ടോക്യോ: സഹതാമസക്കാരിയായ 42കാരിയെ ഭീഷണിപ്പെടുത്തി സ്വന്തം ചുണ്ടുകള്‍ തുന്നാന്‍ നിര്‍ബന്ധിച്ച കേസില്‍ കുറ്റം സമ്മതിച്ച് ജപ്പാന്‍ സ്വദേശിനി. അമ്പതുകാരിയായ മാസേ സകുരായ് നവംബര്‍ 11ന് ഇബരാക്കി പ്രവിശ്യയിലെ മിറ്റോ ജില്ലാ കോടതിയുടെ ഷിമോത്സുമ ശാഖയില്‍ നടന്ന വിചാരണയിലാണ് കുറ്റം സമ്മതിച്ചത്. അറസ്റ്റിലായ സമയത്ത് ഇവര്‍ ആരോപണം നിഷേധിച്ചിരുന്നു.

ജൂണ്‍ 18നും 24നും ഇടയിലാണ് സംഭവം നടന്നതെന്നാണ് കുറ്റപത്രം. തന്റെ അനുമതിയില്ലാതെ ഭക്ഷണം കഴിച്ചതിന് ശിക്ഷയായാണ് സകുരായ് സഹതാമസക്കാരിയെ ഉപദ്രവിച്ചതെന്ന് പ്രോസിക്യൂഷന്‍ വ്യക്തമാക്കി. ജോലി ചെയ്യാത്തതിനാല്‍ ഭക്ഷണം കഴിക്കരുതെന്ന് പ്രതി നിര്‍ബന്ധിച്ചിരുന്നതായും കോടതിയില്‍ അറിയിച്ചു.

കോഗ നഗരത്തിലെ വീട്ടില്‍നിന്ന് രക്ഷപ്പെട്ട സ്ത്രീ സമീപത്തെ കടയിലെത്തിയാണ് സഹായം തേടിയത്. സംസാരിക്കാന്‍ കഴിയാതിരുന്ന അവര്‍ സഹായിക്കണമെന്നെഴുതിയ കടലാസ് ഉയര്‍ത്തിക്കാട്ടുകയായിരുന്നു. സംഭവത്തില്‍ ജൂണ്‍ 29ന് സകുരായിയെ പൊലീസ് അറസ്റ്റ് ചെയ്തു. സഹതാമസക്കാരിയുടെ ചുണ്ടുകള്‍ പ്രതി നേരിട്ട് തുന്നിയെന്നായിരുന്നു ആദ്യ സംശയം. എന്നാല്‍ ഭീഷണിപ്പെടുത്തി അവരെക്കൊണ്ടുതന്നെ ചെയ്യിച്ചെന്ന കുറ്റമാണ് ഇപ്പോള്‍ സകുരായ് സമ്മതിച്ചിരിക്കുന്നത്. വീട്ടിലെ നിരീക്ഷണ ക്യാമറാ ദൃശ്യങ്ങളും കോടതിയില്‍ തെളിവായി ഹാജരാക്കി. കേസിന്റെ അടുത്ത വിചാരണ 2027 ഫെബ്രുവരിയില്‍ നടക്കും.