ലണ്ടന്‍: ലണ്ടന്‍ നഗരത്തെ ഞെട്ടിച്ച സംഭവമായിരുന്നു ഡിപിഡി ഡ്രൈവറായ 23 വയസ്സുകാരന്‍ ഔര്‍മാന്‍ സിങ് അതിക്രൂരമായി കൊല്ലപ്പെട്ട സംഭവം. ഉച്ചയ്ക്ക് ശേഷം പാഴ്‌സലുകള്‍ വിതരണം ചെയ്യാന്‍ പോയ ഔര്‍മാനെ എട്ടംഗ സംഘം കാത്തിരുന്ന് ആക്രമിക്കുകയായിരുന്നു. കോടാലി, ഹോക്കി സ്റ്റിക്ക്, കത്തി തുടങ്ങിയ മാരകായുധങ്ങളുമായി ഒളിച്ചിരുന്ന സംഘം ഔര്‍മാനെ നിഷ്ഠൂരമായി വെട്ടിക്കൊലപ്പെടുത്തി. ആക്രമണത്തില്‍ ഔര്‍മാന്റെ ഇടത് ചെവിക്ക് ഗുരുതരമായ പരുക്കേറ്റു. തലയോട്ടി തകര്‍ന്ന് തലച്ചോറ് ചിതറിയ നിലയിലായിരുന്നു. 2023 ഓഗസ്റ്റ് 21നായിരുന്നു മനുഷ്യ മനഃസാക്ഷിയെ ഞെട്ടിച്ച ഈ കൊടുംക്രൂരത അരങ്ങേറിയത്. സുരക്ഷാ ക്യാമറകളില്‍ നിന്നും ഡോര്‍ബെല്‍ ക്യാമറകളില്‍ നിന്നും ലഭിച്ച ദൃശ്യങ്ങള്‍ ഈ കേസില്‍ നിര്‍ണായക തെളിവുകളായി മാറി. ഔര്‍മാന്റെ ഡെലിവറി വാനില്‍ നിന്ന് യാതൊന്നും മോഷണം പോകാത്തതിനാല്‍ കൊലപാതകത്തിന് പിന്നില്‍ മോഷണമല്ലെന്ന് പൊലീസ് ആദ്യമേ ഉറപ്പിച്ചു. എന്നാല്‍ ഇത്രയും ഭീകരമായ കൃത്യം ചെയ്തതാരാണ്, അവരുടെ ലക്ഷ്യമെന്തായിരുന്നു എന്ന ചോദ്യങ്ങള്‍ക്ക് ഉത്തരം കണ്ടെത്തുക എന്നത് അന്വേഷണ സംഘത്തിന് വലിയ വെല്ലുവിളിയായി. ഒടുവില്‍ മെഹാക്കുദീപ് സിങ് (24), സെഹാപല്‍ സിങ് എന്നിവരാണ് ഈ കേസില്‍ കുറ്റക്കാരാണെന്ന് കണ്ടെത്തിയത്. ഇതിനോടകം മറ്റ് അഞ്ച് പേരെ ശിക്ഷിക്കുകയും ജയിലിലടയ്ക്കുകയും ചെയ്തു. എന്നാല്‍ കൊലപാതകത്തിന്റെ യഥാര്‍ഥ കാരണം ഇപ്പോഴും ദുരൂഹമായി തുടരുന്നു. ഇന്ത്യന്‍ വംശജരായ സംഘാംഗങ്ങള്‍ തമ്മിലുണ്ടായ തര്‍ക്കമാണ് കൊലപാതകത്തിന് പിന്നിലെന്ന് പ്രാഥമിക നിഗമനമുണ്ട്. കൊലപാതകത്തിന് ഒരു