കയ്യിലൊരു എഞ്ചിനീയറിം?ഗ് ബിരുദമുണ്ട്, മാസം 20,000 - 30,000 ശമ്പളം വരുന്ന ജോലി ഓഫറുകള്‍ കിട്ടി. എന്നാല്‍, സ്വന്തമായി ഒരു ചെറുകിട ബിസിനസ് കെട്ടിപ്പടുത്ത് മാസം രണ്ട് ലക്ഷത്തോളം രൂപ വരുമാനം നേടുകയാണ് ഈ മുംബൈ കാബ് ഡ്രൈവര്‍. ബെംഗളൂരു ആസ്ഥാനമായി പ്രവര്‍ത്തിക്കുന്ന കനേഡിയന്‍ കണ്ടന്റ് ക്രിയേറ്ററായ കാലെബ് ഫ്രൈസനുമായി നടത്തിയ സംഭാഷണത്തിലാണ് ഡ്രൈവര്‍ മനസ് തുറക്കുന്നത്. ഒരൊറ്റ വാഹനം വെച്ചാണ് താന്‍ തന്റെ ബിസിനസ്സ് ആരംഭിച്ചതെന്നും ഈ ഡ്രൈവര്‍ പറയുന്നു.

എക്‌സില്‍ (ട്വിറ്റര്‍) ഷെയര്‍ ചെയ്തിരിക്കുന്ന വീഡിയോയില്‍ അദ്ദേഹം പറയുന്നത്, ആദ്യമൊക്കെ തിരിച്ചടികളുണ്ടായേക്കാം, അതില്‍ തളര്‍ന്ന് മതിയാക്കരുത് എന്നാണ്. എല്ലാ വലിയ ബിസിനസും ചെറിയ ബിസിനസുകളായി തന്നെയാണ് ആദ്യം തുടങ്ങിയത് എന്നും അദ്ദേഹം ഓര്‍മ്മപ്പെടുത്തുന്നു. ഒരു ബിസിനസ് ആരംഭിക്കുന്നത് റിസ്‌കല്ലേ എന്നും ഫ്രൈസന്‍ ചോദിക്കുന്നുണ്ട്. റിസ്‌കുകളെടുക്കുക എന്നത് ജീവിതത്തില്‍ അത്യാവശ്യമാണ് എന്നാണ് ഡ്രൈവറുടെ മറുപടി. 'ജീവിതത്തില്‍ നിങ്ങള്‍ റിസ്‌കുകളെടുക്കണം, അല്ലെങ്കില്‍ നിങ്ങള്‍ മറ്റുള്ളവര്‍ക്ക് വേണ്ടി ജോലി ചെയ്യേണ്ടി വരും. 60 വയസിന് ശേഷം നിങ്ങള്‍ക്ക് ആരും ജോലി നല്‍കില്ല' എന്നാണ് ഈ ഡ്രൈവര്‍ പറയുന്നത്.

തനിക്കിപ്പോള്‍ നാല് കാറുകളുണ്ട്. അതില്‍ മൂന്നും മറ്റ് ഡ്രൈവര്‍മാരെ വച്ചാണ് ഓടിക്കുന്നത്. ഒരെണ്ണം താന്‍ സ്വയം ഓടിക്കുന്നു. ഡ്രൈവര്‍മാര്‍ അവര്‍ക്ക് കിട്ടുന്ന വരുമാനത്തിന്റെ ഒരു ഭാ?ഗം ഇദ്ദേഹത്തിന് നല്‍കുന്നു. ഒരു മാസം താന്‍ 2 ലക്ഷം രൂപ വരെ സമ്പാദിക്കും. ചില കാറുകള്‍ക്ക് ലോണുണ്ട്. ഇഎംഐ ഒക്കെ കഴിഞ്ഞ ശേഷം 1.7 ലക്ഷം വരെ തന്റെ കയ്യിലിരിക്കുമെന്നും അദ്ദേഹം പറഞ്ഞു. എഞ്ചിനീയറിം?ഗ് കഴിഞ്ഞിട്ടും 20,000-30,000 രൂപയ്ക്കാണ് ജോലി ഓഫര്‍ വന്നത്, അതുകൊണ്ടെന്ത് പ്രയോജനം, അതിനാലാണ് ബിസിനസിലേക്ക് വന്നതെന്നും യുവാവ് സമ്മതിക്കുന്നു. നിരവധിപ്പേരാണ് പോസ്റ്റിന് കമന്റുകള്‍ നല്‍കിയത്. യുവാവിന്റെ മനോധൈര്യത്തെയും ആത്മവിശ്വാസത്തെയും ആളുകള്‍ അഭിനന്ദിച്ചു.