ലണ്ടന്: ഋഷി സുനകിന്റെ റുവാന്ഡ ബില്ലിനോട് വിമുഖത പ്രകടിപ്പിച്ച് രണ്ട് ടോറി പാര്ട്ടി അംഗങ്ങള് രാജിവച്ചു. ഡപ്യൂട്ടി ചെയര്മാരായ ലീ ആന്ഡേഴ്സണും ബ്രണ്ടന് ക്ലാര്ക്ക്-സ്മിത്തുമാണ് രാജിവച്ചത്. പ്രധാനമന്ത്രിയായതിന് ശേഷം ഋഷി സുനക് മന്ത്രിസഭാ നേരിടുന്ന ഏറ്റവും വലിയ കലാപമാണ് നിലവില് നടക്കുന്നത്. പ്രതിപക്ഷത്തോടൊപ്പം 30 ടോറി പ്രവര്ത്തകര് വോട്ട് ചെയ്താല് ബില് നിരസിക്കപെടും. ഇതൊക്കെ ആണ് സ്ഥിതിയെങ്കിലും ബുധനാഴ്ച നടക്കുന്ന വോട്ടെടുപ്പില് ബില് മൊത്തത്തില് പാസാകുമെന്ന വിശ്വാസത്തിലാണ് പ്രധാനമന്ത്രിയുടെ ഓഫീസ്. അഭയാര്ത്ഥികളെ റുവാണ്ടയിലേക്ക് അയക്കാനും ചെറിയ ബോട്ടുകളില് ചാനല് കടക്കുന്നതില് നിന്ന് ആളുകളെ പിന്തിരിപ്പിക്കാനുമുള്ള ഗവണ്മെന്റിന്റെ പദ്ധതി തിരിച്ച് കൊണ്ടുവരാനാണ് നിയമനിര്മ്മാണത്തില് ഇപ്പോള് ശ്രമിക്കുന്നത്.
ഇതുവരെ മുന് മന്ത്രിമാരായ റോബര്ട്ട് ജെന്റിക്കും സുല്ല ബ്രാവര്മാനും ഉള്പ്പെടെ നാല് കണ്സര്വേറ്റീവ് എംപിമാര് ബില്ല് മെച്ചപ്പെടുത്തിയില്ലെങ്കില് ബില്ലിനെതിരെ വോട്ടുചെയ്യുമെന്ന് പരസ്യമായി പറഞ്ഞിരുന്നു. ഇനിയും കൂടുതല് പാര്ട്ടി പ്രവര്ത്തകര് ഇവരോടൊപ്പം ചേരുമെന്നാണ് പുറത്ത് വരുന്ന വിവരങ്ങള് സൂചിപ്പിക്കുന്നത്. രണ്ട് ഡെപ്യൂട്ടി പാര്ട്ടി ചെയര്മാന്മാരും, ഡിപ്പാര്ട്ട്മെന്റ് ഫോര് ബിസിനസ് ആന്ഡ് ട്രേഡിലെ പാര്ലമെന്ററി പ്രൈവറ്റ് സെക്രട്ടറി ജെയ്ന് സ്റ്റീവന്സണും വിമത ഭേദഗതികള്ക്ക് വോട്ട് ചെയ്തതിന് ശേഷം രാജി വാഗ്ദാനം ചെയ്തതായി അറിയിച്ചു. റുവാണ്ട ബില്ലിലെ വിമത ഭേദഗതികളെ തങ്ങള് പിന്തുണക്കുന്നത് തങ്ങള് നിയമനിര്മ്മാണത്തിന് എതിരായതുകൊണ്ടല്ല, മറിച്ച് എല്ലാവരേയും പോലെ ഇത് പ്രാവര്ത്തികമായി കാണണം എന്ന ആഗ്രഹം കൊണ്ടാണെന്ന് ടോറി എംപിമാര് പ്രതികരിച്ചു.
