ലണ്ടന്: ഇറാന്-യുഎസ് സംഘര്ഷത്തിന്റെ സാമ്പത്തിക പ്രത്യാഘാതം വിമാനയാത്രകളിലും പ്രതിഫലിക്കാന് തുടങ്ങി. വിദഗ്ധരുടെ മുന്നറിയിപ്പുപ്രകാരം അടുത്ത ആഴ്ചകളില് വിമാന ടിക്കറ്റുകള് 'പോക്കറ്റ് കീറുന്ന' നിരക്കുകളിലേക്ക് ഉയരും.
ജെറ്റ് ഫ്യൂവല് പ്രതിസന്ധി
കുതിച്ചുയരുന്ന ജെറ്റ് ഫ്യൂവല് വില അധികം വൈകാതെ സര്ചാര്ജുകളായി യാത്രാ നിരക്കുകളില് പ്രതിഫലിക്കുമെന്ന് ട്രാവല് വിദഗ്ധര് പറയുന്നു. ദീര്ഘദൂര വിമാനയാത്രകളുടെ നിരക്കുകള് ഇതിനകം 300 പൗണ്ട് വരെ വര്ധിച്ചു. ഹൃസ്വദൂര യാത്രകളിലും ഇത് പടരുമെന്നതാണ് ആശങ്ക.
ഹോര്മുസ് കടലിടുക്ക് വീണ്ടും അടച്ചതോടെ
ഇറാന് ഹോര്മുസ് കടലിടുക്ക് വീണ്ടും അടച്ചതോടെ എണ്ണവില ഉയര്ന്നിരിക്കുകയാണ്. യുഎസ് നേവല് ബ്ലോക്ക് നീക്കാന് വിസമ്മതിച്ചതും, ഇന്ത്യന് എണ്ണക്കപ്പലുകള്ക്ക് നേരെ വെടിയുതിര്ന്ന സംഭവവും വെടിനിര്ത്തല് കരാറിനെ തന്നെ സംശയത്തിലാക്കി.
വിദഗ്ധരുടെ മുന്നറിയിപ്പ്
എയര്ലൈന് പോളിസി ഉപദേശകരായ ഫോര്ഫ്രണ്ട് അഡൈ്വസേഴ്സ് വ്യക്തമാക്കുന്നത്, ജെറ്റ് ഇന്ധന പ്രതിസന്ധി ആഗോള തലത്തില് അടുത്ത ആറു ആഴ്ച മുതല് രണ്ട് മാസം വരെ പ്രത്യാഘാതം സൃഷ്ടിക്കുമെന്നാണ്.