മാസം മുന്‍പ് ഔര്‍മാന്റെ വീടിന് ഒരു മൈല്‍ അകലെയുള്ള പാര്‍ക്കില്‍ നടന്ന സംഗീത നിശയില്‍ വലിയ തര്‍ക്കമുണ്ടായിരുന്നു. അതുപോലെ, കൊലപാതകത്തിന് തലേദിവസം ഡര്‍ബിയില്‍ നടന്ന കബഡി സ്‌പോര്‍ട്‌സ് ടൂര്‍ണമെന്റിലും തര്‍ക്കങ്ങളുണ്ടായി. ഈ രണ്ട് സംഭവങ്ങളും കൊലപാതകത്തിലേക്ക് നയിക്കുന്നതിന് കാരണമായിരിക്കാമെന്ന് രാജ്യാന്തര മാധ്യമങ്ങള്‍ വിലയിരുത്തുന്നു. ഇന്ത്യന്‍ വംശജനായ ഔര്‍മാന്‍ ജനിച്ചത് ഇറ്റലിയിലാണ്. 46 വയസ്സുള്ള അമ്മയ്ക്കും ഇളയ സഹോദരിക്കുമൊപ്പം വെസ്റ്റ് മിഡ്ലാന്‍ഡിലാണ് അദ്ദേഹം താമസിച്ചിരുന്നത്. 2023 ജൂലൈ 22, 23 തീയതികളില്‍ പഞ്ചാബി സംസ്‌കാരം പ്രചോദിപ്പിക്കുന്ന ഒരു പരിപാടിയിലും ഔര്‍മാന്‍ പങ്കെടുത്തു. ഇവിടെയും ചില പ്രശ്‌നങ്ങളുണ്ടായതായി പറയപ്പെടുന്നു.

ഔര്‍മാന്റെ കൊലയാളികളുടെ രണ്ട് സുഹൃത്തുക്കള്‍ക്ക് ഈ പ്രശ്‌നങ്ങളെത്തുടര്‍ന്ന് പരുക്കേല്‍ക്കുകയും അവരെ ആശുപത്രിയില്‍ പ്രവേശിപ്പിക്കുകയും ചെയ്തിരുന്നു. ഒരാളെ വാളുമായി എത്തിയ ഒരാള്‍ ആക്രമിച്ചു. പിറ്റേന്ന് രാവിലെ ഔര്‍മാന്‍ ജോലിക്ക് പോകാനായി വീട്ടില്‍ നിന്ന് 45 മൈല്‍ അകലെയുള്ള സ്റ്റോക്ക്-ഓണ്‍-ട്രെന്റിലെ ഡിപിഡി ഡിപ്പോയിലേക്ക് പോയി. പതിവുപോലെ വാനില്‍ പാഴ്‌സലുകള്‍ നിറച്ച ശേഷം ഡെലിവറിക്കായി പുറപ്പെട്ടു. എന്നാല്‍ ഡിപ്പോയിലെ സഹപ്രവര്‍ത്തകനായ സുഖ്മന്‍ദീപ് സിങ് (24) അദ്ദേഹത്തിന്റെ ഡെലിവറി റൂട്ടിന്റെ വിവരങ്ങള്‍ കൊലയാളികള്‍ക്ക് കൈമാറിയിരുന്നു എന്ന കാര്യം ഔര്‍മാന്‍ അറിഞ്ഞില്ല. മെഹാക്കുദീപ് സിങ്ങും സെഹാപല്‍ സിങ്ങും വെസ്റ്റ് മിഡ്ലാന്‍ഡിലെ ടിപ്റ്റണിലുള്ള തങ്ങളുടെ വീടുകളില്‍ നിന്ന് ഒരു വെള്ള