സാന്‍ ഫ്രാന്‍സിസ്‌കോ: ആര്‍ട്ടിഫിഷ്യല്‍ ഇന്റലിജന്‍സ് രംഗത്തെ പ്രമുഖ കമ്പനിയായ ആന്ത്രോപിക് എക്‌സിക്യൂട്ടീവ് കമ്മ്യൂണിക്കേഷന്‍സ് റൈറ്ററെ നിയമിക്കുന്നു. സാന്‍ ഫ്രാന്‍സിസ്‌കോയില്‍ മുഴുവന്‍ സമയമായി പ്രവര്‍ത്തിക്കേണ്ട തസ്തികയ്ക്ക് 2.78 കോടി മുതല്‍ 3.25 കോടി രൂപവരെയാണ് വാഗ്ദാനം ചെയ്യുന്ന വാര്‍ഷിക ശമ്പളം. ഉയര്‍ന്നതലത്തിലുള്ള ആശയവിനിമയ മേഖലയില്‍ കുറഞ്ഞത് എട്ടുവര്‍ഷത്തെ പ്രവൃത്തിപരിചയമുള്ളവരെയാണ് പരിഗണിക്കുന്നത്. കമ്പനിയുടെ ഉന്നത ഉദ്യോഗസ്ഥര്‍ക്കായി പ്രസംഗങ്ങളും ലേഖനങ്ങളും മറ്റ് ഉള്ളടക്കങ്ങളും തയ്യാറാക്കുക, എഡിറ്റ് ചെയ്യുക, പുതിയ ആശയങ്ങള്‍ രൂപപ്പെടുത്തുക എന്നിവയാണ് പ്രധാന ചുമതലകള്‍. എക്‌സിക്യൂട്ടീവ് കമ്മ്യൂണിക്കേഷന്‍സ് വിഭാഗം മേധാവിയുമായും മുതിര്‍ന്ന നേതാക്കളുമായും ചേര്‍ന്നായിരിക്കും പ്രവര്‍ത്തനം.
സങ്കീര്‍ണമായ സാങ്കേതികാശയങ്ങള്‍ വേഗത്തില്‍ മനസ്സിലാക്കി വ്യക്തമായും ഫലപ്രദമായും അവതരിപ്പിക്കാന്‍ ഉദ്യോഗാര്‍ഥിക്ക് കഴിയണം. എഐ ഗവേഷണത്തിലെ കമ്പനിയുടെ പ്രവര്‍ത്തനങ്ങള്‍, വാണിജ്യരംഗത്തെ മുന്നേറ്റം, പൊതുനന്മയോടുള്ള പ്രതിബദ്ധത എന്നിവ വിവിധ വിഭാഗങ്ങളിലുള്ള പ്രേക്ഷകരിലേക്ക് എത്തിക്കുകയാണ് ജോലിയുടെ പ്രധാന ലക്ഷ്യങ്ങളിലൊന്ന്. പ്രധാന പരിപാടികള്‍ക്കായി ഉന്നത ഉദ്യോഗസ്ഥരെ സജ്ജരാക്കുക, പരിപാടിവേദികളില്‍ ആശയവിനിമയ പ്രവര്‍ത്തനങ്ങള്‍ക്ക് പിന്തുണ നല്‍കുക, അടിയന്തര വാര്‍ത്താസാഹചര്യങ്ങളില്‍ കമ്പനിയുടെ പ്രതികരണം ഏകോപിപ്പിക്കുക എന്നിവയും ചുമതലകളില്‍ ഉള്‍പ്പെടുന്നു. സാങ്കേതിക വിഷയങ്ങളില്‍ ആഴത്തിലുള്ള അറിവുള്ള വിദഗ്ധര്‍ക്കായി ഉള്ളടക്കം തയ്യാറാക്കാനുള്ള കഴിവും ആവശ്യമാണ്.
മികച്ച എഴുത്തിനും ആശയവിനിമയശേഷിക്കും പുറമേ, സമ്മര്‍ദമുള്ള സാഹചര്യങ്ങളില്‍ സംയമനത്തോടെ പ്രവര്‍ത്തിക്കാനും വ്യക്തതയില്ലാത്ത ഘട്ടങ്ങളില്‍ വിവേകപൂര്‍വം തീരുമാനമെടുക്കാനും കഴിയണമെന്നും ലിങ്ക്ഡ്ഇനില്‍ പ്രസിദ്ധീകരിച്ച തൊഴില്‍വിവരത്തില്‍ വ്യക്തമാക്കുന്നു. വിസ സ്‌പോണ്‍സര്‍ഷിപ്പിനുള്ള പിന്തുണയും കമ്പനി വാഗ്ദാനം ചെയ്യുന്നുണ്ട്. എന്നാല്‍ എല്ലാ തസ്തികകള്‍ക്കും ഉദ്യോഗാര്‍ഥികള്‍ക്കും വിസ ഉറപ്പുനല്‍കാനാകില്ലെന്നും ജോലി വാഗ്ദാനം ലഭിക്കുന്നവര്‍ക്ക് വിസ നേടാന്‍ സാധ്യമായ ന്യായമായ ശ്രമങ്ങള്‍ നടത്തുമെന്നും അറിയിച്ചിട്ടുണ്ട്. പ്രസംഗങ്ങളും ലേഖനങ്ങളും നിമിഷങ്ങള്‍ക്കുള്ളില്‍ തയ്യാറാക്കാന്‍ എഐയ്ക്ക് കഴിയുന്ന കാലത്താണ്, മനുഷ്യരുടെ ആശയരൂപീകരണത്തിനും നിര്‍ണയശേഷിക്കും പ്രാധാന്യം നല്‍കുന്ന തസ്തികയിലേക്ക് ആന്ത്രോപിക് നിയമനം നടത്തുന്നത്.
