ലണ്ടന്‍: ബ്രിട്ടനില്‍ ഈ സീസണിലെ ആദ്യ നാമകരണം ചെയ്ത കൊടുങ്കാറ്റായ 'ഓസ്റ്റിന്‍' വീശിയടിക്കുമെന്ന മുന്നറിയിപ്പിനെത്തുടര്‍ന്ന് വിവിധ മേഖലകളില്‍ ജാഗ്രതാനിര്‍ദേശം. ശക്തമായ കാറ്റിനും മഴയ്ക്കും സാധ്യതയുള്ളതിനാല്‍ തെക്കുപടിഞ്ഞാറന്‍ ഇംഗ്ലണ്ടിന്റെ ചില ഭാഗങ്ങളില്‍ അംബര്‍ അലര്‍ട്ട് പ്രഖ്യാപിച്ചു. മണിക്കൂറില്‍ 80 മൈല്‍ വരെ, ഏകദേശം 129 കിലോമീറ്റര്‍ വേഗത്തില്‍, കാറ്റ് വീശാന്‍ സാധ്യതയുണ്ടെന്നാണ് മെറ്റ് ഓഫീസിന്റെ മുന്നറിയിപ്പ്. കോണ്‍വാള്‍, ഐല്‍സ് ഓഫ് സില്ലി, ഡെവണ്‍ എന്നിവിടങ്ങളിലാണ് അംബര്‍ മുന്നറിയിപ്പ് നല്‍കിയിരിക്കുന്നത്. രാവിലെ പത്തുമണി വരെ മുന്നറിയിപ്പ് തുടരും. ശക്തമായ കാറ്റ് റോഡ് ഗതാഗതത്തെയും പൊതുഗതാഗത സേവനങ്ങളെയും ബാധിച്ചേക്കും. കെട്ടിടങ്ങള്‍ക്ക് കേടുപാടുകള്‍ സംഭവിക്കാനും കാറ്റില്‍ വസ്തുക്കള്‍ പറന്നുവന്ന് അപകടമുണ്ടാകാനും സാധ്യതയുണ്ടെന്ന് അധികൃതര്‍ അറിയിച്ചു.
ഇംഗ്ലണ്ടിലെയും വെയില്‍സിലെയും വിവിധ പ്രദേശങ്ങളില്‍ രാവിലെ പത്തുമുതല്‍ രാത്രി ഒന്‍പതുവരെ യെല്ലോ അലര്‍ട്ടും പ്രഖ്യാപിച്ചിട്ടുണ്ട്. ഈ മേഖലകളില്‍ മണിക്കൂറില്‍ 45 മുതല്‍ 55 മൈല്‍ വരെ, ഏകദേശം 72-89 കിലോമീറ്റര്‍ വേഗത്തില്‍, കാറ്റ് വീശുമെന്നാണ് പ്രവചനം. വെയില്‍സിന്റെയും തെക്കുപടിഞ്ഞാറന്‍ ഇംഗ്ലണ്ടിന്റെയും തീരങ്ങളില്‍ വലിയ തിരമാലകളും അപകടകരമായ കടല്‍സാഹചര്യങ്ങളും പ്രതീക്ഷിക്കുന്നതായി മെറ്റ് ഓഫീസ് അറിയിച്ചു. പാറക്കെട്ടുകളുടെ അരികില്‍നിന്നും തിരമാലകള്‍ ശക്തമായി ആഞ്ഞടിക്കുന്ന കടല്‍ത്തീരങ്ങളില്‍നിന്നും ജനങ്ങള്‍ അകന്നുനില്‍ക്കണമെന്ന് അധികൃതര്‍ അഭ്യര്‍ഥിച്ചു.
