വാഷിംഗ്ടണ്: ഇറാനുമായുള്ള യുദ്ധത്തിന്റെ പശ്ചാത്തലത്തില് അമേരിക്കന് കോണ്ഗ്രസ് ഹിയറിങ്ങിനിടെ പ്രസിഡന്റ് ഡോണള്ഡ് ട്രംപിന്റെ മാനസിക സ്ഥിരതയെക്കുറിച്ചുള്ള ചോദ്യം വലിയ വിവാദങ്ങള്ക്ക് വഴിവെച്ചു. ഡെമോക്രാറ്റിക് അംഗമായ സാറ ജേക്കബ്സ്, 'കമാന്ഡര് ഇന് ചീഫ്' ആയി തുടരാന് ട്രംപിന് മാനസിക സ്ഥിരതയുണ്ടോ എന്ന ചോദ്യമാണ് ഉയര്ത്തിയത്.
ചോദ്യത്തിന് നേരിട്ട് മറുപടി നല്കാതെ യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് ട്രംപിനെ പ്രതിരോധിച്ചു. മുന് പ്രസിഡന്റ് ജോ ബൈഡനെക്കുറിച്ച് ഇതേ ചോദ്യം കഴിഞ്ഞ നാല് വര്ഷം ചോദിച്ചിട്ടുണ്ടോ എന്നായിരുന്നു അദ്ദേഹത്തിന്റെ മറുചോദ്യം. ഇതോടെ വാക്കേറ്റം രൂക്ഷമായി. ട്രംപ് സോഷ്യല് മീഡിയയില് മാര്പ്പാപ്പയ്ക്കെതിരായി പോസ്റ്റ് ചെയ്ത ചിത്രം ചൂണ്ടിക്കാട്ടി ഇത്തരം പ്രസ്താവനകള് എങ്ങനെ ന്യായീകരിക്കാമെന്ന ചോദ്യത്തിന് ഹെഗ്സെത്ത് മറുപടി നല്കിയില്ല. പകരം ട്രംപിനെ മികച്ച കമാന്ഡര് ഇന് ചീഫ് എന്ന് വിശേഷിപ്പിച്ചു. സാറ ജേക്കബ്സ് മറുപടിയായി, സൈനികരുടെ സുരക്ഷയ്ക്ക് നേതാവിന്റെ മാനസിക നില നിര്ണായകമാണെന്ന് ചൂണ്ടിക്കാട്ടി.
യുദ്ധത്തില് 13 അമേരിക്കന് സൈനികര് കൊല്ലപ്പെടുകയും 380 ല് അധികം പേര്ക്ക് പരിക്കേല്ക്കുകയും ചെയ്തതായി സാറ ഓര്മ്മിപ്പിച്ചു. ഹോര്മുസ് കടലിടുക്കിലൂടെ 90 ശതമാനം ഗതാഗതവും തടസ്സപ്പെട്ടിരിക്കുകയാണെന്നും ഇറാന് ആണവായുധങ്ങളുമായി ശക്തമായി തുടരുകയാണെന്നും അവര് വ്യക്തമാക്കി. യുദ്ധം അമേരിക്കന് ജനതയ്ക്ക് ശതകോടിക്കണക്കിന് ഡോളറുകളുടെ നഷ്ടം വരുത്തിയിട്ടുണ്ടെന്നും, ഇതിനെ വിജയമായി വിശേഷിപ്പിക്കുന്നത് തന്നെ ചോദ്യം ചെയ്യപ്പെടേണ്ട കാര്യമാണെന്നും സാറ ശക്തമായി തിരിച്ചടിച്ചു. ഇറാന് യുദ്ധം, ദേശീയ സുരക്ഷ, ട്രംപിന്റെ നേതൃത്വശൈലി എന്നിവയെക്കുറിച്ച് കോണ്ഗ്രസില് കടുത്ത ചര്ച്ച തുടരുകയാണ്. ഹെഗ്സെത്തിന്റെ മറുപടി സാമൂഹ്യമാധ്യമങ്ങളില് വ്യാപകമായി പ്രചരിച്ച് പുതിയ രാഷ്ട്രീയ വിവാദങ്ങള്ക്ക് വഴിവെച്ചിരിക്കുകയാണ്.
