ലണ്ടന്‍: ഇന്ത്യയില്‍ നിന്നുള്ള പൗരന്മാര്‍ ഉള്‍പ്പെടെ ഇംഗ്ലീഷ് ചാനല്‍ വഴി ചെറുയാനങ്ങളില്‍ രാജ്യത്തേക്കെത്തുന്ന അഭയാര്‍ത്ഥികളുടെ എണ്ണത്തിലെ വര്‍ധനയോടെ പ്രതിസന്ധിയിലായ ബ്രിട്ടന്‍, ഇപ്പോള്‍ അഭയാര്‍ത്ഥികളുടെ വരവ് തടയാന്‍ പ്രധാനമന്ത്രി കെയര്‍ സ്റ്റാര്‍മറിന്റെ പുതിയ പദ്ധതി അവലംബിക്കാനൊരുങ്ങുകയാണ്. അഭയാര്‍ത്ഥികളുടെ എണ്ണം ഈ വര്‍ഷം 5000 കടന്നതോടെ, അഭയാഭ്യര്‍ത്ഥന നിഷേധിക്കപ്പെടുന്നവരെ ബാള്‍ക്കന്‍ രാജ്യങ്ങളിലേക്ക് മാറ്റി ഡിറ്റന്‍ഷന്‍ സെന്ററുകളിലാക്കാനാണ് ലേബര്‍ സര്‍ക്കാര്‍ ആലോചിച്ചു വരുന്നത്. അല്‍ബേനിയ, സെര്‍ബിയ, ബോസ്‌നിയ, നോര്‍ത്ത് മാസിഡോണിയ തുടങ്ങി പശ്ചിമ ബാള്‍ക്കന്‍ രാജ്യങ്ങളിലെ റിട്ടേണ്‍ ഹബ്ബുകളിലേക്ക് അഭയാര്‍ത്ഥികളെ മാറ്റാനാണ് സര്‍ക്കാര്‍ ഉദ്ദേശിക്കുന്നത്. ഈ പദ്ധതിയില്‍, ബാള്‍ക്കന്‍ രാജ്യങ്ങളിലേക്ക് അയയ്ക്കുന്ന ഓരോ വ്യക്തിയ്ക്കുമുള്ള പണം ബ്രിട്ടന്‍ ഈ രാജ്യങ്ങള്‍ക്ക് നല്‍കുകയും ചെയ്യും.

ഈ വര്‍ഷം ഇതുവരെ ചാനല്‍കടന്നെത്തിയ അഭയാര്‍ത്ഥികളുടെ എണ്ണം 5,025 ആയി ഉയര്‍ന്നിരുന്നു. കഴിഞ്ഞ വര്‍ഷം ഇതേ കാലയളവില്‍ ഉണ്ടായതിനേക്കാള്‍ 24 ശതമാനം വര്‍ദ്ധനവാണ് ഇക്കാര്യത്തില്‍ ഉണ്ടായിരിക്കുന്നത്. ഇതോടെയാണ് ചാനല്‍ വഴിയുള്ള അനധികൃത കുടിയേറ്റം അവസാനിപ്പിക്കാന്‍ സര്‍ക്കാരിന് മേല്‍ സമ്മര്‍ദ്ദം ശക്തമായത്. ഇംഗ്ലീഷ് ചാനല്‍ ശാന്തമായിരുന്ന സാഹചര്യം മുതലെടുത്ത് വെറും നാല് ദിവസങ്ങള്‍ക്കുള്ളില്‍ 1100 പേരെയാണ് മനുഷ്യക്കടത്ത് സംഘം ബ്രിട്ടനിലേക്ക് കടത്തിയത്. കുടിയേറ്റം കുറയ്ക്കുന്നതിനും നിയന്ത്രിക്കുന്നതിനുമായി ബ്രിട്ടന്‍ നിരവധി നടപടികള്‍ നടപ്പിലാക്കിയിട്ടുണ്ടെങ്കിലും സമ്പദ്വ്യവസ്ഥ കഴിഞ്ഞാല്‍ രാജ്യത്തെ പൗരന്മാര്‍ക്ക് ഏറ്റവും പ്രധാനപ്പെട്ട രണ്ടാമത്തെ പ്രശ്നമായി ഇത് ഇപ്പോഴും തുടരുന്നുവെന്ന് ഏറ്റവും പുതിയ അഭിപ്രായ വോട്ടെടുപ്പുകള്‍ സൂചിപ്പിക്കുന്നു. അതേസമയം, കുടിയേറ്റം സര്‍ക്കാര്‍ മോശമായി കൈകാര്യം ചെയ്യുന്നുന്നു എന്നു തന്നെയാണ് 72% ബ്രിട്ടീഷുകാരും പറയുന്നത്.

