ഇന്ത്യയിലെ ആരോഗ്യപരിപാലന രം?ഗത്തെ അതിവേഗ ലഭ്യതയും ചികിത്സാ സൗകര്യങ്ങളും കേട്ട് തന്റെ യൂറോപ്യന്‍ സഹപ്രവര്‍ത്തകര്‍ അമ്പരന്ന് പോയെന്ന ഇന്ത്യന്‍ ഡോക്ടറുടെ വെളിപ്പെടുത്തല്‍ വൈറല്‍. ഓങ്കോളജിസ്റ്റായ ഡോ. പാലക് ഭട്ട് ഇന്‍സ്റ്റാഗ്രാമില്‍ പങ്കുവെച്ച വീഡിയോയാണ് ഇപ്പോള്‍ സോഷ്യല്‍ മീഡിയയില്‍ വൈറലാകുന്നത്. യൂറോപ്പില്‍ നടന്ന പാലിയേറ്റീവ് കെയര്‍ സമ്മേളനത്തിനിടെ സഹപ്രവര്‍ത്തകരുമായി നടത്തിയ സൗഹൃദ സംഭാഷണത്തിനിടയിലാണ് ഡോക്ടര്‍ ഇന്ത്യന്‍ ആരോഗ്യ സംവിധാനത്തിന്റെ മികവ് ചൂണ്ടിക്കാണിച്ചത്. പാശ്ചാത്യ രാജ്യങ്ങളെ അപേക്ഷിച്ച് ഇന്ത്യയില്‍ രോഗികള്‍ക്ക് വളരെ വേഗത്തില്‍ സ്‌പെഷ്യലിസ്റ്റ് ഡോക്ടര്‍മാരെ കാണാനും രോഗനിര്‍ണ്ണയ പരിശോധനകള്‍ പൂര്‍ത്തിയാക്കി ചികിത്സ ആരംഭിക്കാനും സാധിക്കുന്നുണ്ടെന്ന വസ്തുത യൂറോപ്യന്‍ ഡോക്ടര്‍മാര്‍ക്ക് വിശ്വസിക്കാന്‍ പോലുമായില്ലെന്ന് അദ്ദേഹം വ്യക്തമാക്കുന്നു.
നാക്കില്‍ അള്‍സര്‍ ഉള്ള ഒരു രോഗിയുടെ ഉദാഹരണം ചൂണ്ടിക്കാട്ടിയാണ് ഡോ. ഭട്ട് കാര്യങ്ങള്‍ വിശദീകരിച്ചത്. 'ഇന്ത്യയില്‍ ഒരാള്‍ക്ക് നാക്കില്‍ അള്‍സറോ മറ്റോ വരികയും അത് ക്യാന്‍സര്‍ ആണോയെന്ന സംശയമുണ്ടാകുകയും ചെയ്താല്‍, അവര്‍ക്ക് അന്നുതന്നെ നേരിട്ട് ഒരു ഓങ്കോളജിസ്റ്റിനെ പോയി കാണാന്‍ സാധിക്കും. അന്നേ ദിവസം തന്നെ എം.ആര്‍.ഐ സ്‌കാനിംഗും ബയോപ്‌സിയും ചെയ്യാന്‍ കഴിയും. മൂന്നോ നാലോ ദിവസത്തിനകം ഇതിന്റെ ഫലം വരികയും, ശസ്ത്രക്രിയയോ കീമോതെറാപ്പിയോ ഏതാണോ വേണ്ടത്, ആ ചികിത്സ ഒറ്റ ആഴ്ചയ്ക്കുള്ളില്‍ തന്നെ ആരംഭിക്കുകയും ചെയ്യാം. എന്നാല്‍ യൂറോപ്പില്‍ ഒരു ജനറല്‍ പ്രാക്ടീഷണറെ കാണാന്‍ പോലും ദിവസങ്ങളോളം കാത്തിരിക്കേണ്ട അവസ്ഥയാണുള്ളത്.' ഡോ. പാലക് ഭട്ട് വ്യക്തമാക്കുന്നു.
മൂന്ന് ലക്ഷത്തിലധികം ആളുകള്‍ കണ്ട വീഡിയോയ്ക്ക് താഴെ വിദേശത്ത് താമസിക്കുന്ന നിരവധി ഇന്ത്യക്കാരാണ് യൂറോപ്പിലെ ആരോഗ്യ രംഗത്തുനിന്നുണ്ടായ ദുരനുഭവങ്ങള്‍ പങ്കുവെച്ച് കൊണ്ട് കുറിപ്പെഴുതിയത്. നെതര്‍ലന്‍ഡ്‌സില്‍ പൈല്‍സ് ചികിത്സയ്ക്കും ശസ്ത്രക്രിയയ്ക്കുമായി 6 മാസത്തോളം സമയം നീട്ടിക്കൊണ്ട് പോയതിനെ തുടര്‍ന്ന് ഇന്ത്യയിലെത്തി ചികിത്സ നേടി പൂര്‍ണ്ണ സൗഖ്യം നേടിയ രോഗിയുടെ കഥ ഒരു ഇന്‍സ്റ്റാഗ്രാം ഉപയോക്താവ് പങ്കുവെച്ചു. പാരീസില്‍ താമസിക്കുന്ന മറ്റൊരു ഇന്ത്യന്‍ സ്വദേശിയുടെ അനുഭവവും സമാനമാണ്. കഠിനമായ ഇടുപ്പുവേദനയും ചലനശേഷി നഷ്ടപ്പെട്ട അവസ്ഥയും ഉണ്ടായിട്ടും ശസ്ത്രക്രിയയ്ക്കുള്ള അപ്പോയിന്റ്‌മെന്റ് ലഭിക്കാന്‍ 40 ദിവസത്തിലധികം കാത്തിരിക്കേണ്ടി വന്നതായി ഇവര്‍ സാക്ഷ്യപ്പെടുത്തുന്നു. ഇന്ത്യയില്‍ ജീവിക്കാതെ വിദേശ രാജ്യങ്ങളെ പുകഴ്ത്തുന്നവര്‍ യാഥാര്‍ത്ഥ്യം മനസ്സിലാക്കണമെന്നും, ചികിത്സാ സൗകര്യങ്ങളുടെ വേഗതയിലും ലഭ്യതയിലും ഇന്ത്യ തന്നെയാണ് മുന്നിലെന്നും ഭൂരിഭാഗം പ്രവാസികളും സോഷ്യല്‍ മീഡിയയില്‍ കുറിക്കുന്നു.
