സ്വന്തമായി എടുത്ത വൈഫൈ കണക്ഷന്റെ പാസ്വേഡ് ആവശ്യപ്പെട്ട് നിരന്തരം ബുദ്ധിമുട്ടിക്കുന്ന വീട്ടുടമസ്ഥര്‍ക്കെതിരെ പോസ്റ്റുമായി യുവാവ്. റെഡ്ഡിറ്റിലൂടെയാണ് യുവാവ് തന്റെ അനുഭവം പങ്കുവെച്ചത്. പുതിയ വാടകവീട്ടിലേക്ക് താമസം മാറി ഏതാനും ദിവസങ്ങള്‍ക്കുള്ളിലാണ് യുവാവ് ഇന്റര്‍നെറ്റ് കണക്ഷന്‍ എടുത്തത്. വൈഫൈ കണക്ട് ചെയ്യാനായി ടെക്‌നീഷ്യന്മാര്‍ എത്തിയപ്പോള്‍ വീട്ടുടമസ്ഥന്‍ അവിടെ ഉണ്ടായിരുന്നു. വയറിംഗിനെക്കുറിച്ച് സംസാരിക്കാന്‍ വന്നതാണെന്ന് കരുതിയെങ്കിലും ടെക്‌നീഷ്യന്മാര്‍ മടങ്ങിയതോടെയാണ് കാര്യങ്ങള്‍ മാറിയത്. വാര്‍ത്തകളൊക്കെ കാണാന്‍ വേണ്ടി ഞങ്ങള്‍ക്ക് വൈഫൈ പാസ്വേഡ് തരുമോ? പകരം കറന്റ് ബില്ലില്‍ നിന്ന് 200 രൂപ കുറച്ചു തരാം അല്ലെങ്കില്‍ എല്ലാ മാസവും ആ തുക കയ്യില്‍ തരാം' എന്നായിരുന്നു ഉടമയുടെ ആവശ്യം. എന്നാല്‍, താന്‍ എടുത്തത് ചെറിയ പ്ലാന്‍ ആണെന്നും ജോലി ആവശ്യങ്ങള്‍ക്ക് പോലും ഇത് തികയില്ലെന്നും പറഞ്ഞ് യുവാവ് അപ്പോള്‍ത്തന്നെ ഒഴിയാന്‍ നോക്കി. എന്നാല്‍, തൊട്ടടുത്ത ദിവസം ടെറസില്‍ വെച്ച് കണ്ടുമുട്ടിയപ്പോള്‍ ഉടമസ്ഥനും ഭാര്യയും വീണ്ടും ഇതേ ആവശ്യവുമായി എത്തി. 'മാസം എത്രയാകും, ഏത് കണക്ഷനാണ്, ആരുടെ പേരിലാണ് എടുത്തത്' തുടങ്ങി നിരവധി ചോദ്യങ്ങളാണ് ഇരുവരും യുവാവിനോട് ഉന്നയിച്ചത്. രണ്ട് മണിക്കൂര്‍ ടിവി കാണാന്‍ മാത്രമാണ് പാസ്വേഡ് ചോദിക്കുന്നതെന്നും ഇവര്‍ ന്യായീകരിച്ചു.

നേരിട്ട് 'ഇല്ല' എന്ന് പറയാന്‍ മടിച്ച യുവാവ്, കണക്ഷനില്‍ ചില സാങ്കേതിക തടസ്സങ്ങളുണ്ടെന്ന് പറഞ്ഞ് തടിയൂരി. എന്നാല്‍, നേരിട്ട് നോ പറയാന്‍ കഴിയാത്തതില്‍ തനിക്ക് കുറ്റബോധം തോന്നുന്നുണ്ടെന്ന് യുവാവ് കുറിപ്പില്‍ പറയുന്നു. അതേസമയം, താന്‍ മാസം 600 രൂപ കൊടുത്ത് റീച്ചാര്‍ജ് ചെയ്യുന്നത് മറ്റുള്ളവര്‍ക്ക് ഉപയോഗിക്കാനല്ലല്ലോ എന്നും, ഇതില്‍ എന്താണ് ചെയ്യേണ്ടതെന്നും യുവാവ് ചോദിക്കുന്നു. യുവാവിന്റെ പോസ്റ്റ് വൈറലായതോടെ നിരവധിയാളുകളാണ് ഉപദേശങ്ങളുമായി എത്തിയത്. വൈഫൈ പ്ലാന്‍ അപ്‌ഗ്രേഡ് ചെയ്ത് പകുതി തുക ഉടമസ്ഥരില്‍ നിന്ന് ഈടാക്കാമെന്ന് ചിലര്‍ നിര്‍ദ്ദേശിച്ചപ്പോള്‍, വെറുപ്പിക്കാതെ 'പറ്റില്ല' എന്ന് നേരിട്ട് പറയണമെന്നാണ് മറ്റുള്ളവര്‍ അഭിപ്രായപ്പെട്ടത്. എന്നാല്‍, റൂട്ടറിന്റെ അഡ്മിന്‍ പാനലില്‍ കയറി വൈഫൈ നെറ്റ്വര്‍ക്ക് 'ഹൈഡ്' ചെയ്തു വെക്കാനാണ് വേറൊരു വിഭാഗം ആളുകള്‍ യുവാവിനെ ഉപദേശിച്ചത്.