ഹൈദരാബാദ് ന്മ ഐപിഎല്‍ മത്സരത്തിനായി മുഖ്യമന്ത്രിക്ക് നല്‍കിയ കോംപ്ലിമെന്ററി പാസുകള്‍ നടിയുടെ കൈവശം എത്തിയതിനെ തുടര്‍ന്ന് വിവാദം. തെലങ്കാന മുഖ്യമന്ത്രി രേവന്ത് റെഡ്ഡിക്ക് അനുവദിച്ചിരുന്ന വിഐപി പാസുകളാണ് നടിയും ഇന്‍സ്റ്റഗ്രാം ഇന്‍ഫ്‌ലുവന്‍സറുമായ കുഷിത കല്ലാപുവിന്റെ കൈവശം എത്തിയത്.

കുഷിത കല്ലാപു ഇന്‍സ്റ്റഗ്രാമില്‍ പങ്കുവച്ച ചിത്രങ്ങളിലാണ് സംഭവം പുറത്തുവന്നത്. 40,000 രൂപ വിലയുള്ള സണ്‍റൈസേഴ്സ് എലൈറ്റ് ലോഞ്ചിലെ രണ്ട് ടിക്കറ്റുകള്‍ നടി പോസ്റ്റ് ചെയ്തിരുന്നു. ഹൈദരാബാദിലെ ഉപ്പല്‍ സ്റ്റേഡിയത്തില്‍ ശനിയാഴ്ച നടന്ന സണ്‍റൈസേഴ്സ് ഹൈദരാബാദ്‌ചെന്നൈ സൂപ്പര്‍ കിങ്സ് മത്സരത്തിനായുള്ള ടിക്കറ്റുകളാണ് ഇവ.

സോഷ്യല്‍ മീഡിയയില്‍ ചോദ്യങ്ങള്‍

ചിത്രങ്ങള്‍ വൈറലായതോടെ, മുഖ്യമന്ത്രിയുടെ ഓഫീസില്‍ നിന്നാണ് ടിക്കറ്റുകള്‍ പുറത്ത് പോയതോ, എന്താണ് ഇതിന് പിന്നിലെ ഉദ്ദേശമെന്നോ സമൂഹമാധ്യമങ്ങളില്‍ ചോദ്യങ്ങള്‍ ഉയര്‍ന്നു. മുഖ്യമന്ത്രിക്കുള്ള വിഐപി പാസ് കൈകാര്യം ചെയ്യുന്നത് മുഖ്യമന്ത്രിയുടെ ഓഫീസാണ്. നടി ഈ ടിക്കറ്റുകള്‍ ഉപയോഗിച്ച് മത്സരം കണ്ടോ എന്നതില്‍ വ്യക്തതയില്ല.

നടിയുടെ പശ്ചാത്തലം

കുഷിത കല്ലാപു ചംഗുരെ ബംഗാരു രാജ, നീതോനെ നേനു, ബാബു - നമ്പര്‍ 1 ബുള്‍ഷിറ്റ് ഗൈ, മനോഹരം എന്നീ തെലുങ്ക് ചിത്രങ്ങളില്‍ അഭിനയിച്ചിട്ടുണ്ട്. വിവിധ ബ്രാന്‍ഡുകളുടെ പരസ്യങ്ങളിലും പ്രത്യക്ഷപ്പെട്ടിട്ടുണ്ട്. ഇന്‍സ്റ്റഗ്രാമില്‍ 1.1 മില്യണ്‍ ഫോളോവേഴ്സുള്ള കുഷിതയുടെ പോസ്റ്റാണ് വിവാദത്തിന് കാരണമായത്.

പ്രതിപക്ഷത്തിന്റെ പ്രതികരണം

മുഖ്യമന്ത്രിക്ക് നല്‍കിയ വിഐപി പാസ് എങ്ങനെയാണ് സ്വകാര്യ വ്യക്തിയുടെ കൈവശം എത്തിയതെന്ന് വ്യക്തമാക്കണമെന്നും, സംഭവത്തില്‍ സുതാര്യത വരുത്തണമെന്നും പ്രതിപക്ഷമായ ഭാരതീയ രാഷ്ട്രസമിതി ആവശ്യപ്പെട്ടു.