നിപ സ്ഥിരീകരിച്ച പശ്ചാത്തലത്തില് കോഴിക്കോട് ജില്ലയില് പത്ത് ദിവസത്തേക്ക് പൊതുപരിപാടികള് നിരോധിച്ചു. വെള്ളിയാഴ്ച കോഴിക്കോട് പ്രാദേശിക അവലോകന യോഗം ചേരും. മന്ത്രിമാരായ വീണാ ജോര്ജും പി എ മുഹമ്മദ് റിയാസും യോഗത്തില് പങ്കെടുക്കും. മുഖ്യമന്ത്രിയുടെ നേതൃത്വത്തില് ചേര്ന്ന യോഗത്തിലാണ് തീരുമാനം. ഇന്ന് നടത്താനിരുന്ന മന്ത്രിസഭാ യോഗം നാളത്തേക്ക് മാറ്റിവച്ചു.
നിപയുടെ പശ്ചാത്തലത്തില് ആരോഗ്യവകുപ്പ് പുതിയ ചികിത്സാ മാര്ഗരേഖ പുറത്തിറക്കി. രോഗികളുമായി നേരിട്ട് സമ്പര്ക്കമുള്ളവര്ക്ക് ക്വാറന്റീന് നിര്ബന്ധമാണ്. പനിയുള്ളവര് ആശുപത്രികളില് ചികിത്സ തേടണം. ആശുപത്രികളില് അണുബാധ നിയന്ത്രണ സംവിധാനം ഏര്പ്പെടുത്തണമെന്നും മാര്ഗനിര്ദേശത്തില് പറയുന്നു.
കണ്ണൂര്, വയനാട്, മലപ്പുറം എന്നീ അയല് ജില്ലകള്ക്കും ജാഗ്രതാ നിര്ദേശം നല്കി. സ്വകാര്യ ആശുപത്രിയില് ചികിത്സയിലുള്ള നിപ ബാധിതരുടെ ചികിത്സയ്ക്കായി മോണോക്ലോണല് ആന്റിബോഡിയുടെ ലഭ്യത ഐസിഎംആറുമായി ബന്ധപ്പെട്ട് ഉറപ്പ് വരുത്തിയിട്ടുണ്ടെന്ന് ആരോഗ്യവകുപ്പ് മന്ത്രി വീണാ ജോര്ജ്.
തിരുവനന്തപുരത്തും നിപ ഭീതി. പനി ബാധിച്ച മെഡിക്കല് വിദ്യാര്ഥിയെ പ്രത്യേക വാര്ഡിലേക്ക് മാറ്റി. വവ്വാല് കടിച്ച പഴം കഴിച്ചതായി സംശയിക്കുന്നു എന്ന് വിദ്യാര്ഥി വെളിപ്പെടുത്തിയിരുന്നു. വിദ്യാര്ഥിയുടെ സ്രവം പരിശോധിക്കും. ചൊവ്വാഴ്ച്ച രാവിലെയാണ് കടുത്ത പനിയോടെ വിദ്യാര്ത്ഥി മെഡിക്കല് കോളേജില് എത്തിയത്. വവ്വാല് കടിച്ച പഴം കഴിച്ചതായി സംശയിക്കുന്നുവെന്ന് വിദ്യാര്ത്ഥി പറഞ്ഞതോടെ പ്രത്യേകം സജ്ജീകരിച്ച മുറിയില് നിരീക്ഷണത്തിലാക്കി.