2024-ല്‍, 36,816 പേര്‍ ചെറിയ ബോട്ടുകളില്‍ ബ്രിട്ടനില്‍ എത്തി. ഇതില്‍ 19-ാമത്തെ ഉയര്‍ന്ന സംഖ്യയായ 292 പേര്‍ ഇന്ത്യയില്‍ നിന്നാണ്. 2024-ല്‍ 5,312 ഇന്ത്യക്കാര്‍ ബ്രിട്ടനില്‍ അഭയം തേടി, അങ്ങനെ ചെയ്യുന്ന ആറാമത്തെ ഉയര്‍ന്ന ദേശീയതയാണിത്. നിരസിക്കപ്പെട്ട അഭയം തേടുന്നവരെ പാര്‍പ്പിക്കുന്നതിനായി അംഗരാജ്യങ്ങള്‍ക്ക് യൂറോപ്യന്‍ യൂണിയന് പുറത്ത് റിട്ടേണ്‍ ഹബ്ബുകള്‍ സ്ഥാപിക്കാമെന്ന് കഴിഞ്ഞ ആഴ്ച യൂറോപ്യന്‍ യൂണിയന്‍ പ്രഖ്യാപിച്ചതും സ്റ്റാര്‍മറിന് ധൈര്യം പകര്‍ന്ന ഒന്നാണ്. ഐക്യരാഷ്ട്ര സഭയുടെ ഇന്റര്‍നാഷണല്‍ ഓര്‍ഗനൈസേഷന്‍ ഫോര്‍ മൈഗ്രേഷന്റെ പിന്തുണ കൂടി ലഭിച്ചതോടെയാണ് റിട്ടേണ്‍ ഹബ്ബുകള്‍ രൂപീകരിക്കാനുള്ള തീരുമാനം ദ്രുതഗതിയിലായത്. ഇക്കാര്യത്തില്‍, പ്രശ്നങ്ങള്‍ അഭിമുഖീകരിക്കുന്ന രാജ്യങ്ങളെ സഹായിക്കുമെന്ന് ഓര്‍ഗനൈസേഷന്‍ വ്യക്തമാക്കിയിട്ടുണ്ട്. നിലവില്‍ ഇത്തരത്തില്‍ റിട്ടേണ്‍ ഹബ്ബുകള്‍ ആരംഭിക്കാന്‍ നെതര്‍ലന്‍ഡ്‌സ് ഉഗാണ്ടയുമായി ചര്‍ച്ചകള്‍ നടത്തുകയാണ്. അഭയാര്‍ത്ഥികള്‍ ഡിറ്റന്‍ഷന്‍ സെന്ററുകളില്‍ സൂക്ഷിക്കാനുള്ള ഇറ്റലിയുടെ പദ്ധതി പരാജയപ്പെട്ടതോടെ അല്‍ബേനിയയില്‍ രണ്ട് ഡിറ്റന്‍ഷന്‍ സെന്ററുകളാണ് ഇപ്പോള്‍ ഒഴിഞ്ഞു കിടക്കുന്നത്. ബ്രിട്ടീഷ് നിയമപ്രകാരം സുരക്ഷിതമല്ലെന്ന് കരുതുന്ന അഫ്ഗാനിസ്ഥാന്‍, ഇറാന്‍, സൊമാലിയ തുടങ്ങിയ രാജ്യങ്ങളില്‍ നിന്നുള്ള നിരസിക്കപ്പെട്ട അഭയം തേടുന്നവരെ ഓഫ്‌ഷോര്‍ ഹബ്ബുകളിലേക്ക് മാറ്റുന്നതാണ് നിര്‍ദ്ദിഷ്ട പദ്ധതിയെന്ന് റിപ്പോര്‍ട്ടുണ്ട്. അതേസമയം, വിയറ്റ്നാം, പാകിസ്ഥാന്‍, ഇന്ത്യ തുടങ്ങി ബ്രിട്ടന്‍ സുരക്ഷിതമെന്ന് കരുതപ്പെടുന്ന രാജ്യങ്ങളില്‍ നിന്നുള്ളവരെ അത്തരം ഹബ്ബുകളില്‍ താല്‍ക്കാലികമായി തടങ്കലില്‍ വയ്ക്കാം. പിന്നീട് അവരെ അവരുടെ മാതൃരാജ്യത്തേക്ക് നാടുകടത്താനുള്ള ക്രമീകരണങ്ങള്‍ ചെയ്യും. മൂന്നാം കക്ഷി രാജ്യങ്ങളില്‍ ഇത്തരം ഹബ്ബുകള്‍ സൃഷ്ടിക്കാന്‍ പദ്ധതിയിടുന്ന മറ്റ് യൂറോപ്യന്‍ രാജ്യങ്ങളുമായി സഹകരിക്കാന്‍ ബ്രിട്ടീഷ് പ്രധാനമന്ത്രി കെയര്‍ സ്റ്റാമര്‍ ശ്രമിക്കുന്നുണ്ടെന്ന് വൃത്തങ്ങള്‍ ടൈംസിനോട് പറഞ്ഞു. നെതര്‍ലാന്‍ഡ്‌സ് നിലവില്‍ ഈ പദ്ധതിയെക്കുറിച്ച് ഉഗാണ്ടന്‍ സര്‍ക്കാരുമായി ചര്‍ച്ച ചെയ്യുന്നുണ്ടെന്നും അദ്ദേഹം കൂട്ടിച്ചേര്‍ത്തു.അനധികൃതമായി എത്തുന്ന അഭയാര്‍ത്ഥികളെ റുവാണ്ടയിലേക്ക് മാറ്റുവാനായിരുന്നു ബ്രിട്ടനിലെ കണ്‍സര്‍വേറ്റീവ് പാര്‍ട്ടി സര്‍ക്കാര്‍ തീരുമാനിച്ചത്. പിന്നീട് അവരുടെ അഭയാഭ്യര്‍ത്ഥന പരിശോധിക്കുകയും, അവ സ്വീകരിച്ചാല്‍ അവരെ തിരികെ കൊണ്ടുവരികയുമായിരുന്നു പദ്ധതി.

