ലണ്ടന്: ബ്രിട്ടനിലെ ലേബര് പാര്ട്ടിയില് നേതൃമാറ്റ അഭ്യൂഹങ്ങള് ശക്തമാകുന്നതിനിടെ പുതിയ രാഷ്ട്രീയ നീക്കങ്ങളെക്കുറിച്ചുള്ള റിപ്പോര്ട്ടുകള് പുറത്തുവന്നു. ഗ്രേറ്റര് മാഞ്ചസ്റ്റര് മേയര് ആന്ഡി ബേണ്ഹാം ബ്രിട്ടീഷ് പ്രധാനമന്ത്രിയായാല് അപ്രതീക്ഷിത പൊതു തിരഞ്ഞെടുപ്പ് നടത്തുന്നത് പരിഗണിക്കുമെന്നാണ് ദി സണ് റിപ്പോര്ട്ട് ചെയ്തത്. ലേബര് പാര്ട്ടി വൃത്തങ്ങളെ ഉദ്ധരിച്ചാണ് റിപ്പോര്ട്ട്. എന്നാല് ഈ അവകാശവാദങ്ങള് സ്വതന്ത്രമായി സ്ഥിരീകരിക്കാന് സാധിച്ചിട്ടില്ലെന്ന് റോയിട്ടേഴ്സ് വ്യക്തമാക്കി. പ്രധാനമന്ത്രി കീര് സ്റ്റാര്മറിനെതിരെ പാര്ട്ടിക്കുള്ളില് സമ്മര്ദ്ദം ഉയരുന്ന സാഹചര്യത്തിലാണ് ബേണ്ഹാമിന്റെ പേര് ശക്തമായി ഉയരുന്നത്. മേയ് മാസത്തിലെ പ്രാദേശിക തിരഞ്ഞെടുപ്പുകളിലെ മോശം പ്രകടനത്തിന് പിന്നാലെ സ്റ്റാര്മറിന്റെ നേതൃത്വത്തിനെതിരെ ലേബര് പാര്ട്ടിയില് വിമര്ശനം ശക്തമായതായാണ് റിപ്പോര്ട്ടുകള്.
ബേണ്ഹാം അധികാരത്തിലെത്തിയാല് നിലവിലെ ആഭ്യന്തരകാര്യ മന്ത്രി ഷബാന മഹമൂദിനെ ചാന്സലറായി നിയമിക്കാനുള്ള ആലോചനകള് നടക്കുന്നുണ്ടെന്നും റിപ്പോര്ട്ടില് പറയുന്നു. ബേണ്ഹാമിന്റെയും മഹമൂദിന്റെയും ടീമുകള്ക്കിടയില് ഇതുസംബന്ധിച്ച ചര്ച്ചകള് കുറച്ചുകാലമായി നടക്കുന്നുണ്ടെന്നാണ് ദി സണ് റിപ്പോര്ട്ട് ചെയ്തത്. മുന് ഉപപ്രധാനമന്ത്രി ഏയ്ഞ്ചല റെയ്നറിനെയും മന്ത്രിസഭയിലേക്ക് തിരികെ കൊണ്ടുവരാന് സാധ്യതയുണ്ടെന്നും റിപ്പോര്ട്ടില് പരാമര്ശമുണ്ട്. എന്നാല് ബേണ്ഹാം, മഹമൂദ്, റെയ്നര് എന്നിവരില് ആരും ഇതുവരെ റിപ്പോര്ട്ടിനോട് പരസ്യമായി പ്രതികരിച്ചിട്ടില്ല. ബേണ്ഹാമിന്റെ മുന്നിലെ ആദ്യ രാഷ്ട്രീയ കടമ്പ പാര്ലമെന്റിലെത്തുകയെന്നതാണ്. മാഞ്ചസ്റ്ററിന് സമീപമുള്ള മേക്കര്ഫീല്ഡ് മണ്ഡലത്തില് നടക്കുന്ന ഉപതിരഞ്ഞെടുപ്പില് വിജയിച്ചാല് മാത്രമേ അദ്ദേഹത്തിന് ലേബര് നേതൃത്വത്തിനായുള്ള നീക്കങ്ങള് കൂടുതല് ശക്തമാക്കാനാകൂ. ആ ഉപതിരഞ്ഞെടുപ്പ് ജൂണ് 18-നാണ് നടക്കുന്നത്.
