നോര്‍ത്താംപ്ടണ്‍: യുകെയില്‍ തടവുകാരനുമായി ബന്ധമുണ്ടെന്ന് കണ്ടെത്തിയതിനെ തുടര്‍ന്ന് ജയില്‍ ഉദ്യോഗസ്ഥയ്ക്ക് 12 മാസം തടവ് ശിക്ഷയും പിഴയും വിധിച്ച് കോടതി. നോര്‍ത്താംപ്ടണ്‍ഷയറിലെ വെല്ലിങ്ബറോയിലെ എച്ച്എംപി ഫൈവ് വെല്‍സില്‍ ജോലി ചെയ്തിരുന്ന ടോണി കോളിനെതിരെയാണ് നടപടി. നോര്‍ത്താംപ്ടണ്‍ഷെയര്‍ പൊലീസിന്റെ അന്വേഷണത്തില്‍ 28 വയസ്സുള്ള പുരുഷ തടവുകാരനുമായി ബന്ധമുണ്ടെന്ന് ജയില്‍ ഉദ്യോഗസ്ഥ സമ്മതിച്ചിരുന്നു. തടവ് ശിക്ഷയ്ക്ക് പുറമേ 187 പൗണ്ട് ആണ് പിഴയായി അടയ്ക്കേണ്ടത്.

2023 ജനുവരിയില്‍ ജയില്‍ ഉദ്യോഗസ്ഥയായ ടോണി കോള്‍ അനധികൃതമായി അധിക ഡ്യൂട്ടിയെടുക്കുന്നതായി കണ്ടെത്തിയിരുന്നു. ഇതേ തുടര്‍ന്ന് നടന്ന അന്വേഷണത്തിനിടെയാണ് ഉദ്യോഗസ്ഥയും തടവുകാരനുമായുള്ള ബന്ധം പുറത്തറിഞ്ഞത്. സിസിടിവി ദൃശ്യങ്ങളില്‍ ഉദ്യോഗസ്ഥ തടവുകാരനുമായി കൂടുതല്‍ സമയവും ചെലവഴിച്ചതായി കണ്ടെത്തി. തടവുകാരന്‍ ഉദ്യോഗസ്ഥയുടെ ശരീരത്തില്‍ സ്പര്‍ശിക്കുന്നതും ദൃശ്യങ്ങളിലുണ്ടായിരുന്നു എന്നാണ് റിപ്പോര്‍ട്ടുകള്‍.

അഞ്ച് മാസത്തിനിടെ ഉദ്യോഗസ്ഥ തടവുകാരനുമായി 4,431 സന്ദേശങ്ങളും കോളുകളും കൈമാറിയതായി നോര്‍ത്താംപ്ടണ്‍ഷെയര്‍ പൊലീസിന്റെ അന്വേഷണത്തില്‍ വ്യക്തമായി. തടവുകാരനുമായി ഉദ്യോഗസ്ഥയ്ക്കുള്ള ബന്ധം തികച്ചും അനുചിതമാണെന്ന് മുതിര്‍ന്ന ഉദ്യോഗസ്ഥര്‍ വ്യക്തമാക്കി. ഇത്തരം പെരുമാറ്റം ജയിലിലെ മറ്റ് സഹപ്രവര്‍ത്തകരുടെയും തടവുകാരുടെയും സുരക്ഷയെ ബാധിക്കുന്നതാണെന്നാണ് അന്വേഷണ ഉദ്യോഗസ്ഥരുടെ നിരീക്ഷണം. ഇത്തരത്തില്‍ വഴിവിട്ട ബന്ധം തുടരുന്ന ഉദ്യോഗസ്ഥര്‍ക്കെതിരെ തുടര്‍ന്നും നടപടിയുണ്ടാകുമെന്ന് ഉദ്യോഗസ്ഥര്‍ അറിയിച്ചു.