ധനികരായ ഇന്ത്യന് മാതാപിതാക്കള് തങ്ങളുടെ വരുമാനം നല്കി മക്കളുടെ ഭാവി നശിപ്പിക്കുകയാണെന്ന് സോഷ്യല് മീഡിയ പോസ്റ്റ്. പ്രേം സോണി എന്ന സോഷ്യല് മീഡിയ യൂസറാണ്, ജെന് സി വിഭാഗത്തില് പെട്ടവര് അധ്വാനിക്കാന് ആഗ്രഹമില്ലാത്തവരായി മാറാന് കാരണം മാതാപിതാക്കളുടെ അമിതമായ സാമ്പത്തിക സുരക്ഷിതത്വമാണെന്ന വാദവുമായി രംഗത്തെത്തിയത്. വന് സാമ്പത്തികശേഷിയുള്ള ഇന്ത്യന് മാതാപിതാക്കള് പാസീവ് ഇന്കം പങ്കുവെച്ച് അവരുടെ ഭാവി തകര്ക്കുകയാണ്. കുടുംബത്തിന്റെ ഭാവി സുരക്ഷിതമാക്കുകയാണെന്നാണ് അവര് കരുതുന്നത്. എന്നാല്, യഥാര്ത്ഥത്തില്, അധ്വാനിക്കാന് യാതൊരു താല്പര്യവുമില്ലാത്ത, മടിയന്മാരായ ഒരു തലമുറയെയാണ് അവര് സൃഷ്ടിച്ചത്. പ്രമുഖ നഗരങ്ങളില് 25 വയസ്സുള്ള നിരവധി യുവാക്കള് ഈ സാമ്പത്തിക കുരുക്കില് അകപ്പെട്ടു കിടക്കുന്നത് കാണാം' പ്രേം സോണി കുറിച്ചു. മൂന്ന് തരം മാനസികാവസ്ഥകളാണ് ഈ യുവാക്കളെ തളര്ത്തുന്നതെന്ന് അദ്ദേഹം പോസ്റ്റില് ചൂണ്ടിക്കാണിക്കുന്നു:
അഭിമാനക്കെണി: കുടുംബത്തിന്റെ ഉയര്ന്ന സാമൂഹിക പദവിയെ ബാധിക്കുമെന്ന ഭയം കാരണം ചെറിയ ജോലികളോ സെയില്സ് പണികളോ ചെയ്യാന് ഇവര് മടിക്കുന്നു. ലൈഫ് സ്റ്റൈല് കെണി: തങ്ങള് നയിക്കുന്ന ഉയര്ന്ന ആഡംബര ജീവിതച്ചെലവുകള്ക്ക് തുടക്കക്കാരുടെ ശമ്പളം തികയാത്തതിനാല് ഇത്തരം ജോലികളോട് പൂര്ണ്ണ വിമുഖത കാണിക്കുന്നു.
അവകാശബോധത്തിന്റെ കുരുക്ക്: പരമ്പരാഗതമായി ചെയ്തുവരുന്ന കുടുംബ ബിസിനസുകള് ഏറ്റെടുക്കാന് ഇവര് തയ്യാറാകുന്നില്ല. 'പിന്നെ ഇവര് എന്താണ് ചെയ്യുന്നത്? ഒന്നും ചെയ്യുന്നില്ല. രാവിലെ 11 മണിക്ക് എഴുന്നേല്ക്കുന്നു. മാതാപിതാക്കള് ഉണ്ടാക്കിയ വരുമാനത്തില് സുഖമായി കഴിയുന്നു. മക്കള്ക്ക് സുഖകരമായ ജീവിതം നല്കാനുള്ള മാതാപിതാക്കളുടെ ആഗ്രഹം കുടുംബത്തിന്റെ ലക്ഷ്യബോധത്തെത്തന്നെ ഇല്ലാതാക്കി. 55-ാം വയസ്സിലും അച്ഛന് ദിവസം 10 മണിക്കൂര് അധ്വാനിക്കുമ്പോള്, 25-കാരനായ മകന് ജീവിതം ആസ്വദിക്കുകയാണ്' പോസ്റ്റില് പറയുന്നു. ഈ അഭിപ്രായപ്രകടനത്തിന് അനുകൂലമായും പ്രതികൂലമായും നിരവധിയാളുകളാണ് രംഗത്തെത്തിയത്. എല്ലാവരെയും ഒരുപോലെ അളക്കരുതെന്നും, ഈ തലമുറയ്ക്ക് ജോലിയെക്കുറിച്ചും ജീവിതത്തെക്കുറിച്ചും വേറിട്ട കാഴ്ചപ്പാടുകളാണുള്ളതെന്നും പ്രതികരിച്ചവരുമുണ്ട്. പരമ്പരാ?ഗതസമ്പത്ത് വേണം എന്നാല് അധ്വാനിച്ച് തന്നെ അത് നിലനിര്ത്തുകയും വേണമെന്ന് പറഞ്ഞവരും ഉണ്ട്.
