ലണ്ടന്‍: ജനുവരി മാസത്തില്‍ ബ്രിട്ടന്‍ സമ്പദ്വ്യവസ്ഥയില്‍ വളര്‍ച്ചയില്ലാതെ നിലച്ചതായി ഔദ്യോഗിക കണക്കുകള്‍ വ്യക്തമാക്കുന്നു. റസ്റ്ററന്റുകളിലും ഹോട്ടലുകളിലും ഭക്ഷണം കഴിക്കുന്നവരുടെ എണ്ണം കുറഞ്ഞതാണ് പ്രധാന കാരണം.

ഓഫിസ് ഫോര്‍ നാഷനല്‍ സ്റ്റാറ്റിസ്റ്റിക്‌സ് (ONS) പ്രകാരം ജനുവരിയില്‍ രാജ്യത്തിന്റെ ജിഡിപി വളര്‍ച്ച 0% ആയിരുന്നു. ഡിസംബറില്‍ ഇത് 0.1% ആയിരുന്നു. സേവനമേഖലയിലാണ് പ്രധാനമായും ഇടിവ് രേഖപ്പെടുത്തിയത്. ഭക്ഷണ-പാനീയ സേവന മേഖലയില്‍ 2.7% ഇടിവ് ഉണ്ടായി. ഉത്പാദന മേഖല 0.1% കുറഞ്ഞപ്പോള്‍ നിര്‍മാണ മേഖല 0.2% വളര്‍ച്ച രേഖപ്പെടുത്തി.

വിദഗ്ധര്‍ പറയുന്നതനുസരിച്ച്, കഴിഞ്ഞ വര്‍ഷത്തിന്റെ രണ്ടാം പാദം മുതല്‍ തന്നെ സാമ്പത്തിക വളര്‍ച്ച മന്ദഗതിയിലായിരുന്നു. നികുതി വര്‍ധനയും തൊഴിലില്ലായ്മ ഉയരാനുമുള്ള ആശങ്കയും ഉപഭോക്താക്കളുടെ ചെലവ് കുറയ്ക്കാന്‍ കാരണമായി.

ഇതിനിടെ ഇറാന്‍-ഇസ്രയേല്‍ സംഘര്‍ഷം മൂലം ഊര്‍ജവിലകള്‍ ഉയരാനുള്ള സാധ്യതയും ആശങ്ക ഉയര്‍ത്തുന്നു. ഇന്ധനവില ഉയര്‍ന്നാല്‍ പണപ്പെരുപ്പം വീണ്ടും ഉയരാന്‍ സാധ്യതയുണ്ടെന്ന് സാമ്പത്തിക വിദഗ്ധര്‍ മുന്നറിയിപ്പ് നല്‍കി. അതിന്റെ ഫലമായി ബാങ്ക് ഓഫ് ഇംഗ്ലണ്ട് പലിശനിരക്ക് കുറയ്ക്കുന്നത് വൈകാന്‍ സാധ്യതയുണ്ടെന്നാണ് വിലയിരുത്തല്‍.

സര്‍ക്കാര്‍ സാമ്പത്തിക വളര്‍ച്ച ഉറപ്പാക്കാന്‍ നടപടികള്‍ തുടരുകയാണെന്ന് ബ്രിട്ടിഷ് ചാന്‍സലര്‍ റേച്ചല്‍ റീവ്‌സ് വ്യക്തമാക്കി. അതേസമയം ഔദ്യോഗിക സാമ്പത്തിക പ്രവചന ഏജന്‍സിയായ ഓഫിസ് ഫോര്‍ ബഡ്ജറ്റ് റെസ്‌പോണ്‍സിബിലിറ്റി (OBR) ഈ വര്‍ഷത്തെ ബ്രിട്ടന്റെ സാമ്പത്തിക വളര്‍ച്ച പ്രവചനം 1.4 ശതമാനത്തില്‍ നിന്ന് 1.1 ശതമാനമായി കുറച്ചു