മിനസോട്ട: അമേരിക്കയിലെ മിനസോട്ടയില്‍ ചോളപ്പാടത്തുനിന്ന് കണ്ടെത്തിയ കൂറ്റന്‍ ലോഹവസ്തു ബഹിരാകാശ അവശിഷ്ടമാണെന്ന് സ്റ്റീവന്‍സ് കൗണ്ടി ഷെരീഫ് ഓഫീസ്. ഏകദേശം 11 അടി വ്യാസമുള്ള വസ്തു സ്‌കോട്ട് ടൗണ്‍ഷിപ്പിലെ ഒരു കര്‍ഷകനാണ് കണ്ടെത്തിയത്. ഒക്ടോബര്‍ 14ന് ഉച്ചകഴിഞ്ഞ് മൂന്നരയോടെയാണ് വസ്തു കര്‍ഷകന്റെ ശ്രദ്ധയില്‍പ്പെട്ടത്. അതിനടിയില്‍ വളര്‍ന്നിരുന്ന ചോളച്ചെടികളുടെ വലിപ്പം കണക്കിലെടുക്കുമ്പോള്‍ ആഴ്ചകളായി ഇത് പാടത്ത് കിടന്നിരിക്കാമെന്നാണ് അദ്ദേഹത്തിന്റെ അനുമാനം.
വിവരമറിഞ്ഞെത്തിയ ഷെരീഫ് ഓഫീസ് ഉദ്യോഗസ്ഥര്‍ മിനസോട്ട ഡ്യൂട്ടി ഓഫീസറെ അറിയിച്ചതിനെത്തുടര്‍ന്ന് ഫെഡറല്‍ ഏജന്‍സികളും സ്ഥലത്തെത്തി. വസ്തുവില്‍ രേഖപ്പെടുത്തിയിട്ടുള്ള സീരിയല്‍ നമ്പറുകളുടെ സഹായത്തോടെ ഉടമസ്ഥരെ കണ്ടെത്താനുള്ള ശ്രമത്തിലാണ് അധികൃതര്‍. ഇത് പാടത്തുനിന്ന് നീക്കം ചെയ്യുന്നതിനുള്ള നടപടികളും പുരോഗമിക്കുകയാണ്. സംഭവം പൊതുജനങ്ങളുടെ സുരക്ഷയ്ക്ക് ഭീഷണിയുയര്‍ത്തുന്നില്ലെന്ന് അധികൃതര്‍ അറിയിച്ചു. വസ്തു ഏത് ബഹിരാകാശ ദൗത്യത്തിന്റെയോ ഉപകരണത്തിന്റെയോ ഭാഗമാണെന്ന് റിപ്പോര്‍ട്ടില്‍ വ്യക്തമാക്കിയിട്ടില്ല.
