ലണ്ടന്‍: 2029-ലെ ലോക അത്ലറ്റിക്‌സ് ചാമ്പ്യന്‍ഷിപ്പിന് ആതിഥേയത്വം വഹിക്കാനുള്ള ശ്രമങ്ങള്‍ക്ക് ലണ്ടന്‍ തുടക്കമിട്ടതായി സംഘാടകര്‍ അറിയിച്ചു. ഇതിന്റെ ഭാഗമായി യുകെ അത്ലറ്റിക്സ്, ഗ്രേറ്റ് റണ്‍ കമ്പനി, ലണ്ടന്‍ മാരത്തണ്‍ ഇവന്റ്സ് എന്നിവര്‍ ചേര്‍ന്നുള്ള സംയുക്ത സംരംഭം ഒരു സാധ്യതാ പഠനം പൂര്‍ത്തിയാക്കി. ഈ പഠന റിപ്പോര്‍ട്ടിന്റെ അടിസ്ഥാനത്തില്‍, സെപ്റ്റംബറില്‍ ലോക അത്ലറ്റിക്സിനെ തങ്ങളുടെ താല്പര്യം ഔദ്യോഗികമായി അറിയിക്കാനാണ് നീക്കം. ലണ്ടന്റെ ഈ ശ്രമം വിജയം കാണണമെങ്കില്‍, ചാമ്പ്യന്‍ഷിപ്പ് നടത്തിപ്പിനായി സര്‍ക്കാരില്‍ നിന്ന് 45 മില്യണ്‍ പൗണ്ടിന്റെ (ഏകദേശം 59 മില്യണ്‍ ഡോളര്‍) സാമ്പത്തിക പിന്തുണ ഉറപ്പാക്കേണ്ടതുണ്ട്. ബിഡ് വിജയിക്കുകയാണെങ്കില്‍, 2017-ന് ശേഷം ആദ്യമായാവും ലോക അത്ലറ്റിക് ചാമ്പ്യന്‍ഷിപ്പിന് ലണ്ടന്‍ വേദിയാകുന്നത്. 2017-ല്‍ നടന്ന ചാമ്പ്യന്‍ഷിപ്പ് വന്‍ വിജയമായിരുന്നു, അന്ന് എല്ലാ സെഷനുകളിലും സ്റ്റേഡിയം കാണികളെക്കൊണ്ട് നിറഞ്ഞിരുന്നു.

2017-ല്‍ ലണ്ടന്‍ ലോകത്തിന് കാണിച്ചുകൊടുത്തത് ഈ നഗരത്തിനും രാജ്യത്തിനും എന്തുചെയ്യാന്‍ കഴിയുമെന്നാണ്. നിറഞ്ഞ സ്റ്റേഡിയങ്ങളും ആഗോള പങ്കാളിത്തവും കൊണ്ട് അത് അവിസ്മരണീയമായി,'' 2017-ലെ വിജയകരമായ ടീമിന്റെ ഭാഗമായിരുന്ന, യുകെ അത്ലറ്റിക്സ് പ്രസിഡന്റ് ഡെനിസ് ലൂയിസ് പറഞ്ഞു. ''അതേ മികവ് 2029-ലും ആവര്‍ത്തിക്കാന്‍ നമുക്ക് സാധിക്കും,'' അവര്‍ കൂട്ടിച്ചേര്‍ത്തു. യുകെയിലെ കായികരംഗത്തിന് കൂടുതല്‍ സുസ്ഥിരമായ ഒരു ഭാവി കെട്ടിപ്പടുക്കുക എന്ന ലക്ഷ്യത്തോടെയാണ് 'അത്ലറ്റിക് വെഞ്ച്വേഴ്സ്' എന്ന പേരില്‍ ഈ മൂന്ന് പ്രമുഖ സ്ഥാപനങ്ങളും ചേര്‍ന്ന് 2024 ഏപ്രിലില്‍ സംയുക്ത സംരംഭത്തിന് തുടക്കമിട്ടത്. ഇവരുടെ സാധ്യതാ പഠനം അനുസരിച്ച്, 2029-ലെ ചാമ്പ്യന്‍ഷിപ്പ് ലണ്ടനില്‍ നടക്കുകയാണെങ്കില്‍ അത് 400 മില്യണ്‍ പൗണ്ടിലധികം സാമ്പത്തികവും സാമൂഹികവുമായ മുന്നേറ്റത്തിന് കാരണമാകും. വെല്ലുവിളികള്‍ നിറഞ്ഞ ഈ കാലഘട്ടത്തില്‍പ്പോലും, കായികമേളകള്‍ക്ക് രാജ്യത്തെ സാമ്പത്തികമായും സാമൂഹികമായും വൈകാരികമായും ഉയര്‍ത്താന്‍ സാധിക്കുമെന്നും, അതിനാല്‍ സര്‍ക്കാര്‍ പിന്തുണ ലഭിക്കുമെന്നും ഡെനിസ് ലൂയിസ് പ്രത്യാശ പ്രകടിപ്പിച്ചു. ''കൃത്യമായ പിന്തുണ ലഭിച്ചാല്‍, 2029-ല്‍ നമുക്കെല്ലാവര്‍ക്കും അഭിമാനിക്കാവുന്ന ഒരു ചാമ്പ്യന്‍ഷിപ്പ് സംഘടിപ്പിക്കാനും മികച്ച ഒരു പാരമ്പര്യം സൃഷ്ടിക്കാനും കഴിയും,'' അവര്‍ പറഞ്ഞു.