മധ്യപ്രദേശിലെ ഛിന്ദ്വാര ജില്ലയില്‍ അങ്കണവാടി കേന്ദ്രത്തില്‍ നിന്നും ചിത്രീകരിച്ചതെന്ന് അവകാശപ്പെട്ട ഒരു വീഡിയോ സമൂഹ മാധ്യമങ്ങളില്‍ വൈറലായി. പിന്നാലെ അങ്കണവാടി ജീവനക്കാരുടെ പെരുമാറ്റത്തെക്കുറിച്ച് ചോദ്യങ്ങളുമായി സമൂഹ മാധ്യമ ഉപയോക്താക്കള്‍ രംഗത്ത്. പരാസിയയിലെ ചന്ദമേട്ട, ചാച്ചാ മൊഹല്ലയിലെ വാര്‍ഡ് 12 -ലെ അങ്കണവാടി കേന്ദ്രത്തിലാണ് സംഭവം നടന്നതെന്ന് റിപ്പോര്‍ട്ടുകള്‍ പറയുന്നു. വൈറലായ ദൃശ്യങ്ങളില്‍ അങ്കണവാടിയില്‍ സഹായിയായി ജോലി ചെയ്യുന്നുവെന്ന് പറയപ്പെടുന്ന സ്ത്രീ നിലത്ത് വിരിച്ച പായയില്‍ കിടക്കുന്നത് കാണാം. ഇവരുടെ കാലില്‍ കയറി നിന്ന് ഒരു പെണ്‍കുട്ടി തന്റെ കാലുപയോഗിച്ച് ചവിട്ടി മസാജ് ചെയ്യുന്നതും ദൃശ്യങ്ങളില്‍ കാണാം. എവിടെയാണ് അമര്‍ത്തി ചവിട്ടേണ്ടതെന്നും കാലുകള്‍ എവിടേക്ക് നീക്കണമെന്നും ജീവനക്കാരി കുട്ടിയോട് നിര്‍ദേശിക്കുന്നതും വീഡിയോയില്‍ കേള്‍ക്കാം. ദൃശ്യങ്ങള്‍ പുറത്തുവന്നതോടെ കുട്ടികളോട് വിദ്യാഭ്യാസ സ്ഥാപനങ്ങളിലെ ജീവനക്കാര്‍ എങ്ങനെ പെരുമാറണം എന്നതിനെക്കുറിച്ച് സമൂഹ മാധ്യമങ്ങളില്‍ വലിയ ചര്‍ച്ചയാണ് നടക്കുന്നത്. കുട്ടികളെ ഇത്തരം വ്യക്തിഗത സേവനങ്ങള്‍ക്ക് ഉപയോഗിക്കുന്നത് ഉചിതമാണോയെന്ന ചോദ്യവും ചിലര്‍ ഉയര്‍ത്തി. അതേ സമയം ഈ സംഭവത്തില്‍ ഇതുവരെയായും ഔദ്യോഗിക അന്വേഷണമോ വിശദീകരണോ പുറത്ത് വിട്ടിട്ടില്ലെന്നും റിപ്പോര്‍ട്ടുകള്‍ പറയുന്നു.
മധ്യപ്രദേശില്‍ കുട്ടികളെക്കൊണ്ട് അധ്യാപകരുടെയോ ജീവനക്കാരുടെയോ വ്യക്തിപരമായ ആവശ്യങ്ങള്‍ ചെയ്യിക്കുന്നതായി ആരോപണമുയരുന്ന സമാന സംഭവങ്ങള്‍ നേരത്തെയും പുറത്തുവന്നിരുന്നു. ഭോപ്പാലിലെ ഒരു സര്‍ക്കാര്‍ സ്‌കൂളില്‍ വിദ്യാര്‍ഥിനി അധ്യാപികയുടെ കാലില്‍ മസാജ് ചെയ്യുന്ന വീഡിയോയും അടുത്തിടെ വലിയ വിവാദമായിരുന്നു. എന്നാല്‍ ആ സംഭവത്തില്‍ അധ്യാപിക കാലിന് പരിക്കേറ്റതിനാല്‍ വേദന കുറയ്ക്കാന്‍ വിദ്യാര്‍ഥിനി സഹായിക്കുകയായിരുന്നുവെന്നാണ് പിന്നീട് വിശദീകരണം വന്നത്. മധ്യപ്രദേശിലെ ഛത്തര്‍പൂരില്‍ നിന്നും വൈറലായ ഒരു വീഡിയോയില്‍ സ്‌കൂള്‍ അധ്യാപകന് വിദ്യാര്‍ത്ഥിയെ മദ്യം വാങ്ങാന്‍ പറഞ്ഞയച്ചതായി ആരോപിക്കുന്നു. അധ്യാപകന് വേണ്ടി വാങ്ങിയ മദ്യം, കുട്ടി കീശയില്‍ നിന്നും ഉയര്‍ത്തി കാണിക്കുന്നതും വീഡിയോയില്‍ കാണാം. ഇതിന് പിന്നാലെ ഛിന്ദ്വാരയില്‍ നിന്നും പുറത്ത് വന്ന പുതിയ വീഡിയോ അങ്കണവാടി കേന്ദ്രങ്ങളിലെ കുട്ടികളുടെ സുരക്ഷയും, ജീവനക്കാരുടെ പെരുമാറ്റത്തെയും കുറിച്ച് വീണ്ടുമെരു ചര്‍ച്ചയ്ക്ക് വഴിവച്ചു.
