ബെംഗളൂരു: കാറില്‍ മറന്നുവെച്ച മൊബൈല്‍ ഫോണ്‍ തിരികെ നല്‍കാന്‍ റാപ്പിഡോ ഡ്രൈവര്‍ 4,000 രൂപ ആവശ്യപ്പെട്ടതായി യാത്രക്കാരുടെ പരാതി. മണിക്കൂറുകള്‍ നീണ്ട അനിശ്ചിതത്വത്തിനൊടുവില്‍ ചിക്കജാല പൊലീസ് ഇടപെട്ടതോടെയാണ് ഫോണ്‍ തിരികെ ലഭിച്ചത്. പൊലീസിന്റെ സഹായത്തെ പ്രശംസിച്ച് യാത്രക്കാരിലൊരാള്‍ സമൂഹമാധ്യമത്തില്‍ പങ്കുവെച്ച കുറിപ്പ് ശ്രദ്ധനേടുകയാണ്. ജോലി ആവശ്യത്തിനായി ബെംഗളൂരുവിലെത്തിയ സംഘം ഭക്ഷണം കഴിക്കാന്‍ യെലഹങ്കയിലേക്ക് പോകുന്നതിനാണ് റാപ്പിഡോ കാര്‍ വിളിച്ചത്. യാത്രയ്ക്കിടെ ഒരാള്‍ ഫോണ്‍ വാഹനത്തില്‍ മറന്നുവെക്കുകയായിരുന്നു. ലക്ഷ്യസ്ഥാനത്തെത്തിയശേഷം വിവരം മനസ്സിലാക്കി ഡ്രൈവറെ ബന്ധപ്പെട്ടപ്പോള്‍ ആദ്യം ഫോണ്‍ കൈവശമില്ലെന്ന് പറഞ്ഞതായും പിന്നീട് ഉണ്ടെന്ന് സമ്മതിച്ചതായും കുറിപ്പില്‍ പറയുന്നു. ഫോണ്‍ എത്തിച്ചുനല്‍കുന്നതിനുള്ള ന്യായമായ ചെലവ് വഹിക്കാമെന്ന് അറിയിച്ചെങ്കിലും ഡ്രൈവര്‍ സഹകരിച്ചില്ലെന്നാണ് ആരോപണം. മറ്റൊരു യാത്രയിലായതിനാല്‍ വരാനാകില്ലെന്ന് പറഞ്ഞതോടെ സ്വിഗ്ഗി ജെനി വഴി ഫോണ്‍ കൈമാറാമെന്ന നിര്‍ദേശം മുന്നോട്ടുവെച്ചു. എന്നാല്‍ അതും ഡ്രൈവര്‍ നിരസിച്ചതായി യാത്രക്കാര്‍ പറയുന്നു.

ഫോണ്‍ എത്തിച്ചുനല്‍കാന്‍ വന്നാല്‍ 4,000 രൂപയുടെ ഓട്ടം നഷ്ടമാകുമെന്ന് ചൂണ്ടിക്കാട്ടിയാണ് ഡ്രൈവര്‍ അത്രയും തുക ആവശ്യപ്പെട്ടതെന്നാണ് പരാതി. പിന്നീട് കുറഞ്ഞത് 3,000 രൂപയെങ്കിലും നല്‍കണമെന്ന നിലപാടെടുത്തതായും ഇവര്‍ ആരോപിച്ചു. ഉച്ചയ്ക്ക് ഒന്നോടെ തുടങ്ങിയ പ്രശ്‌നം വൈകിട്ട് നാലായിട്ടും പരിഹരിക്കപ്പെട്ടില്ല. അടുത്ത ദിവസം മാത്രമേ ഫോണ്‍ നല്‍കാനാകൂവെന്ന് ഡ്രൈവര്‍ അറിയിച്ചതോടെയാണ് യാത്രക്കാര്‍ ചിക്കജാല പൊലീസ് സ്റ്റേഷനിലെത്തിയത്. കന്നഡ അറിയാത്തതിന്റെ ആശങ്കയുണ്ടായിരുന്നെങ്കിലും ഉദ്യോഗസ്ഥരുടെ സൗഹൃദപരമായ സമീപനം ആശ്വാസമായെന്ന് യാത്രക്കാര്‍ പറഞ്ഞു. പൊലീസ് ഇടപെട്ടതിനു പിന്നാലെ ഡ്രൈവര്‍ വിളിച്ച് ഫോണ്‍ കൈമാറാന്‍ തയ്യാറായി. അനുഭവം പങ്കുവെച്ച കുറിപ്പിന് താഴെ നിരവധി പേര്‍ പൊലീസിന്റെ നടപടിയെ അഭിനന്ദിച്ചു.