ഉപപ്രധാനമന്ത്രി ആഞ്ചെലാ റെയ്‌നര്‍ ഏപ്രില്‍ മുതല്‍ പ്രാബല്യത്തില്‍ വരുന്ന സാമ്പത്തിക സെറ്റില്‍മെറ്റ് പ്രഖ്യാപിച്ചതോടെയാണ് ഭൂരിപക്ഷം കൗണ്‍സിലുകളും 4.9 ശതമാനം ക്യാപ്പിന് മുകളില്‍ നിരക്ക് വര്‍ധിപ്പിക്കുന്ന സ്ഥിതി വന്നിരിക്കുന്നത്.

വിന്‍ഡ്‌സര്‍ & മെയ്‌ഡെന്‍ഹെഡ് ബറോ കൗണ്‍സില്‍ 25% നിരക്ക് വര്‍ധിപ്പിക്കാന്‍ അനുവദിക്കണമെന്നാണ് ആവശ്യപ്പെട്ടിരുന്നത്. എന്തായാലും ഈ ആവശ്യം തള്ളിയ ഗവണ്‍മെന്റ് 8.9 ശതമാനം വര്‍ധന കൊണ്ട് തൃപ്തിപ്പെടാനാണ് നിര്‍ദ്ദേശിച്ചിരിക്കുന്നത്. ഈസ്റ്റ് ലണ്ടനിലെ ന്യൂഹാം കൗണ്‍സിലിനും സമാനമായ നിരക്ക് അനുവദിച്ചപ്പോള്‍ ബ്രാഡ്‌ഫോര്‍ഡ് കൗണ്‍സിലിന് 9.9 ശതമാനം നിരക്ക് കൂട്ടാനും അനുവാദം കിട്ടി.

ബര്‍മിംഗ്ഹാം സിറ്റി കൗണ്‍സില്‍, സോമര്‍സെറ്റ് കൗണ്‍സില്‍, ട്രാഫോര്‍ഡ് കൗണ്‍സില്‍ എന്നിവിടങ്ങളില്‍ 7.49 ശതമാനം വര്‍ധനവും സാധ്യമാകും. മറ്റ് ഭൂരിപക്ഷം ടൗണ്‍ഹാളുകളും പരാമാവധി 4.9 ശതമാനം വര്‍ധനയ്ക്കാണ് തയ്യാറെടുക്കുന്നത്. 2025-26 വര്‍ഷത്തേക്ക് കൗണ്‍സിലുകളുടെ ആകെ ഫണ്ടിംഗ് 69 ബില്ല്യണ്‍ പൗണ്ടാണെന്ന് ഹൗസിംഗ് & ലോക്കല്‍ ഗവണ്‍മെന്റ് മന്ത്രാലയം വ്യക്തമാക്കി.

2024-25'നെ അപേക്ഷിച്ച് കൗണ്‍സിലുകളുടെ ചെലവാക്കല്‍ അധികാരം 6.8 ശതമാനം ഉയര്‍ത്തിയെന്നാണ് ഗവണ്‍മെന്റ് വാദം. മറ്റു കൗണ്‍സിലുകളും നിരക്ക് കൂട്ടലിന്റെ പാതയിലാണ്. ഏതായാലും കുടുംബങ്ങളുടെ ബജറ്റ് മുകളിലോട്ടു തന്നെയാണ്.