സര്ക്കാരിന്റെ നേതൃത്വത്തില് ഒരുക്കുന്ന വനിതാമതിലിനുള്ള പിന്തുണ പിന്വലിച്ചു നടി മഞ്ജു വാരിയര്. കലയാണ് തന്റെ രാഷ്ട്രീയമെന്നും പാര്ട്ടികളുടെ പേരില് രാഷ്ട്രീയനിറമുള്ള പരിപാടികളില്നിന്ന് അകന്നു നില്ക്കാനാണ് ആഗ്രഹിക്കുന്നതെന്നും സമൂഹമാധ്യമത്തിലെ കുറിപ്പില് മഞ്ജു വ്യക്തമാക്കി.
നേരത്തേ, 'വുമന്സ് വാള്' എന്ന ഫെയ്സ്ബുക് പേജിലെ വിഡിയോയിലൂടെയാണു താരം വനിതാമതിലില് പങ്കെടുക്കുമെന്ന് അറിയിച്ചത്. കാസര്കോട് മുതല് തിരുവനന്തപുരം വരെ ജനുവരി ഒന്നിനാണു വനിതാമതില്. 'നവോത്ഥാന മൂല്യങ്ങള് സംരക്ഷിക്കണം. സ്ത്രീപുരുഷ സമത്വം അനിവാര്യം. മുന്നോട്ടു പോകട്ടെ കേരളം. ഞാന് വനിതാ മതിലിനൊപ്പം'– എന്നായിരുന്നു മഞ്ജുവിന്റെ വിഡിയോ സന്ദേശം.
സ്ത്രീകള്ക്കുവേണ്ടിയുള്ള ഒരു സര്ക്കാര് ദൗത്യം എന്ന ധാരണയിലാണ് വനിതാമതില് എന്ന പരിപാടിക്ക് പിന്തുണ പ്രഖ്യാപിച്ചത്. പക്ഷേ അതിന് ഇതിനകം ഒരു രാഷ്ട്രീയ നിറം വന്നുചേര്ന്നത് ഞാന് അറിഞ്ഞിരുന്നില്ല. അത് എന്റെ അറിവില്ലായ്മ കൊണ്ടുണ്ടായതാണ്.
വൈകാരികമായ പല വിഷയങ്ങളുമായി വനിതാമതില് എന്ന പരിപാടി കൂട്ടിവായിക്കപ്പെടുന്നു എന്നതിനെക്കുറിച്ചും ഞാന് ബോധവതിയായിരുന്നില്ല' മഞ്ജു പറഞ്ഞു. കൊടികളുടെ നിറത്തില് വ്യാഖ്യാനിക്കുന്ന രാഷ്ട്രീയം തനിക്കില്ല. അത്തരം പരിപാടികളില് നിന്ന് മാറി നില്ക്കാനാണ് ആഗ്രഹിക്കുന്നത്. ആ നിലപാട് തന്നെയാണ് വനിതാ മതിലിന്റെ കാര്യത്തിലെന്നും മഞ്ജു വാര്യര് വ്യക്തമാക്കി. |