ലണ്ടന്‍: കൃഷിയിടത്തില്‍ നിന്നും കണ്ടെത്തിയ അപൂര്‍വ നാണയത്തിന് യുകെയില്‍ ലേലത്തിലൂടെ ലഭ്യമായത് 5000 പൗണ്ട്. ഏകദേശം 1900 ലേറെ വര്‍ഷം പഴക്കം കണക്കാക്കുന്ന റോമന്‍ കാലത്തെ ഈ നാണയം വെസ്റ്റ് മിഡ്ലാന്‍ഡിലെ കിങ്‌സ്?വിന്‍ഫോര്‍ഡില്‍ നിന്നുള്ള റോണ്‍ വാള്‍ട്ടേഴ്സ് (76) എന്നയാള്‍ക്ക് കഴിഞ്ഞ വര്‍ഷം ഡഡ്ലിക്ക് സമീപമുള്ള വാള്‍ ഹീത്തില്‍ നിന്നാണ് ലഭിച്ചത്. മെറ്റല്‍ ഡിറ്റക്ടര്‍ ഉപയോഗിച്ച് നാണയം കണ്ടെത്തുകയായിരുന്നു. യുകെയില്‍ ഈ ഗണത്തില്‍പ്പെട്ട ഒരു നാണയം മാത്രമേ കണ്ടെത്തിയിട്ടുള്ളൂ എന്നാണ് പുറത്തുവരുന്ന വിവരങ്ങള്‍ സൂചിപ്പിക്കുന്നത്. എന്നാല്‍ ഈ നാണയം വളരെ കുറഞ്ഞ വിലയ്ക്കാണ് വിറ്റുപോയത് എന്നാണ് ഈ രംഗത്തെ വിദഗ്ധര്‍ അഭിപ്രായപ്പെടുന്നത്.

കഴിഞ്ഞവര്‍ഷം സ്വിറ്റ്സര്‍ലന്‍ഡില്‍ ഏകദേശം 50,000 പൗണ്ടിനാണ് സമാനമായ കാലപഴക്കമുള്ള നാണയം വിറ്റു പോയത്. ആഭ്യന്തരയുദ്ധകാലത്ത് വെറും എട്ട് മാസം ഭരിച്ചിരുന്ന ഓലസ് വിറ്റെലിയസ് ചക്രവര്‍ത്തിയെയാണ് നാണയത്തില്‍ ചിത്രീകരിക്കുന്നത്. ആരുടെ ഭൂമിയില്‍ നാണയം കണ്ടെത്തിയോ ആ കര്‍ഷകന് വില്‍പനയില്‍ നിന്നുള്ള വരുമാനത്തിന്റെ പകുതി ലഭിക്കും എന്നതാണ് യുകെയിലെ നിയമം. അതിനാല്‍ നാണയം കണ്ടെത്തിയ റോണ്‍ വാള്‍ട്ടേഴ്‌സിന് ബാക്കി തുകയായ 2500 പൗണ്ടാണ് ലഭിക്കുക. യുകെയില്‍ അതിപുരാതന കാലത്തെയെന്ന് കരുതുന്ന അമൂല്യമായ വസ്തുക്കള്‍ നിരവധി സ്ഥലങ്ങളില്‍ നിന്നും കണ്ടെത്തിയിട്ടുണ്ട്.