മെര്‍സിഡസ് ബെന്‍സില്‍ ഷ്രൂസ്ബറിയിലേക്ക് പോയി. അവരോടൊപ്പം ഇപ്പോഴും ഒളിവില്‍ കഴിയുന്ന ഹര്‍പ്രീത് സിങ്ങും ഹര്‍വിന്ദര്‍ സിങ് ടൂര്‍ണയും ഉണ്ടായിരുന്നു. മറ്റൊരു ഗ്രേ ഓഡി കാറില്‍ അര്‍ഷ്ദീപ് സിങ് (24), ജഗ്ദീപ് സിങ് (23), ശിവ്ദീപ് സിങ് (27), മന്‍ജോത് സിങ് (24) എന്നിവരും അവരെ പിന്തുടര്‍ന്നു. ഷ്രോപ്‌ഷെയറിലെ ചരിത്രപരമായ പട്ടണത്തിലൂടെ കോട്ടണ്‍ ഹില്ലിലെ ഒരു വിജനമായ പ്രാന്തപ്രദേശത്തേക്ക് അവര്‍ ഔര്‍മാനെ ശ്രദ്ധാപൂര്‍വ്വം പിന്തുടര്‍ന്നു. ഉച്ചയ്ക്ക് ഒരു മണിയോടെ ഔര്‍മാന്‍ വാന്‍ നിര്‍ത്തി പാഴ്‌സലുകള്‍ ഇറക്കാന്‍ തുടങ്ങി. മെര്‍സിഡസ് പിന്നാലെ പാര്‍ക്ക് ചെയ്യുകയും ഹര്‍വിന്ദര്‍ ഒരു മെറ്റല്‍ ബാറുമായി ആദ്യം പുറത്തിറങ്ങി ഔര്‍മാനെയും പരിഭ്രാന്തനായ അദ്ദേഹത്തിന്റെ സഹപ്രവര്‍ത്തകനെയും ആക്രമിക്കാന്‍ പാഞ്ഞടുത്തു. സഹപ്രവര്‍ത്തകന്‍ ഭയന്ന് ഓടി രക്ഷപ്പെട്ടു. ഔര്‍മാനും ഓടാന്‍ ശ്രമിക്കുന്നതിനിടെ ഹര്‍വിന്ദര്‍ ബാര്‍ എറിയുകയും അതിന്റെ ആഘാതത്തില്‍ ബാലന്‍സ് തെറ്റി നിലത്തുവീഴുകയും ചെയ്തു. പിന്നീട് നടന്നത് വെറും 35 സെക്കന്‍ഡ് മാത്രം നീണ്ടുനിന്ന ഭീകരമായ ആക്രമണമായിരുന്നു. എന്നാല്‍ ഔര്‍മാന് ജീവന്‍ നഷ്ടപ്പെട്ടു. ആയുധങ്ങളുമായി എത്തി സംഘം നിസ്സഹായനായ ഔര്‍മാനെ വെട്ടുകത്തി കൊണ്ട് വെട്ടുകയും കുത്തുകയും ഹോക്കി സ്റ്റിക്ക്, ഗോള്‍ഫ് സ്റ്റിക്ക് എന്നിവ ഉപയോഗിച്ച് ദാരുണമായി മര്‍ദ്ദിക്കുകയും ചെയ്തു. അവര്‍ ഔര്‍മാനെ ചോരയില്‍ കുളിച്ച് ഒരു വഴിയരികില്‍ ഉപേക്ഷിച്ചു. ഔര്‍മാനെ കണ്ടെത്തിയ താമസക്കാര്‍ ആംബുലന്‍സ് വിളിച്ചെങ്കിലും ഗുരുതരമായ പരുക്കുകള്‍ കാരണം സംഭവസ്ഥലത്ത് തന്നെ മരിച്ചു.

