ലണ്ടന്‍: ഇംഗ്ലണ്ടിലും വെയില്‍സിലും ഒരു വര്‍ഷത്തിനിടെ രേഖപ്പെടുത്തിയ കുറ്റകൃത്യങ്ങളുടെ എണ്ണം ആദ്യമായി 70 ലക്ഷം കടന്നു. ജൂണില്‍ അവസാനിച്ച ഒരു വര്‍ഷത്തെ കണക്കനുസരിച്ച് 70,84,375 കുറ്റകൃത്യങ്ങളാണ് രേഖപ്പെടുത്തിയത്. മുന്‍വര്‍ഷത്തെ അപേക്ഷിച്ച് എട്ടുശതമാനമാണ് വര്‍ധനയെന്ന് ഓഫീസ് ഫോര്‍ നാഷണല്‍ സ്റ്റാറ്റിസ്റ്റിക്സിന്റെ (ഒഎന്‍എസ്) കണക്കുകള്‍ വ്യക്തമാക്കുന്നു. നൂറ്റാണ്ടിന്റെ തുടക്കത്തില്‍ നിലവിലെ രീതിയില്‍ കുറ്റകൃത്യങ്ങളുടെ കണക്കെടുപ്പ് ആരംഭിച്ചതിനുശേഷം ആദ്യമായാണ് എണ്ണം ഈ നിലയിലെത്തുന്നത്. തട്ടിപ്പ് കേസുകളിലെ വര്‍ധനയാണ് മൊത്തം കണക്കിലെ ഉയര്‍ച്ചയ്ക്ക് പ്രധാന കാരണമായത്. രേഖപ്പെടുത്തിയ തട്ടിപ്പ് കേസുകള്‍ 41 ശതമാനം വര്‍ധിച്ച് ഏകദേശം 18 ലക്ഷമായി. സൈബര്‍ കുറ്റകൃത്യങ്ങളും തട്ടിപ്പുകളും പൊതുജനങ്ങള്‍ക്ക് നേരിട്ട് അറിയിക്കാനുള്ള 'റിപ്പോര്‍ട്ട് ഫ്രോഡ്' സേവനം ആരംഭിച്ചത് കൂടുതല്‍ പരാതികള്‍ രേഖപ്പെടുത്താന്‍ വഴിയൊരുക്കിയിരിക്കാമെന്നാണ് വിലയിരുത്തല്‍.

ബാങ്കിങ്, ധനകാര്യ സേവന മേഖലയിലെ സംഘടനയായ യുകെ ഫിനാന്‍സിന് റിപ്പോര്‍ട്ട് ചെയ്ത തട്ടിപ്പ് കേസുകളിലും കുത്തനെ വര്‍ധനയുണ്ടായി. കേസുകളുടെ എണ്ണം 79 ശതമാനം ഉയര്‍ന്ന് 10.2 ലക്ഷത്തിലെത്തി. അതേസമയം, പോലീസിന് റിപ്പോര്‍ട്ട് ചെയ്യപ്പെടാത്ത സംഭവങ്ങള്‍കൂടി ഉള്‍പ്പെടുത്തി തയ്യാറാക്കുന്ന ക്രൈം സര്‍വേ ഓഫ് ഇംഗ്ലണ്ട് ആന്‍ഡ് വെയില്‍സ്, തട്ടിപ്പുകളുടെ വ്യാപ്തി ഇതിലും കൂടുതലാണെന്ന് സൂചിപ്പിക്കുന്നു. സര്‍വേയുടെ കണക്കനുസരിച്ച് ഏകദേശം 45 ലക്ഷം തട്ടിപ്പ് സംഭവങ്ങളുണ്ടായി. ബാങ്ക്, ക്രെഡിറ്റ് അക്കൗണ്ടുകളുമായി ബന്ധപ്പെട്ട തട്ടിപ്പുകളില്‍ 13 ശതമാനം വര്‍ധനയും കണ്ടെത്തി. ഓണ്‍ലൈന്‍ തട്ടിപ്പുകള്‍ വര്‍ധിക്കുമ്പോഴും മറ്റ് കുറ്റകൃത്യങ്ങളുടെ എണ്ണത്തില്‍ കുറവുണ്ടായതായി കണക്കുകള്‍ സൂചിപ്പിക്കുന്നു. തട്ടിപ്പ് കേസുകള്‍ ഒഴികെ പോലീസ് രേഖപ്പെടുത്തിയ കുറ്റകൃത്യങ്ങള്‍ ഏകദേശം 52 ലക്ഷമാണ്. കൂടുതല്‍ പരാതികള്‍ റിപ്പോര്‍ട്ട് ചെയ്യപ്പെടുന്നതും കണക്കുകളെ സ്വാധീനിക്കുന്നതിനാല്‍, രേഖപ്പെടുത്തിയ കേസുകളിലെ വര്‍ധനയെ കുറ്റകൃത്യങ്ങളുടെ യഥാര്‍ഥ വ്യാപ്തിയിലെ വര്‍ധനയായി മാത്രം കാണാനാവില്ല.