വാഷിങ്ടണ്‍: അമേരിക്കയില്‍ പ്രതിമാസം 8,000 ഡോളര്‍ വരുമാനമുണ്ടെങ്കിലും താന്‍ ഇപ്പോഴും മധ്യവര്‍ഗക്കാരിയാണെന്ന് പറയുന്ന ഇന്ത്യന്‍ യുവതിയുടെ വീഡിയോ ചര്‍ച്ചയാകുന്നു. മഹിമ രാഠിയാണ് നികുതി, ഭവനവായ്പ, ഇന്‍ഷുറന്‍സ്, ദൈനംദിന ചെലവുകള്‍ എന്നിവ കഴിഞ്ഞാല്‍ സമ്പാദ്യമായി ശേഷിക്കുന്ന തുക പരിമിതമാണെന്ന് വിശദീകരിച്ചത്. സഹോദരന്‍ നിതിന്‍ മല്‍ഹോത്രയാണ് വീഡിയോ ഇന്‍സ്റ്റഗ്രാമില്‍ പങ്കുവച്ചത്. മഹിമയുടെ കണക്കുപ്രകാരം പ്രതിമാസം 1,500 ഡോളര്‍ നികുതിക്കും 2,500 ഡോളര്‍ ഭവനവായ്പാ തിരിച്ചടവിനുമാണ് ചെലവാകുന്നത്. ഭക്ഷണത്തിന് 1,000 ഡോളറും ആരോഗ്യ ഇന്‍ഷുറന്‍സ്, വാഹനച്ചെലവ്, ഫോണ്‍-ഇന്റര്‍നെറ്റ് ഉള്‍പ്പെടെയുള്ള ബില്ലുകള്‍ എന്നിവയ്ക്ക് 500 ഡോളര്‍ വീതവും ആവശ്യമായി വരുന്നു.

കുട്ടികളുടെ ആവശ്യങ്ങള്‍ക്ക് 300 ഡോളറും മറ്റ് ചെലവുകള്‍ക്കായി 200 ഡോളറും മാറ്റിവയ്ക്കുന്നതോടെ ശേഷിക്കുന്നത് 1,000 ഡോളറാണ്. വ്യക്തിപരമായ ചെലവുകള്‍ ഇതില്‍ ഉള്‍പ്പെടുത്തിയിട്ടില്ലെന്നും മഹിമ വ്യക്തമാക്കി. ഇന്ത്യയില്‍ താമസിക്കുമ്പോള്‍ വാര്‍ഷിക വരുമാനം 15 ലക്ഷം രൂപയായിരുന്നെങ്കിലും അതില്‍നിന്ന് നല്ലൊരു വിഹിതം സമ്പാദിക്കാന്‍ കഴിഞ്ഞിരുന്നുവെന്നും അവര്‍ പറഞ്ഞു. വീഡിയോയ്ക്ക് പിന്നാലെ ഇന്ത്യയിലെയും അമേരിക്കയിലെയും ജീവിതച്ചെലവുകളും ജീവിതനിലവാരവും സംബന്ധിച്ച് വ്യത്യസ്ത പ്രതികരണങ്ങളുയര്‍ന്നു. ഉയര്‍ന്ന ശമ്പളം മാത്രം സാമ്പത്തിക ഭദ്രത ഉറപ്പാക്കില്ലെന്ന് ചിലര്‍ അഭിപ്രായപ്പെട്ടപ്പോള്‍, മെച്ചപ്പെട്ട അടിസ്ഥാനസൗകര്യങ്ങളും സ്വന്തമായി വീടും വാഹനവും ഉള്ളതിന്റെ നേട്ടങ്ങള്‍ മറ്റുചിലര്‍ ചൂണ്ടിക്കാട്ടി.