മെര്‍സിഡസും ഓഡിയും അതിവേഗത്തില്‍ ഓടിച്ചുപോയി. സ്റ്റാഫോര്‍ഡ് ക്രൗണ്‍ കോടതിയിലെ വിചാരണയ്ക്കിടെ, രക്ഷപ്പെടാന്‍ ശ്രമിക്കുന്നതിനിടെ മെറ്റല്‍ ബാര്‍ എറിഞ്ഞതിനെക്കുറിച്ചും അതില്‍ തന്റെ വിരലടയാളങ്ങള്‍ പതിഞ്ഞതിനെക്കുറിച്ചും സഹപ്രതിയായ മെഹാക്കുദീപ് സിങ്ങും ഹര്‍വിന്ദറും തമ്മില്‍ തര്‍ക്കമുണ്ടായതായി സെഹാപല്‍ പറഞ്ഞു. പ്രതികള്‍ പിന്നീട് അവരുടെ കാറുകള്‍ ഉപേക്ഷിക്കുകയും ആയുധങ്ങള്‍ നശിപ്പിക്കുകയും ചെയ്തു. സെഹാപലും മെഹാക്കുദീപ് സിങ്ങും ഷ്രൂസ്ബറി റെയില്‍വേ സ്റ്റേഷനിലേക്ക് ഒരു ടാക്‌സി ബുക്ക് ചെയ്തു. അവിടെ ബസില്‍ എത്തിയ മറ്റ് ചിലരെ അവര്‍ കണ്ടുമുട്ടി. അവര്‍ ഒരുമിച്ച് വോള്‍വര്‍ഹാംപ്ടണിലേക്ക് യാത്ര ചെയ്തു. യാത്രയിലെ അന്തരീക്ഷം എങ്ങനെയായിരുന്നു എന്ന ചോദ്യത്തിന് സെഹാപല്‍ മറുപടി നല്‍കിയത് ഇങ്ങനെ: 'അത് വളരെ പിരിമുറുക്കം നിറഞ്ഞതായിരുന്നു. ഞങ്ങള്‍ പരിഭ്രാന്തരായിരുന്നു. ഞങ്ങള്‍ക്കിടയില്‍ അധികം സംസാരമുണ്ടായിരുന്നില്ല.' മെഹാക്കുദീപ് തനിക്കും സുഹൃത്തിനും വേണ്ടി ടിപ്റ്റണിലെ ഹൈ സ്ട്രീറ്റിലുള്ള ഒരു സുഹൃത്തിന്റെ ഫ്‌ലാറ്റിലേക്ക് ഊബര്‍ ബുക്ക് ചെയ്തതായി സെഹാപല്‍ ജൂറി അംഗങ്ങളോട് പറഞ്ഞു. ഔര്‍മാന്‍ മരിച്ചുവെന്ന് താന്‍ അറിഞ്ഞത് ഫ്‌ലാറ്റില്‍ വച്ചാണെന്നും അദ്ദേഹം ഓര്‍ത്തെടുത്തു. 'എന്റെ സുഹൃത്ത് മൊബൈല്‍ ഫോണ്‍ ഉപയോഗിക്കുകയായിരുന്നു. അപ്പോഴാണ് ഷ്രൂസ്ബറിയില്‍ ഒരു ഡിപിഡി ഡ്രൈവര്‍ മരിച്ചുവെന്ന വാര്‍ത്ത അവന്‍ കാണുന്നത്. അപ്പോഴാണ് അത് ഈ കേസ് തന്നെയാണെന്ന് എനിക്ക് തോന്നിയത്. അത് ഞെട്ടിക്കുന്നതും മാനസികമായി ബുദ്ധിമുട്ടുണ്ടാക്കുന്നതുമായിരുന്നു. കാരണം ഷ്രൂസ്ബറിയില്‍ ഉണ്ടായിരുന്നപ്പോള്‍ ഔര്‍മാന് ഗുരുതരമായ പരുക്കുകളുണ്ടെന്നാണ് ഞാന്‍ കരുതിയത്. എന്നാല്‍ അവന്‍ മരിച്ചുവെന്ന വാര്‍ത്ത കേട്ടപ്പോള്‍ അത് ഞെട്ടിച്ചു.' കൊലപാതകം നടന്ന സ്ഥലത്ത് ഫൊറന്‍സിക് സംഘം പരിശോധന നടത്തി. 2023 ഓഗസ്റ്റ് 22ന് ഹര്‍വിന്ദര്‍ ഇന്ത്യയിലെ ഡല്‍ഹിയിലേക്ക് വിമാനം കയറിയെന്നും പിന്നീട് അപ്രത്യക്ഷനായെന്നും കോടതിയില്‍ അന്വേഷണ സംഘം അറിയിച്ചത്.