എന്നാല്‍, ഇപ്പോള്‍ ലേബര്‍ പാര്‍ട്ടി ഉദ്ദേശിക്കുന്നത് അനധികൃതമായി ബ്രിട്ടനിലെത്തുന്നവരുടെ അഭയാഭ്യര്‍ത്ഥന പരിഗണിക്കാനും അത് നിരാകരിക്കപ്പെടുന്നവരെ റിട്ടേണ്‍ ഹബ്ബുകളിലെക്ക് മാറ്റാനുമാണ്. ബ്രിട്ടന്‍ ,സ്വദേശത്തേക്ക് മടങ്ങാനുള്ള കരാറുകളില്ലാത്ത രാജ്യങ്ങളില്‍ നിന്നുള്ള കുടിയേറ്റക്കാരെ നാടുകടത്തുന്നതിന് ഈ ഹബ്ബുകള്‍ പിന്നീട് ഉപയോഗിക്കും. 2024 ജൂലൈയില്‍, കണ്‍സര്‍വേറ്റീവുകള്‍ ലേബര്‍ പാര്‍ട്ടിയോട് തിരഞ്ഞെടുപ്പില്‍ പരാജയപ്പെട്ടതിനെത്തുടര്‍ന്ന് വിവാദപരമായ കുടിയേറ്റ നയത്തിന്റെ കീഴില്‍ അഭയം തേടുന്നവരെ റുവാണ്ടയിലേക്ക് നാടുകടത്താനുള്ള പദ്ധതി ബ്രിട്ടന്‍ ഉപേക്ഷിച്ചു. ഋഷി സുനകിന്റെ 'ബോട്ടുകള്‍ നിര്‍ത്തും' എന്ന അവകാശവാദത്തെ എതിര്‍ത്ത് സ്റ്റാര്‍മര്‍ പദ്ധതി 'നിര്‍ജ്ജീവമായി പ്രഖ്യാപിക്കുകയായിരുന്നു. നാടുകടത്തപ്പെടുന്നവര്‍ക്ക് റുവാണ്ട സുരക്ഷിതമല്ലെന്ന് കണക്കാക്കിയ ബ്രിട്ടീഷ് പരമോന്നത കോടതിയും ഈ പദ്ധതി നിയമവിരുദ്ധമാണെന്ന് വിധിച്ചു. കുടിയേറ്റം തടയുന്നതിനും അതിര്‍ത്തി സുരക്ഷ ശക്തിപ്പെടുത്തുന്നതിനും ലക്ഷ്യമിട്ടുള്ള നിരവധി നടപടികള്‍ അവതരിപ്പിക്കാനുള്ള പദ്ധതികള്‍ കഴിഞ്ഞ വര്‍ഷം ബ്രിട്ടീഷ് ആഭ്യന്തര സെക്രട്ടറി യെവെറ്റ് കൂപ്പര്‍ പ്രഖ്യാപിക്കുകയുണ്ടായി. എന്‍ഫോഴ്‌സ്‌മെന്റ്, റിട്ടേണ്‍ ഫ്‌ലൈറ്റുകളിലെ വര്‍ദ്ധനവ്, തടങ്കല്‍ ശേഷി വര്‍ദ്ധിപ്പിക്കല്‍, നിയമവിരുദ്ധമായി തൊഴിലാളികളെ നിയമിക്കുന്ന തൊഴിലുടമകള്‍ക്കെതിരെ ഉപരോധങ്ങള്‍ നടപ്പിലാക്കല്‍ എന്നിവ ഉള്‍പ്പെടുന്ന ഈ നടപടികള്‍ പക്ഷെ 'നികുതിദായകരുടെ പണം പാഴാക്കല്‍' ആയി വിമര്‍ശിക്കപ്പെട്ടു. നയങ്ങളില്‍ വിശദാംശങ്ങളില്ലെന്നും 'കുടിയേറ്റക്കാരുടെ അന്തസ്സും മനുഷ്യത്വവും' അംഗീകരിക്കുന്നില്ലെന്നും പദ്ധതിക്കെതിരെ വിമര്‍ശനം ഉയര്‍ന്നിരുന്നു.