ലണ്ടന്‍: ലണ്ടനിലെ തെരുവുകളില്‍ കാണുന്ന പാന്‍ കറകള്‍ വലിയ വിവാദത്തിന് തിരികൊളുത്തിയിരിക്കുകയാണ്. ഈ വൃത്തികേടിന് കുടിയേറ്റ സമൂഹങ്ങളെയാണ് ചിലര്‍ കുറ്റപ്പെടുത്തുന്നത്. ലണ്ടനിലെ ചവറ്റുകുട്ടകളിലും റോഡുകളിലും കാണുന്ന ചുവന്ന കറകളുടെ വീഡിയോ ഓണ്‍ലൈനില്‍ വൈറലായിട്ടുണ്ട്. റെയ്നേഴ്സ് ലെയ്ന്‍, നോര്‍ത്ത് ഹാരോ എന്നിവിടങ്ങളിലാണ് ഈ കറകള്‍ കൂടുതലായി കാണപ്പെടുന്നതെന്ന് ഹാരോ ഓണ്‍ലൈന്‍ റിപ്പോര്‍ട്ട് ചെയ്യുന്നു. ഗുഡ്കയും വെറ്റില മുറുക്കാനുള്ള ഉല്‍പ്പന്നങ്ങളും വില്‍ക്കുന്ന കടകള്‍ക്കും ടേക്ക്അവേ റെസ്റ്റോറന്റുകള്‍ക്കും പുറത്ത് ഈ കറകള്‍ സാധാരണമായി മാറിയെന്ന് റെയ്നേഴ്സ് ലെയ്ന്‍ നിവാസികള്‍ പറയുന്നു.

ഇന്ത്യയിലും മറ്റ് ഉപഭൂഖണ്ഡ രാജ്യങ്ങളിലും വ്യാപകമായി ഉപയോഗിക്കുന്ന ഒരുതരം പുകയില ഉല്‍പ്പന്നമാണ് ഗുഡ്ക. അടയ്ക്ക (സുപാരി എന്നും അറിയപ്പെടുന്നു), പുകയില, മധുരപലഹാരങ്ങള്‍, മറ്റ് അഡിറ്റീവുകള്‍ എന്നിവ സാധാരണയായി അടങ്ങിയ വാണിജ്യപരമായി നിര്‍മ്മിക്കുന്ന ഒരു മിശ്രിതമാണിത്. സാധാരണയായി ചെറിയ പായ്ക്കറ്റുകളില്‍ ലഭിക്കുന്ന ഗുഡ്ക വായിലിട്ട് ചവയ്ക്കുമ്പോള്‍ നേരിയ ഉത്തേജക ഫലം ഉത്പാദിപ്പിക്കുന്നു. ചവച്ച പാന്‍ അല്ലെങ്കില്‍ ഗുഡ്ക തുപ്പിയതിന്റെ ഫലമായുണ്ടാകുന്ന ചുവപ്പ് കലര്‍ന്ന തവിട്ടുനിറത്തിലുള്ള പാടുകളാണ് പാന്‍ കറകള്‍. പൊതുസ്ഥലങ്ങളിലെ ചുമരുകളിലും കോണിപ്പടികളിലും നടപ്പാതകളിലും കെട്ടിടങ്ങളിലും ഈ കറകള്‍ പലപ്പോഴും കാണപ്പെടാറുണ്ട്, പ്രത്യേകിച്ച് ഗുഡ്കയ്ക്ക് പ്രചാരമുള്ള ഇന്ത്യയില്‍.

ഇന്ത്യയില്‍ ഗുഡ്കയ്ക്കുള്ള പ്രചാരവും ലണ്ടനില്‍ വലിയ ഇന്ത്യന്‍ കുടിയേറ്റ സമൂഹം ഉള്ളതും ഈ പാന്‍ കറകള്‍ക്ക് ഇന്ത്യക്കാരാണ് ഉത്തരവാദികളെന്ന് പലരും അനുമാനിക്കാന്‍ ഇടയാക്കി. 'ഇന്ത്യക്കാര്‍ അവരുടെ കാര്യം ചെയ്യുന്നു,' എന്നാണ് ഒരു ഇന്‍സ്റ്റഗ്രാം യൂസര്‍ കുറ്റപ്പെടുത്തിയിട്ടുള്ളത്. വിസ നല്‍കുമ്പോള്‍ പല്ല് പരിശോധിക്കാന്‍ തുടങ്ങണമെന്ന് മറ്റൊരാള്‍ നിര്‍ദ്ദേശിച്ചു. യുകെയില്‍ പാന്‍ ഉല്‍പ്പന്നങ്ങളുടെ വില്‍പ്പന നിരോധിക്കുന്ന നിയമങ്ങളൊന്നും നിലവിലില്ല. എന്നാല്‍, ചില്ലറ വ്യാപാരികള്‍ എച്ച്എംആര്‍സിയില്‍ (His Majesty's Revenue and Customs) രജിസ്റ്റര്‍ ചെയ്യുകയും സംഭരണത്തെയും വില്‍പ്പനയെയും സംബന്ധിച്ച കര്‍ശനമായ നിയന്ത്രണങ്ങള്‍ പാലിക്കുകയും വേണം.