അതേസമയം, സെഹാപലും മെഹാക്കുദീപ് സിങ്ങും രണ്ടാഴ്ചയോളം ഒളിവില്‍ കഴിഞ്ഞ ശേഷം ഓസ്ട്രിയയിലേക്ക് വിമാന ടിക്കറ്റ് ബുക്ക് ചെയ്തു. കഴിഞ്ഞ മേയില്‍ സാല്‍സ്ബര്‍ഗിന് 44 മൈല്‍ വടക്കുകിഴക്കായി ഹോഹന്‍സെല്‍ എന്ന ഓസ്ട്രിയന്‍ ഗ്രാമത്തില്‍ വച്ച് പൊലീസ് നീക്കത്തിലൂടെ അവരെ പിടികൂടി. ഔര്‍മാന്റെ കൊലപാതകത്തെ ഇരുവരും നിഷേധിച്ചെങ്കിലും ജൂറി ഇവരെ കുറ്റക്കാരാണെന്ന് കണ്ടെത്തി. 2024 ഏപ്രിലില്‍ അര്‍ഷ്ദീപ് സിങ്, ജഗ്ദീപ് സിങ്, ശിവ്ദീപ് സിങ്, മന്‍ജോത് സിങ് എന്നിവരെ കൊലപാതകത്തിന് 28 വര്‍ഷം വീതം തടവിന് ശിക്ഷിച്ചതിന് പിന്നാലെയാണ് ഇവരുടെ ശിക്ഷയും വരുന്നത്. അവരുടെ സഹായിയായ സുഖ്മന്‍ദീപ് സിങ്ങിനെ മനഃപൂര്‍വമല്ലാത്ത നരഹത്യക്ക് 10 വര്‍ഷത്തെ തടവിന് ശിക്ഷിച്ചു. ചൊവ്വാഴ്ച കോടതിക്ക് പുറത്ത് സംസാരിച്ച വെസ്റ്റ് മെര്‍സിയ പൊലീസ് ഡിറ്റക്ടീവ് ചീഫ് ഇന്‍സ്‌പെക്ടര്‍ മാര്‍ക്ക് ബെല്ലാമി ഈ ആക്രമണം ആസൂത്രിതവുമാണെന്ന് പറഞ്ഞു. 'സെഹ്ജപാലും മെക്കാഹ്ദീപും മറ്റ് ആറ് പേരും ചേര്‍ന്ന് ഈ ആക്രമണം ഒരു ശാന്തമായ ഷ്രോപ്‌ഷെയര്‍ തെരുവില്‍ പകല്‍ സമയത്ത് നടത്തിയത് ഔര്‍മാനെ കൊല്ലുക എന്ന ഒരേയൊരു ഉദ്ദേശ്യത്തോടെയാണ്. ഔര്‍മാന്റെ ഡെലിവറി റൂട്ട് വിവരങ്ങള്‍ ലഭിക്കാന്‍ അവര്‍ക്ക് അകത്തുള്ള ഒരാളുടെ സഹായം ലഭിച്ചു. അവന്‍ നിസ്സഹായനാണെന്ന് അറിഞ്ഞുകൊണ്ട് അവര്‍ ആയുധങ്ങളുമായി കാത്തിരുന്നു ആക്രമിക്കുകയായിരുന്നു. തങ്ങള്‍ ചെയ്തതെന്താണെന്ന് അറിഞ്ഞുകൊണ്ട് സെഹ്ജപാലും മെക്കാഹ്ദീപും നിയമനടപടികളില്‍ നിന്ന് രക്ഷപ്പെടാന്‍ രാജ്യം വിട്ടുവെന്നും അദ്ദേഹം കൂട്ടിചേര്‍ത്തു. പക്ഷേ കൊലപാതകത്തിനുള്ള പിന്നിലുള്ള കാരണം കണ്ടെത്താന്‍ അന്വേഷണ സംഘത്തിന് ഇന്നും കഴിഞ്ഞിട്ടില്ല.