പൂനെ-മുംബൈ എക്സ്പ്രസ്വേയില് യാത്രാവേളയില് നമ്പര് പ്ലേറ്റ് അപ്രത്യക്ഷമാകുന്ന രീതിയില് പ്രത്യേക മെക്കാനിക്കല് സംവിധാനം ഘടിപ്പിച്ച ഫോര്ച്ച്യൂണ് കാറിനെതിരെ നടപടിയുമായി പിംപ്രി - ചിഞ്ച്വാഡ് ആര്ടിഒ. വാഹനത്തിനുള്ളില് സ്ഥാപിച്ചിട്ടുള്ള സ്വിച്ച് അമര്ത്തുമ്പോള് നിമിഷനേരം കൊണ്ട് നമ്പര് പ്ലേറ്റ് മുകളിലേക്ക് മടങ്ങിപ്പോകുന്ന ദൃശ്യങ്ങള് സമൂഹ മാധ്യമങ്ങളില് വ്യാപകമായി പ്രചരിച്ചതിനെത്തുടര്ന്നാണ് അധികൃതര് അന്വേഷണം ആരംഭിച്ചത്. തുടര്ന്ന് ആര്ടിഒയുടെ ഫ്ലയിംഗ് സ്ക്വാഡ് വാഹനം കണ്ടെത്തുകയും നമ്പര് പ്ലേറ്റില് ഘടിപ്പിച്ചിരുന്ന അനധികൃത ഉപകരണം അഴിച്ചുമാറ്റുകയും ചെയ്തെന്നും റിപ്പോര്ട്ടില് പറയുന്നു.
ട്രാഫിക് ഇ - ചെല്ലാനുകളില് നിന്നും സ്പീഡ് ക്യാമറകളില് നിന്നും രക്ഷപ്പെടാനാണ് ഇത്തരം ഒരു സംവിധാനം ഉപയോഗിച്ചതെന്ന് വാഹന ഉടമ സമ്മതിച്ചെന്നും റിപ്പോര്ട്ടുണ്ട്. എന്നാല്, ഗുരുതരമായ ഇത്തരമൊരു നിയമലംഘനത്തിന് വെറും 4,500 രൂപ മാത്രം പിഴ ഈടാക്കി കേസ് അവസാനിപ്പിച്ച മോട്ടോര് വാഹന വകുപ്പിന്റെ നടപടിയ്ക്കെതിരെ വ്യാപകമായ പ്രതിഷേധമാണ് ഉയരുന്നത്.
ഓടിക്കൊണ്ടിരിക്കുന്ന വാഹനത്തിന്റെ നമ്പര് പ്ലേറ്റ് ഇത്തരത്തില് മറയ്ക്കുന്നത് വന് സുരക്ഷാ ഭീഷണിയാണ് ഉയര്ത്തുന്നത്. എന്ഫോഴ്സ്മെന്റ് ഏജന്സികള്ക്കും സിസിടിവി ക്യാമറകള്ക്കും വാഹനം തിരിച്ചറിയാന് കഴിയാത്ത സാഹചര്യമുണ്ടാകുന്നത് ഗതാഗത നിയമപാലനത്തെ പൂര്ണ്ണമായും അട്ടിമറിക്കും. കൂടാതെ അപകടങ്ങള് വരുത്തിവെച്ച ശേഷമോ മറ്റ് ഗുരുതര കുറ്റകൃത്യങ്ങളില് ഏര്പ്പെട്ട ശേഷമോ തിരിച്ചറിയപ്പെടാതെ കടന്നുകളയാനും ഇത്തരം സാങ്കേതി വിദ്യകളുടെ സഹായത്തോടെ സാധിക്കും. ഇതും വലിയൊരു ആശങ്കയാണ് ഉയര്ത്തുന്നത്.
ഈ സംവിധാനം ഉപയോഗിച്ച് വാഹനം മുമ്പ് ഏതെങ്കിലും അപകടങ്ങളിലോ കുറ്റകൃത്യങ്ങളിലോ ഉള്പ്പെട്ടിട്ടുണ്ടോയെന്ന് പോലും പരിശോധിക്കാതെ ചൊറിയൊരു മോട്ടോര് വാഹന നിയമലംഘനം മാത്രമായി കണ്ട് പിഴയീടാക്കിയത് ശരിയായില്ലെന്ന് സമൂഹ മാധ്യമ ഉപയോക്താക്കള് ചൂണ്ടിക്കാണിക്കുന്നു. ആഡംബര കാറുകള്ക്ക് നല്കുന്ന ഇത്തരം ഇളവുകള് സാധാരണക്കാരായ വാഹന ഉടമകള്ക്ക് ലഭിക്കാറില്ലെന്നും, വിഷയത്തില് വിശദമായ പോലീസ് അന്വേഷണം വേണമെന്നും നിരവധി പേര് ആവശ്യപ്പെട്ടു. എന്നാല് ഇതിനോട് പ്രതികരിക്കാന് മഹാരാഷ്ട്രാ റോഡ്ട്രാന്സ്പോര്ട്ട് വകുപ്പ് തയ്യാറായിട്ടില്ല.
