിക്കും തുറന്നു വിടുക. |