കൊച്ചി: കോവിഡ് മഹാമാരിക്കു ശേഷം മലയാളി വിദ്യാര്ത്ഥികളില് വിദേശ വിദ്യാഭ്യാസ ഭ്രമം വന്തോതില് ഉയര്ന്നിരുന്നു. വായ്പയെടുത്തും കുടുംബത്തിന്റെ സാമ്പത്തിക ബാധ്യത ഏറ്റെടുത്തും വിദേശത്തേക്ക് പോയ പലരും ഭേദപ്പെട്ട ജോലി നേടുന്നതില് പരാജയപ്പെട്ടതോടെ, പുതിയ തലമുറയില് വിദേശ പഠനത്തെക്കുറിച്ചുള്ള സമീപനം മാറുകയാണ്. ആദ്യകാലത്ത് യുകെ, ഓസ്ട്രേലിയ, കാനഡ തുടങ്ങിയ രാജ്യങ്ങളിലേക്കാണ് മലയാളി വിദ്യാര്ത്ഥികളുടെ പ്രവാഹം കൂടുതലായിരുന്നത്. എന്നാല്, ജീവിതച്ചെലവുകള് കുത്തനെ ഉയര്ന്നതും, വിദ്യാര്ത്ഥി വീസകള് കൂടുതല് കര്ശനമായതും, പഠനശേഷമുള്ള തൊഴില് അവസരങ്ങള് കുറഞ്ഞതുമാണ് യുകെ, കാനഡ, ഫ്രാന്സ് പോലുള്ള രാജ്യങ്ങളിലേക്കുള്ള പ്രവാഹം കുറയാന് കാരണമായത്.
പുതുരാജ്യങ്ങള് ലക്ഷ്യമാക്കി
ഇപ്പോള് മലയാളി വിദ്യാര്ത്ഥികള് യൂറോപ്പിലെ രണ്ടാം നിര രാജ്യങ്ങളായ എസ്റ്റോണിയ, സ്ലോവേനിയ, പോളണ്ട്, ഹംഗറി, ജോര്ജിയ, അര്മേനിയ എന്നിവിടങ്ങളിലേക്കാണ് കൂടുതലായി പോകുന്നത്.
ഫീസ് കുറഞ്ഞത്: ഇന്ത്യയിലെ പ്രമുഖ സ്ഥാപനങ്ങളില് പഠിക്കുന്ന ചെലവിനോട് സാമ്യമുള്ളതാണ് ഇവിടങ്ങളിലെ ഫീസ്.
ജീവിതച്ചെലവ് കുറവ്: യുകെ, ഫ്രാന്സ്, അയര്ലന്ഡ് രാജ്യങ്ങളെ അപേക്ഷിച്ച് താമസവും ഭക്ഷണവും പോക്കറ്റിന് ഇണങ്ങുന്നതാണ്.
ജോലി സാധ്യതകള്: പഠനശേഷം ജോലി കണ്ടെത്താന് സഹായിക്കുന്ന വിധത്തില് വീസ കാലാവധി നീട്ടിനല്കുന്ന സൗകര്യവും ഇവിടങ്ങളില് ലഭ്യമാണ്.
വിദേശ വിദ്യാഭ്യാസം സ്വപ്നമായി കാണുന്നവര് ഇപ്പോഴും ഉണ്ടെങ്കിലും, കോവിഡ് ശേഷമുള്ള യാഥാര്ത്ഥ്യങ്ങള് തിരിച്ചറിഞ്ഞതോടെ മലയാളി വിദ്യാര്ത്ഥികളുടെ ലക്ഷ്യരാജ്യങ്ങളില് വലിയ മാറ്റം സംഭവിച്ചിരിക്കുകയാണ്.
