ലണ്ടന്: ലണ്ടനിലെ പ്രശസ്തമായ തേംസ് നദിയുടെ തീരത്ത് ഇന്ത്യക്കാരന് കാല് കഴുകുകയും പിന്നീട് കുളിക്കുകയുമുള്ള ദൃശ്യങ്ങള് സമൂഹമാധ്യമങ്ങളില് വൈറലാകുന്നു. ലണ്ടന് ഐ, ടവര് ബ്രിജ്, പാര്ലമെന്റ് ഹൗസ് തുടങ്ങിയ പ്രധാന വിനോദസഞ്ചാര കേന്ദ്രങ്ങളുടെ സമീപത്തുകൂടി ഒഴുകുന്ന തേംസ്, നഗരത്തിന്റെ പ്രധാന ലാന്ഡ്മാര്ക്കുകളിലൊന്നാണ്.
വീഡിയോയില് കാണുന്ന യുവാവ് നദിയുടെ കരയില് നിന്ന് കാല് കഴുകിയതിനു ശേഷം നേരിട്ട് കുളിക്കുകയായിരുന്നുവെന്ന് റിപ്പോര്ട്ടുകള് വ്യക്തമാക്കുന്നു. ഈ ദൃശ്യങ്ങള് സമൂഹമാധ്യമങ്ങളില് പ്രചരിച്ചതോടെ നിരവധി പേര് യുവാവിന്റെ പ്രവൃത്തിയെ വിമര്ശിച്ച് രംഗത്തെത്തി. ചിലര് ഇത് നിയമലംഘനമാണോ എന്ന ആശങ്കയും പങ്കുവെച്ചു.
തേംസ് നദിയിലെ ജലത്തിന്റെ ശുചിത്വം സംബന്ധിച്ച ആശങ്കകള് ഈ സംഭവത്തോടെ വീണ്ടും ചര്ച്ചയായിരിക്കുകയാണ്. അടുത്തകാലത്ത് നദിയുടെ വിവിധ ഭാഗങ്ങളില് ഇ. കോളി ബാക്ടീരിയയുടെ അളവ് കൂടിയതായി കണ്ടെത്തിയിരുന്നു. മലിനജലവും പ്ലാസ്റ്റിക് മാലിന്യങ്ങളും ചേര്ന്ന് ഹാമര്സ്മിത്ത് ബ്രിജ് ഉള്പ്പെടെ 'വെറ്റ്-വൈപ്പ് ദ്വീപുകള്' രൂപംകൊണ്ടതായും റിപ്പോര്ട്ടുകളുണ്ട്.
ഇംഗ്ലണ്ടിലുടനീളമുള്ള ദേശീയ വിലയിരുത്തലുകള് പ്രകാരം, നീന്താന് നിശ്ചയിച്ച പല സ്ഥലങ്ങളിലെയും ജലഗുണനിലവാരം 'മോശമായ നിലയില്' ആണെന്ന് വ്യക്തമാക്കുന്നു. ഇതിന്റെ പശ്ചാത്തലത്തില്, നദിയില് കുളിച്ച യുവാവിന്റെ പ്രവൃത്തി ജലശുദ്ധിയുമായി ബന്ധപ്പെട്ട പൊതുചര്ച്ചകള്ക്ക് പുതിയ ഉണര്വാണ് നല്കുന്നത്.
