ലണ്ടന്‍: തെറ്റായ എഡിറ്റിങ്ങിലൂടെ തന്നെ അപകീര്‍ത്തിപ്പെടുത്തിയെന്നാരോപിച്ച് ബ്രിട്ടിഷ് മാധ്യമ ഭീമനായ ബിബിസിക്കെതിരെ യുഎസ് പ്രസിഡന്റ് ഡോണള്‍ഡ് ട്രംപ് 10 ബില്യണ്‍ ഡോളറിന്റെ (ഏകദേശം 84,000 കോടി രൂപ) മാനനഷ്ടക്കേസ് ഫയല്‍ ചെയ്തു. 2021 ജനുവരി 6-ന് യുഎസ് ക്യാപിറ്റല്‍ കലാപത്തിന് മുന്‍പ് നടത്തിയ പ്രസംഗം ബിബിസി സംപ്രേക്ഷണം ചെയ്ത ഡോക്യുമെന്ററിയില്‍ വളച്ചൊടിച്ചുവെന്നാണ് ട്രംപിന്റെ പരാതി.

വിവാദത്തിന് ആധാരം

- 2024ലെ യുഎസ് തിരഞ്ഞെടുപ്പിന് തൊട്ടുമുമ്പ് ബിബിസി സംപ്രേക്ഷണം ചെയ്ത 'Trump: A Second Chance?' എന്ന പനോരമ ഡോക്യുമെന്ററിയാണ് വിവാദത്തിന് ആധാരം.

- ട്രംപിന്റെ പ്രസംഗത്തിലെ വിവിധ ഭാഗങ്ങള്‍ കൂട്ടിച്ചേര്‍ത്ത്, അദ്ദേഹം അണികളോട് യുഎസ് ക്യാപിറ്റലിലേക്ക് മാര്‍ച്ച് ചെയ്യാനും ''ശക്തമായി പോരാടാനും'' ആഹ്വാനം ചെയ്തു എന്ന രീതിയില്‍ എഡിറ്റ് ചെയ്തുവെന്നാണ് ആരോപണം.

- ''ഞാന്‍ പറയാത്ത കാര്യങ്ങള്‍ ഞാന്‍ പറഞ്ഞു എന്ന് വരുത്തിത്തീര്‍ക്കുകയാണ് അവര്‍ ചെയ്തത്. എന്റെ വായില്‍ വാക്കുകള്‍ തിരുകിക്കയറ്റി,'' എന്ന് ട്രംപ് ഓവല്‍ ഓഫിസില്‍ മാധ്യമങ്ങളോട് പറഞ്ഞു.

ബിബിസിക്ക് തിരിച്ചടി

ഈ വിവാദം ബിബിസിയെ പിടിച്ചുലച്ചിരുന്നു.

- എഡിറ്റിങ്ങില്‍ ''പിഴവ് സംഭവിച്ചു'' എന്ന് ബിബിസി ചെയര്‍മാന്‍ സമീര്‍ ഷാ സമ്മതിക്കുകയും മാപ്പ് പറയുകയും ചെയ്തു.

- അക്രമത്തിന് ആഹ്വാനം ചെയ്തു എന്ന തെറ്റായ സന്ദേശം ഡോക്യുമെന്ററി നല്‍കിയെന്ന് അദ്ദേഹം അംഗീകരിച്ചു.

- വിവാദങ്ങള്‍ക്കൊടുവില്‍ ബിബിസി ഡയറക്ടര്‍ ജനറല്‍ ടിം ഡേവി, ന്യൂസ് വിഭാഗം മേധാവി ഡെബോറ ടേണസ് എന്നിവര്‍ രാജിവച്ചു.

ബിബിസിയുടെ നിലപാട്

- കേസിനെ നിയമപരമായി നേരിടുമെന്ന് ബിബിസി വക്താവ് അറിയിച്ചു.

- ഡോക്യുമെന്ററിയിലെ പിഴവിന് മാപ്പ് പറഞ്ഞിട്ടുണ്ടെങ്കിലും, മാനനഷ്ടക്കേസിന് അടിസ്ഥാനമില്ലെന്നാണ് ബിബിസിയുടെ വാദം.

രാഷ്ട്രീയ പ്രതികരണങ്ങള്‍

- ബിബിസിക്ക് പിന്തുണയുമായി യുകെയിലെ ലേബര്‍ സര്‍ക്കാര്‍ രംഗത്തെത്തി.

- ''ബിബിസി ഒരു സ്വതന്ത്ര സ്ഥാപനമാണ്, തെറ്റുകള്‍ തിരുത്തിയിട്ടുണ്ട്,'' എന്ന് ഹെല്‍ത്ത് മിനിസ്റ്റര്‍ സ്റ്റീഫന്‍ കിന്നോക്ക് പറഞ്ഞു.

- ട്രംപിന്റെ 'ഭീഷണി'ക്കെതിരെ പ്രധാനമന്ത്രി കെയ്ര്‍ സ്റ്റാമെര്‍ ശക്തമായ നിലപാട് എടുക്കണമെന്ന് ലിബറല്‍ ഡെമോക്രാറ്റ് നേതാവ് സര്‍ എഡ് ഡേവി ആവശ്യപ്പെട്ടു