ലണ്ടന്: യുണൈറ്റഡ് കിങ്ഡത്തിന്റെയും ഇംഗ്ലണ്ടിന്റെയും തലസ്ഥാനമാണ് ലണ്ടന്. ഇത് യൂറോപ്പിലെ ഏറ്റവും ജനസംഖ്യയുള്ള നഗരങ്ങളില് ഒന്നാണ്. തേംസ് നദി ഈ നഗരത്തിലൂടെയാണ് ഒഴുകുന്നത്, കൂടാതെ രണ്ടായിരം വര്ഷത്തിലേറെ പഴക്കമുള്ള ഒരു നഗരമാണ് ലണ്ടന്. കൂടാതെ വാണിജ്യ, സാംസ്കാരിക, വിനോദസഞ്ചാര, വിദ്യാഭ്യാസ മേഖലകളില് ആഗോള തലത്തില് വലിയ പ്രാധാന്യമുള്ള നഗരമാണ്. നഗരത്തിന്റെ പ്രസിദ്ധമായ സ്മാരകങ്ങള്, സാമ്പത്തിക വളര്ച്ച, സാങ്കേതിക പുരോഗതി, നൈറ്റ് ലൈഫ്, ഭക്ഷണം, വാസ്തുവിദ്യ, എന്നിവയെല്ലാം ലണ്ടന് ആകര്ഷകമാകുന്നതിന്റെ പ്രധാന ഘടകങ്ങളാണ്. ലോകത്തിലെ ഏറ്റവും ആകര്ഷകമായ നഗരങ്ങളില് ഒന്നാണ് ലണ്ടന്. ചരിത്രവും സംസ്കാരവും ആധുനികതയും ഒരുമിച്ച് ചേരുന്ന ഈ മഹാനഗരം ഓരോ സഞ്ചാരിക്കും വ്യത്യസ്തമായ അനുഭവങ്ങളാണ് നല്കുന്നത്. തേംസ് നദിയുടെ തീരത്ത് സ്ഥിതി ചെയ്യുന്ന ലണ്ടന് എന്നും സഞ്ചാരികളുടെ സ്വപ്ന നഗരമാണ്. യുനെസ്കോയുടെ ലോക പൈതൃക സൈറ്റായ ലണ്ടന് ടവര്, ബിഗ് ബെന്, ബ്രിട്ടിഷ് മ്യൂസിയം, നാച്ചുറല് ഹിസ്റ്ററി മ്യൂസിയം, വെസ്റ്റ്മിന്സ്റ്റര് കൊട്ടാരം, ഹൗസ് ഓഫ് കോമണ്സ്, ഹൗസ് ഓഫ് ലോര്ഡ്സ് തുടങ്ങിയവയെല്ലാം ഇവിടെ കാണേണ്ട കാഴ്ചകളില് പെടുന്നു. ബ്രിട്ടീഷ് രാജകുടുംബത്തിന്റെ ഔദ്യോഗിക വസതിയായ ബക്കിങ്ഹാം പാലസ് ലണ്ടനിലെ പ്രധാന ആകര്ഷണങ്ങളിലൊന്നാണ്. ഇവിടെ നടക്കുന്ന ''ചേഞ്ചിങ് ഓഫ് ദി ഗാര്ഡ്'' ചടങ്ങ് കാണാന് നൂറുകണക്കിന് ആളുകളാണ് ദിനംപ്രതി എത്തുന്നത്. വേനല്ക്കാലത്ത് പാലസിന്റെ ചില ഭാഗങ്ങള് പൊതുജനങ്ങള്ക്കായി തുറന്നുകൊടുക്കാറുണ്ട്.
ലണ്ടന്റെ പ്രതീകങ്ങളായ ലണ്ടന് ബ്രിജും ടവര് ബ്രിജും നഗരത്തിന്റെ മനോഹര കാഴ്ചകളാണ്. ഗോഥിക് ശൈലിയില് നിര്മിച്ച ടവര് ബ്രിജ്, അതിന്റെ ഗാംഭീര്യം കൊണ്ട് സന്ദര്ശകരെ ആകര്ഷിക്കുന്നു. പാലത്തിന്റെ ഉള്ഭാഗം സന്ദര്ശിക്കാനും മുകളിലെ നടപ്പാതയിലൂടെ നടക്കാനും ഇവിടെ അവസരമുണ്ട്. ബിഗ് ബെന് എന്നറിയപ്പെടുന്ന എലിസബത്ത് ടവറും സമീപത്തെ പാര്ലമെന്റ് ഹൗസുകളും ലണ്ടന്റെ മറ്റൊരു പ്രധാന ആകര്ഷണമാണ്. നഗരത്തിന്റെ വിശാലമായ കാഴ്ചകള് ആസ്വദിക്കാന് ലണ്ടന് ഐ സന്ദര്ശിക്കാം. തേംസ് നദിയുടെ തീരത്തുള്ള ഈ ഭീമാകാരമായ ഫെറിസ് വീലില് കയറി ലണ്ടന്റെ മനോഹരമായ ആകാശക്കാഴ്ച ആസ്വദിക്കാം. ചരിത്രത്തിലും കലയിലും താല്പ്പര്യമുള്ളവര്ക്ക് ബ്രിട്ടീഷ് മ്യൂസിയവും നാഷണല് ഗാലറിയും സന്ദര്ശിക്കാം. ലോകത്തിലെ ഏറ്റവും വലിയ മ്യൂസിയങ്ങളിലൊന്നായ ബ്രിട്ടീഷ് മ്യൂസിയത്തില് ഈജിപ്ഷ്യന് മമ്മികള്, റോസറ്റ സ്റ്റോണ് തുടങ്ങിയ അമൂല്യമായ പുരാവസ്തു ശേഖരങ്ങള് കാണാം. ട്രഫാല്ഗര് സ്ക്വയറില് സ്ഥിതി ചെയ്യുന്ന നാഷണല് ഗാലറിയില് വാന്ഗോഗ്, മോണെ, ഡാവിഞ്ചി തുടങ്ങിയ പ്രശസ്ത കലാകാരന്മാരുടെ ചിത്രങ്ങളുമുണ്ട്. ഈ രണ്ട് മ്യൂസിയങ്ങളിലും പ്രവേശനം സൗജന്യമാണ്.
