ഓടുന്ന ബൈക്കില് അപകടകരമായ 'റൊമാന്റിക് സ്റ്റണ്ട്' നടത്തിയ യുവതീ യുവാക്കളുടെ ദൃശ്യം പകര്ത്തി എസ്പി. ബൈക്കിന്റെ പെട്രോള് ടാങ്കില് തനിക്ക് അഭിമുഖമായി യുവതിയെ ഇരുത്തി ബൈക്ക് ഓടിച്ച യുവാവിന്റെ വീഡിയോ ആണ് പുറത്തുവന്നത്. പൊലീസ് സൂപ്രണ്ട് ഇവരെ കയ്യോടെ പിടികൂടുകയും അപ്പോള്ത്തന്നെ പിഴ ചുമത്തുകയും ചെയ്തു. മെയ് 11ന് ഛത്തീസ്ഗഡിലെ ജഷ്പൂരില് ദേശീയപാത 43ലാണ് സംഭവം. ജഷ്പൂര് എസ്പി ശശി മോഹന് സിംഗ് തന്റെ കാറില് സഞ്ചരിക്കവേയാണ് അപകടകരമായ ബൈക്ക് യാത്ര കണ്ടത്. എസ്പി പകര്ത്തിയ വീഡിയോ സോഷ്യല് മീഡിയയിലെത്തി. വീഡിയോയിലുള്ള വിനയ് എന്ന യുവാവ് ഹെല്മറ്റ് ധരിച്ചിട്ടുണ്ട്. എന്നാല് യുവതിക്ക് ഹെല്മറ്റില്ല. മാത്രമല്ല ബൈക്കില് യുവാവിന് അഭിമുഖമായാണ് യുവതി ഇരുന്നത്.
കുങ്കുരിയില് നിന്ന് ജഷ്പൂരിലേക്കുള്ള യാത്രയിലാണ് നിരുത്തരവാദപരമായ ഡ്രൈവിംഗ് തന്റെ ശ്രദ്ധയില്പ്പെട്ടതെന്ന് എസ്പി പറഞ്ഞു. ഇവരെ തടഞ്ഞുനിര്ത്തി വിവരങ്ങള് ചോദിച്ചു. മായാലി അണക്കെട്ട് സന്ദര്ശിക്കാന് വന്നതാണെന്നും ബൈക്ക് സ്റ്റണ്ട് നടത്തുകയാണെന്നും യുവതീയുവാക്കള് പറഞ്ഞു. ഇവര്ക്ക് പിഴ ചുമത്തിയെന്നും പൊലീസ് അറിയിച്ചു. ഇത്തരത്തില് അപകടകരമായ ബൈക്ക് യാത്രയോ സ്റ്റണ്ടോ ആരും നടത്തരുതെന്ന് എസ്പി മുന്നറിയിപ്പ് നല്കി. കുട്ടികളുടെ കാര്യത്തില് മാതാപിതാക്കള്ക്ക് ശ്രദ്ധ വേണം. ആരെങ്കിലും ഇത്തരം സ്റ്റണ്ടുകള് ചെയ്യുന്നതായി കണ്ടെത്തിയാല് കുറ്റക്കാര്ക്കെതിരെ കര്ശന നടപടി സ്വീകരിക്കുമെന്നും അദ്ദേഹം മുന്നറിയിപ്പ് നല്കി.