കലിഫോര്‍ണിയ: സമൂഹമാധ്യമങ്ങളില്‍ വീണ്ടും പ്രചരിക്കുന്ന 'ഡോര്‍ കിക്ക് ചലഞ്ചി'നെതിരെ മുന്നറിയിപ്പുമായി അമേരിക്കയിലെ ഇര്‍വിന്‍ പൊലീസ്. വീടുകളുടെ മുന്‍വാതിലില്‍ ശക്തമായി ചവിട്ടി ദൃശ്യങ്ങള്‍ പകര്‍ത്തിയശേഷം ഓടിമറയുന്ന പ്രവണത സ്വത്തിനുനാശവും ഗുരുതര അപകടങ്ങളും ഉണ്ടാക്കാമെന്ന് അധികൃതര്‍ വ്യക്തമാക്കി.
വാതിലുകള്‍ക്ക് കേടുപാടുണ്ടാകുന്നതിനു പുറമേ വീട്ടിലുള്ളവരെ ഭീതിയിലാഴ്ത്താനും ഇത്തരം പ്രവൃത്തികള്‍ കാരണമാകുമെന്ന് പൊലീസ് ചൂണ്ടിക്കാട്ടി. വീട്ടുകാരുമായുള്ള ഏറ്റുമുട്ടലിലേക്കും ഗുരുതര പരിക്കുകളിലേക്കും സാഹചര്യം നീങ്ങാം. പങ്കെടുക്കുന്നവര്‍ ക്രിമിനല്‍ നടപടികള്‍ നേരിടേണ്ടിവരുമെന്നും മുന്നറിയിപ്പുണ്ട്.
ഓണ്‍ലൈനില്‍ ഏതാനും ലൈക്കുകളോ ചിരിയോ നേടാനുള്ള ശ്രമത്തിന് യഥാര്‍ഥ ജീവിതത്തില്‍ വലിയ പ്രത്യാഘാതങ്ങളുണ്ടാകാമെന്നാണ് പൊലീസിന്റെ സന്ദേശം. ഇത്തരം സമൂഹമാധ്യമ പ്രവണതകളില്‍ കുട്ടികള്‍ പങ്കെടുക്കാതിരിക്കാന്‍ മാതാപിതാക്കള്‍ ശ്രദ്ധിക്കണമെന്നും ഇര്‍വിന്‍ പൊലീസ് മുന്നറിയിപ്പ് നല്‍കി.
