ലണ്ടന്/മാഞ്ചസ്റ്റര്: യുകെയിലെ മാഞ്ചസ്റ്ററില് ജൂണ് ആറിന് മരിച്ച നിലയില് കണ്ടെത്തിയ മലയാളിയുടെ മൃതദേഹം വ്യാഴാഴ്ച നാട്ടില് എത്തിക്കും. എറണാകുളം ജില്ലയിലെ പിറവം പാമ്പാക്കുട സ്വദേശിയായ പി.ടി. ദീപുവിന്റെ (47) മൃതദേഹമാണ് വ്യാഴാഴ്ച രാവിലെ 8.55 ന് നെടുമ്പാശ്ശേരി വിമാനത്താവളത്തില് എത്തിക്കുക. തുടര് നടപടികള് പൂര്ത്തിയാക്കിയ ശേഷം ഉച്ചയ്ക്ക് ഒരു മണിയോടെ മൃതദേഹം പാമ്പാക്കുട മേമ്മുറി പുലിക്കുന്നുമലയിലെ കുടുംബ വീട്ടില് എത്തിക്കും. അന്ന് തന്നെ മൃതദേഹം സംസ്കരിക്കുമെന്ന് കുടുംബാംഗങ്ങള് അറിയിച്ചു. ദീപു ആത്മഹത്യ ചെയ്തതാണെന്ന് പൊലീസ് അറിയിച്ചിട്ടുണ്ട്. നടപടിക്രമങ്ങള് പൂര്ത്തിയാക്കിയ ശേഷം ഇന്ന് രാവിലെ ഒന്പതിനാണ് മാഞ്ചസ്റ്ററില് നിന്നും ദുബായ് വഴിയുള്ള കണക്ഷന് ഫ്ളൈറ്റില് മൃതദേഹം നാട്ടിലേക്ക് എത്തിക്കുക. യുകെയിലെയും മാഞ്ചസ്റ്ററിലെയും മലയാളി സമൂഹത്തിന്റെയും പിന്തുണയോടെ യുക്മയാണ് മൃതദേഹം നാട്ടില് എത്തിക്കുവാന് മുന്കൈ എടുത്തത്.
2023 ല് യുകെയില് സ്വകാര്യ കെയര് ഹോമില് ഷെഫായി ജോലി ലഭിച്ച് എത്തിയ ദീപു വിവിധ ഇടങ്ങളിലെ ജോലികള്ക്ക് ശേഷം മാഞ്ചസ്റ്ററിലെ സ്വകാര്യ റസ്റ്ററന്റില് ഷെഫായി ജോലി ചെയ്തു വരികയായിരുന്നു. ചിക്കന് പോക്സ് ബാധിച്ചതിനെ തുടര്ന്നുള്ള അവധിയിക്ക് ജൂണ് ആറിന് രാവിലെ ജോലിക്ക് എത്താതിനെ തുടര്ന്ന് റസ്റ്ററന്റ് ജീവനക്കാരന് താമസ സ്ഥലത്ത് അന്വേഷിച്ചു എത്തിയപ്പോഴാണ് മരിച്ച നിലയില് കണ്ടെത്തിയത്. വീടിന്റെ വാതില് അകത്തു നിന്നും പൂട്ടിയ നിലയിലായിരുന്നു. തുടര്ന്ന് വാതിലിന്റെ മെയില് ബോക്സ് പഴുതിലൂടെ അകത്തേയ്ക്ക് നോക്കുമ്പോള് സ്റ്റെയര് കേസിന് സമീപമായി ദീപുവിന്റെ കാലുകള് കാണുകയായിരുന്നു. കുഴഞ്ഞു വീണതാകാമെന്ന നിഗമനത്തില് ഉടന് തന്നെ പാരാമെഡിക്സ് സംഘത്തെ വിവരം അറിയിച്ചു. പാരാമെഡിക്സ് സംഘം, അഗ്നിശമന സേന, പൊലീസ് എന്നിവയുടെ സഹായത്തോടെ അകത്തേക്ക് കടക്കുമ്പോഴാണ് സ്റ്റെയര് കെയ്സില് തൂങ്ങിമരിച്ച നിലയില് കാണപ്പെട്ടത്. ചിക്കന് പോക്സ് ആയിരുന്നതിനാല് ദീപുവിന് ഒപ്പം താമസിച്ചിരുന്ന മലയാളി യുവാവ് വീട്ടില് നിന്നും താല്കാലികമായി താമസം മാറ്റിയിരുന്നു.
നാട്ടില് വിവിധ റസ്റ്ററന്റുകളില് മികച്ച ഒരു ഷെഫായി ജോലി ചെയ്തിരുന്ന ദീപു സുഹൃത്തുക്കളുടെ സഹായത്തോടെയാണ് വീസ നടപടിക്രമങ്ങള്ക്ക് വേണ്ടിയുള്ള തുക മാത്രം മുടക്കി യുകെയില് എത്തുന്നതെന്ന് മാഞ്ചസ്റ്ററിലെ സുഹൃത്തുക്കള് പറഞ്ഞിരുന്നു. ഭാര്യ: നിഷ ദീപു. മക്കള്: കൃഷ്ണപ്രിയ, വിഷ്ണുദത്തന്, സേതുലക്ഷ്മി. പിറവം പാമ്പാക്കുട മേമ്മുറി പുലിക്കുന്നുമലയില് പരേതരായ പി. എ. തങ്കപ്പന്, വി.എസ്. ശാരദ എന്നിവരാണ് മാതാപിതാക്കള്. പി.ടി. അനൂപ് ഏക സഹോദരനാണ്. ആറു മാസം മുന്പ് അമ്മ മരിച്ചപ്പോഴാണ് ദീപു അവസാനമായി നാട്ടില് എത്തിയ ശേഷം മടങ്ങി പോകുന്നത്. ദീപുവിന്റെ സ്വദേശം പാമ്പാക്കുടയാണെങ്കിലും ഭാര്യ വീട് സ്ഥിതി ചെയ്യുന്ന പുത്തന്കുരിശ് ചൂണ്ടിയിലാണ് ദീപു നാട്ടില് താമസിച്ചിരുന്നത്. നാട്ടിലുള്ള ബന്ധുക്കള് ദീപുവിന്റെ മൃതദേഹം നാട്ടില് എത്തിക്കുന്നതിനുള്ള ക്രമീകരണങ്ങള് നടത്തുവാന് സഹായിക്കണമെന്ന് യുകെയിലെ മലയാളി സമൂഹത്തോട് അവശ്യപ്പെട്ടിരുന്നു.
