ടൊറന്റോ: വീടിനുള്ളിലെ വായുവിന്റെ ഗുണനിലവാരത്തെച്ചൊല്ലിയുള്ള തര്‍ക്കത്തെത്തുടര്‍ന്ന് കാനഡയില്‍ വാടകക്കാരായ ദമ്പതികളെ ഒഴിപ്പിക്കാന്‍ വീട്ടുടമയുടെ നീക്കം. ഹാസ്യകലാകാരന്മാരായ എസ്.ഇ. ഗ്രമ്മറ്റും സാം ക്രൂഗറുമാണ് വിവാദത്തിലായത്. അമിതമായ അധോവായു വായുവിന്റെ ഗുണനിലവാരത്തെ ബാധിക്കുന്നുവെന്ന ആരോപണമാണ് തര്‍ക്കത്തിന് കാരണമായിരിക്കുന്നത്.
ദമ്പതികള്‍ താമസിക്കുന്ന ഭാഗത്തിന് മുകളിലാണ് വീട്ടുടമയുടെ താമസം. ഇരുഭാഗങ്ങളും ഒരേ വായുസഞ്ചാര സംവിധാനമാണ് ഉപയോഗിക്കുന്നത്. ശ്വാസകോശ രോഗമുള്ള വീട്ടുടമയുടെ എയര്‍ ക്വാളിറ്റി മോണിറ്ററില്‍ അസ്ഥിര ജൈവസംയുക്തങ്ങളുടെ അളവ് ഉയര്‍ന്നതായി കണ്ടെത്തിയതോടെയാണ് പ്രശ്നം ആരംഭിച്ചത്. വാടകക്കാര്‍ വീടിനുള്ളില്‍ പുകവലിക്കുന്നുണ്ടെന്നായിരുന്നു ആദ്യ ആരോപണം. എന്നാല്‍ ഇത് ദമ്പതികള്‍ നിഷേധിച്ചു. വീട്ടുപകരണങ്ങളും സുഗന്ധദ്രവ്യങ്ങളും പരിശോധിച്ചിട്ടും കാരണം കണ്ടെത്താനായില്ല. ശരീരത്തില്‍നിന്നുള്ള വാതകങ്ങള്‍ സെന്‍സര്‍ റീഡിങ്ങിനെ സ്വാധീനിക്കാമെന്ന വിവരമാണ് പിന്നീട് വീട്ടുടമ മുന്നോട്ടുവച്ചത്. ഇതാണ് ഉയര്‍ന്ന റീഡിങ്ങിന് കാരണമെന്ന് സ്ഥിരീകരിച്ചിട്ടില്ല.
അതേസമയം, വാടകക്കാരുടെ അവകാശങ്ങളെക്കുറിച്ച് ചോദിച്ചതിനുള്ള പ്രതികാരമാണ് ഒഴിപ്പിക്കല്‍ ശ്രമമെന്ന് ദമ്പതികള്‍ ആരോപിച്ചു. സ്വന്തം ആവശ്യത്തിനായി വീട് തിരിച്ചെടുക്കാനുള്ള നീക്കമാണിതെന്നും ഇവര്‍ വാദിക്കുന്നു. വിഷയം ഒന്റാറിയോയിലെ ലാന്‍ഡ്ലോര്‍ഡ് ആന്‍ഡ് ടെനന്റ് ബോര്‍ഡിന്റെ പരിഗണനയിലാണ്. നിയമസഹായത്തിനായി നടത്തിയ ധനശേഖരണത്തിലൂടെ ഏകദേശം 2,400 ഡോളര്‍ ലഭിച്ചതായി ദമ്പതികള്‍ അറിയിച്ചു. കേസില്‍ അന്തിമ തീരുമാനമായിട്ടില്ല.
