ഏതാണ്ടൊരു ദശകത്തിന് മുകളിലായി വിവാഹ പൂര്വ്വ ഫോട്ടോ ഷൂട്ടുകള് വളരെ നാടകീയമായ ദൃശ്യങ്ങളാണ് പകര്ത്തുന്നത്. പാരമ്പര്യ - പാരമ്പ്യരേതര - സിനിമാറ്റിക്... വിഷയം എന്തുമാകട്ടെ അല്പം നാടകീയത ഇല്ലെങ്കില് പ്രീ വെഡ്ഡിംഗ് ഫോട്ടോഷൂട്ടിന് എന്തോ ഒരു കുറവുള്ളത് പോലെയാണ് തോന്നുക. എന്നാല്, കഴിഞ്ഞ ദിവസം സമൂഹ മാധ്യമങ്ങളില് വൈറലായ ഒരു പ്രീ വെഡ്ഡിംഗ് ഫോട്ടോഷൂട്ട് ആളുകളെ അക്ഷരാര്ത്ഥത്തില് ഞെട്ടിച്ചു. പ്രതിശ്രുത വരനും വധുവും ശവങ്ങളെ പോലെ വെള്ളത്തില് പൊന്തിക്കിടന്നുള്ള ഒരു മിസ്റ്റിക് പശ്ചാത്തലത്തിലുള്ള ഫോട്ടോഷൂട്ടായിരുന്നു അത്.
വിവാഹത്തോട് അനുബന്ധിച്ചുള്ള ഫോട്ടോഷൂട്ടുകള്ക്ക് സുന്ദരമായ പ്രകൃതി ദൃശ്യങ്ങളെ പകര്ത്തുന്ന കാലം കഴിഞ്ഞെന്ന് തെളിയിക്കുന്ന ഒരു പ്രീ വെഡ്ഡിംഗ് ഫോട്ടോഷൂട്ട്. നിശചലമായ ഒരു തടാകത്തില് പൊന്തിവന്ന രണ്ട് ശവങ്ങള് പോലെ പ്രതിശ്രുത വരനും വധുവും പൊന്തിക്കിടക്കുന്നു. ഇരുവരും ധരിച്ചിരിക്കുന്നത് വെള്ളനിറത്തിലുള്ള വിവാഹ വസ്ത്രങ്ങള്. ഫോട്ടോഷൂട്ടിന് തയ്യാറെടുക്കുന്ന ഫോട്ടോഗ്രാഫറുടെ നിര്ദ്ദേശാനുസരണം അസിസ്റ്റന്റ് 'ശവങ്ങളുടെ' വസ്ത്രങ്ങള് ഒറിജിനലായി ഫീല് ചെയ്യാനായി അത് കൃത്യമായി ക്രീകരിക്കുന്നത് വീഡിയോയല് കാണാം. ഈ സമയമത്രയും വരനും വധുവും ശവങ്ങളെ പോലെ കണ്ണുകള് അടച്ച്, അനങ്ങാതെ വെള്ളത്തില് പൊന്തിക്കിടക്കുന്നതും കാണാം.
പ്രി വെഡ്ഡിംഗ് ഫോട്ടോ ഷൂട്ടിന്റെ ദൃശ്യങ്ങള് വളരെ പെട്ടെന്ന് തന്നെ സമൂഹ മാധ്യമങ്ങളില് വൈറലായി. ജീവിതത്തിലെ ഏറ്റവും മനോഹരമായ നിമിഷങ്ങളെ ഇങ്ങനെയൊരു കുറ്റകൃത്യ നിമിഷത്തിലേക്ക് ചിത്രീകരിക്കാന് തീരുമാനിച്ച വരന്റെയും വധുവിന്റെയും മനോവിചാരങ്ങളെ കാഴ്ചക്കാര് തമാശയാക്കി. പലരും നവദമ്പതികളുടെ വ്യക്തിത്വവുമായി പ്രീ വെഡ്ഡിംഗ് ഫോട്ടോഷൂട്ടിന് ബന്ധമുണ്ടോയെന്ന് സംശയം പ്രകടിപ്പിച്ചു. മറ്റ് ചിലരുടെ ചോദ്യം സമൂഹ മാധ്യമങ്ങളില് വൈറലാവാനുള്ള ആഗ്രഹം മാത്രമായിരുന്നോ എന്നായിരുന്നു. ചില കാഴ്ചക്കാര് ഫോട്ടോഗ്രാഫറുടെ ആത്മാര്ത്ഥമായ സമര്പ്പണത്തെ പ്രശംസിച്ചു. വീഡിയോ വൈറലായെങ്കിലും ഒരു പ്രീ വെഡ്ഡിംഗ് ഫോട്ടോഷൂട്ടിന് ഇത്തരമൊരു വിഷയം തെരഞ്ഞെടുത്ത നവദമ്പതിമാരെ മിക്ക കാഴ്ചക്കാരും വിമര്ശിച്ചു. പലരും ആദ്യത്തെ കാഴ്ചയില് തികച്ചും തെറ്റിദ്ധരിപ്പിക്കപ്പെടുന്ന ഒരു ചിത്രീകരണമാണെന്ന് ചൂണ്ടിക്കാട്ടി. പുതിയ കാലത്തിന് പറ്റിയ പ്രീവെഡ്ഡിംഗ് ഫോട്ടോഷൂട്ടെന്ന കുറിപ്പിന് നിരവധി പേര് യോജിച്ചു.
