ലണ്ടന്: യുകെയിലെ മലയാളി സമൂഹത്തില് ഗാര്ഹിക പീഡന കേസുകളും ട്രാഫിക് കുറ്റകൃത്യങ്ങളും തുടര്ച്ചയായി റിപ്പോര്ട്ട് ചെയ്യപ്പെടുന്നതോടെ നിയമ സംവിധാനത്തിന്റെ കര്ക്കശ നിലപാട് ചര്ച്ചയാകുകയാണ്. മുമ്പ് മാനുഷിക പരിഗണന ലഭിച്ചിരുന്ന കേസുകള് പോലും ഇപ്പോള് ജയിലിലും നാടുകടത്തലിലും അവസാനിക്കുന്ന സാഹചര്യം മലയാളികള്ക്കിടയില് ആശങ്ക ഉയര്ത്തുന്നു.
ഓഫ് ബീറ്റ് പട്രോള് പോലീസിന്റെ കര്ശന പരിശോധന
വാര്വിക് പോലീസിന്റെ ഓഫ് ബീറ്റ് പട്രോള് വിഭാഗം അടുത്തിടെ കൂടുതല് പരിശോധനകള് ആരംഭിച്ചതോടെ മലയാളി യുവാക്കളുടെ അറസ്റ്റുകള് വര്ധിച്ചിരിക്കുകയാണ്. കവന്ട്രിക്ക് സമീപമുള്ള നനീട്ടനില് സ്കൂള് ട്രിപ്പിനിടെ വാഹനം ഓടിച്ച മലയാളി യുവാവിനെ പോലീസ് പിടികൂടിയത് വലിയ ചര്ച്ചയായി. പ്രൊവിഷണല് ലൈസന്സില് വാഹനം ഓടിച്ചതും, ഇന്ഷുറന്സ് ഇല്ലാതിരുന്നതും, കുട്ടികള് സീറ്റ് ബെല്റ്റ് ധരിക്കാതിരുന്നതുമാണ് കേസിന്റെ ഗൗരവം കൂട്ടിയത്.
ലൈസന്സ് ഇല്ലാതെ ഡ്രൈവിംഗ്
യുകെയിലെത്തിയ ശേഷം 12 മാസം കഴിഞ്ഞാല് ഇന്റര്നാഷണല് ലൈസന്സ് അസാധുവാകുമെന്ന് പോലീസിന്റെ മുന്നറിയിപ്പുണ്ടെങ്കിലും, പലരും ഇതിനെ അവഗണിച്ച് വാഹനമോടിക്കുന്നതാണ് പ്രശ്നങ്ങള്ക്ക് കാരണമാകുന്നത്. തെറ്റായ പാര്ക്കിംഗ്, സിഗ്നല് നല്കാതെ വാഹനം ഓടിക്കല്, ക്ലിയര് വേ, ബോക്സ് ജംഗ്ഷന് നിയമലംഘനം എന്നിവയാണ് കുടിയേറ്റക്കാരെ കുടുക്കുന്ന പ്രധാന കുറ്റങ്ങള്.
സമൂഹത്തില് പ്രതികരണം
പോലീസ് സോഷ്യല് മീഡിയയില് നല്കിയ പോസ്റ്റിനു പിന്നാലെ നൂറിലേറെ തദ്ദേശവാസികള് വംശഹത്യ സൂചനയോടെ കമന്റുകള് നല്കി. ''ഇത്തരക്കാരെ ജയിലില് അടച്ച് നാടുകടത്തണം'' എന്ന ആവശ്യം ഉയര്ന്നപ്പോള്, ഓരോ നാടുകടത്തലും ബ്രിട്ടീഷ് നികുതി പണമാണ് സര്ക്കാര് ചെലവഴിക്കുന്നതെന്ന് ചൂണ്ടിക്കാട്ടുന്നവരും ഉണ്ടായിരുന്നു.
മുന് സംഭവങ്ങള്
കഴിഞ്ഞ വര്ഷം മലയാളി യുവതി ഓടിച്ച കാര് ഇടിച്ച് ഒരു കാല്നട യാത്രക്കാരി മരിച്ച സംഭവത്തില് ഇന്ഷുറന്സ് ഇല്ലാത്തതിനാല് നാല് വര്ഷത്തെ ജയില് ശിക്ഷ വിധിക്കപ്പെട്ടിരുന്നു. ഇത്തരം സംഭവങ്ങള് പുതുതായി എത്തിയ മലയാളികള്ക്ക് മുന്നറിയിപ്പായി മാറുകയാണ്.
