ലണ്ടന്‍: ശൈത്യകാലത്ത് രോഗികളുടെ തിരക്ക് വര്‍ധിക്കാനിരിക്കെ, വേനല്‍ക്കാലത്തെ സമ്മര്‍ദത്തില്‍നിന്നുപോലും കരകയറാനാകാതെ ഇംഗ്ലണ്ടിലെ ആശുപത്രി അത്യാഹിതവിഭാഗങ്ങള്‍. നീണ്ട കാത്തിരിപ്പും ആശുപത്രികള്‍ക്കിടയിലെ സേവനവ്യത്യാസവും രോഗികളുടെ സുരക്ഷയെക്കുറിച്ചുള്ള ആശങ്ക ശക്തമാക്കുകയാണ്. പുറത്തുവന്ന കണക്കുകള്‍ പ്രകാരം, ബ്ലാക്ക്പൂള്‍ ടീച്ചിങ് ഹോസ്പിറ്റല്‍സ് എന്‍എച്ച്എസ് ഫൗണ്ടേഷന്‍ ട്രസ്റ്റില്‍ നാലിലൊന്ന് രോഗികള്‍ക്കും അത്യാഹിതവിഭാഗത്തില്‍ 12 മണിക്കൂറിലധികം കാത്തിരിക്കേണ്ടിവരുന്നു. ദീര്‍ഘനേരത്തെ കാത്തിരിപ്പിന്റെ കാര്യത്തില്‍ ഏറ്റവും മോശം പ്രകടനമുള്ള ട്രസ്റ്റായാണ് ബ്ലാക്ക്പൂളിനെ റിപ്പോര്‍ട്ടില്‍ ചൂണ്ടിക്കാട്ടുന്നത്. അതേസമയം, മികച്ച പ്രകടനം കാഴ്ചവെക്കുന്ന നോര്‍ത്തംബ്രിയ ഹെല്‍ത്ത്കെയര്‍ എന്‍എച്ച്എസ് ഫൗണ്ടേഷന്‍ ട്രസ്റ്റില്‍ ഒരു ശതമാനം രോഗികള്‍ക്കാണ് ഇത്രയും നീണ്ട കാത്തിരിപ്പ് നേരിടേണ്ടിവരുന്നത്.

അത്യാഹിതവിഭാഗങ്ങളിലെ തിരക്കും കാത്തിരിപ്പുമായി ബന്ധപ്പെട്ട അധിക മരണങ്ങളുടെ കണക്കിലും വലിയ വര്‍ധനയുണ്ടെന്നാണ് റോയല്‍ കോളേജ് ഓഫ് എമര്‍ജന്‍സി മെഡിസിന്റെ വിലയിരുത്തല്‍. 2025ല്‍ നീണ്ട കാത്തിരിപ്പുമായി ബന്ധപ്പെട്ട് 15,860 അധിക മരണങ്ങള്‍ ഉണ്ടായിരിക്കാമെന്നാണ് സംഘടനയുടെ കണക്ക്. 2015ലെ സമാന കണക്ക് 1,657 ആയിരുന്നു. ഒരു ദശകത്തിനിടെ ഏകദേശം 850 ശതമാനത്തിന്റെ വര്‍ധനയാണിത്. ഇവ കാത്തിരിപ്പുമായി ബന്ധപ്പെട്ട അധിക മരണങ്ങളുടെ അനുമാനക്കണക്കുകളാണ്. ഓരോ മരണത്തിന്റെയും കാരണം പ്രത്യേകം സ്ഥിരീകരിച്ച കണക്കുകളായി ഇവയെ കാണാനാവില്ല. കോവിഡ് മഹാമാരിക്കുശേഷം അത്യാഹിതവിഭാഗങ്ങളിലെ സമ്മര്‍ദം രൂക്ഷമായെന്നും തുടര്‍ന്ന് സ്വീകരിച്ച നടപടികള്‍ പ്രശ്‌നത്തിന് മതിയായ പരിഹാരമായിട്ടില്ലെന്നുമാണ് വിമര്‍ശനം. ശൈത്യകാലത്തെ അധിക രോഗിഭാരം കൂടി നേരിടേണ്ടിവരുന്നത് എന്‍എച്ച്എസിന് കൂടുതല്‍ വെല്ലുവിളിയാകും.