ലണ്ടന്‍: ലേബര്‍ ഗവണ്‍മെന്റിന്റെ പുതിയ കുടിയേറ്റ നിയന്ത്രണ നിര്‍ദ്ദേശങ്ങള്‍ നടപ്പായാല്‍ 50,000-ഓളം വിദേശ നഴ്സുമാര്‍ യുകെ വിടാന്‍ സാധ്യതയുണ്ടെന്ന് റോയല്‍ കോളേജ് ഓഫ് നഴ്സിംഗ് (RCN) മുന്നറിയിപ്പ് നല്‍കി. ഇത് യുകെയിലെ നാഷണല്‍ ഹെല്‍ത്ത് സര്‍വീസിന് (NHS) ഇതുവരെ നേരിട്ടിട്ടില്ലാത്ത ഏറ്റവും വലിയ തൊഴില്‍ പ്രതിസന്ധിയിലേക്ക് നയിക്കുമെന്നാണ് ആശങ്ക.

- പശ്ചാത്തലം: റിഫോം പാര്‍ട്ടിയുടെ മുന്നേറ്റം തടയാനാണ് ലേബര്‍ ഗവണ്‍മെന്റ് കുടിയേറ്റ നിയന്ത്രണങ്ങള്‍ കടുപ്പിച്ച് നെറ്റ് മൈഗ്രേഷന്‍ കുറയ്ക്കാനുള്ള നടപടികള്‍ പരിഗണിക്കുന്നത്.

- നിര്‍ദ്ദേശങ്ങള്‍:

- കുടിയേറ്റക്കാര്‍ക്ക് സെറ്റില്‍മെന്റ് ലഭിക്കാന്‍ നിലവിലെ 5 വര്‍ഷത്തിന് പകരം 10 വര്‍ഷമാക്കി സമയപരിധി ഉയര്‍ത്തുക.

- വിദേശ ജോലിക്കാരുടെ സ്‌കില്‍ മാനദണ്ഡം ഡിഗ്രി ലെവലിലേക്ക് ഉയര്‍ത്തുക.

- എല്ലാ വിസകള്‍ക്കും ഇംഗ്ലീഷ് ഭാഷാ നിലവാരം വര്‍ദ്ധിപ്പിക്കുക.

- ഡിപ്പന്റഡ്സിനും ഇംഗ്ലീഷ് യോഗ്യത നിര്‍ബന്ധമാക്കുക.

ആര്‍സിഎന്‍ കണ്ടെത്തല്‍:

- 200,000-ലേറെ വിദേശ വിദ്യാഭ്യാസം നേടിയ നഴ്സിംഗ് ജീവനക്കാരാണ് ഇപ്പോള്‍ NHS-ല്‍ ജോലി ചെയ്യുന്നത്.

- 2021 മുതല്‍ 76,876 പേര്‍ വിസ നേടി, 5 വര്‍ഷം പൂര്‍ത്തിയാക്കി സെറ്റില്‍മെന്റ് നേടാന്‍ തയ്യാറായവരാണ് ഇവര്‍.

- നിര്‍ദ്ദേശങ്ങള്‍ നടപ്പായാല്‍ NHS-ലെ നഴ്സിംഗ് ജീവനക്കാരില്‍ പത്തിലൊന്ന് പേരെ ബാധിക്കും.

പ്രതികരണം:

പദ്ധതികള്‍ സംബന്ധിച്ച് പബ്ലിക് കണ്‍സള്‍ട്ടേഷന്‍ നടക്കാനിരിക്കെയാണ് നഴ്സിംഗ് നേതാക്കള്‍ ശക്തമായി എതിര്‍പ്പ് പ്രകടിപ്പിക്കുന്നത്. ഉയര്‍ന്ന സ്‌കില്‍ ഉള്ള കുടിയേറ്റക്കാരെ രാഷ്ട്രീയ ഫുട്ബോളാക്കി മാറ്റുന്നതായി ഇവര്‍ ആരോപിക്കുന്നു. നഴ്സുമാര്‍ കൂട്ടമായി രാജ്യം വിടുകയാണെങ്കില്‍ രോഗികളുടെ സുരക്ഷയും, വെയ്റ്റിംഗ് സമയം കുറയ്ക്കാനുള്ള ശ്രമങ്ങളും ഗുരുതരമായി ബാധിക്കുമെന്ന് മുന്നറിയിപ്പില്‍ വ്യക്തമാക്കുന്നു.