ലണ്ടന്‍ : ജെറാര്‍ഡ് ക്ലീവിന്റെ കൃഷിഭൂമിയിലേക്ക് കൂട്ടമായാണ് അവരെത്തിയത്. കാരവനുകളും ലോറികളുമൊക്കെയായി നിരവധി ആളുകള്‍ . മൂന്നു വര്‍ഷമായി അവരവിടെ താമസിക്കുന്നു. പച്ചയായ അനധികൃത കൈയേറ്റം തന്നെ. ക്ലീവ് പരാതിയുമായി പോലീസിനെ സമീപിച്ചു. നടപടിയുണ്ടായില്ല. എന്നാല്‍ , ഭീഷണിയുണ്ടായി. കൈയേറ്റക്കാരെ ബലം പ്രയോഗിച്ചു പുറത്താക്കാന്‍ ശ്രമിച്ചാല്‍ ക്ലീവിനെ അറസ്റ്റ് ചെയ്യുമെന്നായിരുന്നു ഭീഷണി.

മൂന്നു വര്‍ഷത്തിനിപ്പുറം അധികൃതര്‍ നടപടിയെടുക്കാന്‍ പോകുകയാണ്. കൈയേറ്റക്കാരെ ഒഴിപ്പിക്കാനാണു തീരുമാനം. എന്നാല്‍ , ബലം പ്രയോഗിക്കില്ല. ഇവര്‍ സ്വയം ഒഴിഞ്ഞു പോയില്ലെങ്കില്‍ ക്ലീവിന് അടുത്ത ശിക്ഷ കിട്ടും. മറ്റൊന്നുമല്ല , 20,000 പൗണ്ട് പിഴ.

അമ്പതോളം പേരാണ് ക്ലീവിന്റെ സ്ഥലത്ത് ഇപ്പോള്‍ അനധികൃതമായി താമസിക്കുന്നത്. തന്റെ കൃഷിയിടെ മുഴുവന്‍ കൈയേറ്റക്കാര്‍ നശിപ്പിച്ചു കഴിഞ്ഞെന്നും ക്ലീവ് ചൂണ്ടിക്കാട്ടുന്നു. പക്ഷേ, പരാതി ഇനി ആരോടു പറയുമെന്നാണ് അറിയാത്തത്.