കല്യാണം കുട്ടിക്കളിയല്ലെന്നു കാരണവന്മാര്‍ പറയുന്നത് കേട്ടിട്ടില്ലേ. ഈ നാട്ടുചൊല്ലില്‍ വലിയ അര്‍ഥമുണ്ട്. ജനനത്തോടൊപ്പം ജീവിതത്തിന്റെ പകുതിയാകുന്ന ജീവനെയും നിശ്ചയിച്ചിട്ടുണ്ടെന്നാണ് പുരാണം. അതില്‍ വാസ്തവമുണ്ടെന്നു മനസിലാകണമെങ്കില്‍ ജന്മനക്ഷത്രപ്പൊരുത്തങ്ങളുടെ അടിസ്ഥാനം തിരിച്ചറിയണം. ജനിച്ച ദിവസവും ഒരാളുടെ സ്വഭാവവും എങ്ങനെ ബന്ധപ്പെട്ടിരിക്കുന്നുവോ അതുപോലെത്തന്നെയാണ് അഗ്നിസാക്ഷിയായി വിവാഹംകൊണ്ടു ബന്ധിതരാകുന്നവര്‍ തമ്മിലുള്ള യോജിപ്പും. രണ്ടു പേര്‍ പരസ്പരം കണ്ടു ചിരിച്ചതുകൊണ്ട് ദാമ്പത്യജീവിതത്തിന് അടിത്തറ ചിട്ടപ്പെടുന്നില്ല. മാനസികമായ പൊരുത്തം മതിയെന്നുള്ള ചിന്തകളെ തള്ളിപ്പറയാതെ തന്നെ ഓര്‍മിപ്പിക്കട്ടെ, മനസുകൊണ്ടുള്ള പൊരുത്തങ്ങള്‍ പിന്നീട് ഒരിക്കലും യോജിപ്പിക്കാന്‍ പറ്റാത്ത വിധം അകലുന്ന സംഭവങ്ങള്‍ നിരവധി. ജ്യോതിഷമെല്ലാം നോക്കിയിട്ടും അകലുന്നവരില്ലേ എന്ന ചോദ്യത്തിനുകൂടി മറുപടി പറഞ്ഞാലേ ഈ ആമുഖം പൂര്‍ണമാകൂ. സ്വിച്ചിട്ടാല്‍ വൈദ്യുതി ബള്‍ബ് തെളിയുമെന്ന് അറിയാമല്ലോ. അതിന് ഇലക്ട്രിക് പവര്‍ വേണമെന്നത് നിഷേധിക്കാനാവുമോ ?  ഇലക്ട്രിക് പവറിനുപകരം ബാറ്ററി വച്ചും ബള്‍ബ് തെളിയിച്ചുകൂടേ എന്നു ചോദിക്കുന്നവരാണ് ജ്യോതിഷം നോക്കിയിട്ടും വിവാഹ ബന്ധത്തില്‍ അനിഷ്ടങ്ങളുണ്ടായി എന്നു വിശദീകരിച്ച് സ്വയം ന്യായവിധി നടത്തുന്നവര്‍ . ജന്മനക്ഷത്രവും പൊരുത്തവും സുദൃഢമായ ദാമ്പത്യത്തിന് നിര്‍ബന്ധമാണ്. ഹിന്ദു മതത്തില്‍ മാത്രമല്ല, ലോകത്ത് എവിടെയാണെങ്കിലും ഇത് അത്ഭുതകരമാം വിധം ചേര്‍ന്നു വരുന്നുണ്ടെന്നു തിരിച്ചറിയുക.