ഓസ്ട്രേലിയയിലെയും ഇന്ത്യയിലെയും പൊതു അവധി ദിവസങ്ങള്‍ തമ്മിലുള്ള വ്യത്യാസത്തെക്കുറിച്ച് തമാശരൂപേണ സംസാരിക്കുന്ന പ്രവാസി യുവാവിന്റെ സോഷ്യല്‍ മീഡിയ വീഡിയോ തരംഗമാകുന്നു. കഴിഞ്ഞ 10 വര്‍ഷമായി ഓസ്ട്രേലിയയില്‍ താമസിക്കുന്ന ആദിത്യ ഖനേജ എന്ന യുവാവാണ് ഇന്‍സ്റ്റാഗ്രാമിലൂടെ തന്റെ നിരീക്ഷണങ്ങള്‍ പങ്കുവെച്ചത്. ഇവിടെ 10 വര്‍ഷമായി താമസിക്കുന്ന എനിക്ക് മനസ്സിലായത്, ഓസ്ട്രേലിയക്കാര്‍ക്ക് ആസ്വദിച്ചു ജീവിക്കുന്നതിനേക്കാള്‍ വലിയ സന്തോഷം വേറൊന്നുമില്ലെന്നാണ്,' എന്ന് പറഞ്ഞാണ് ആദിത്യ വീഡിയോ ആരംഭിക്കുന്നത്. ഓസ്ട്രേലിയയില്‍ നല്‍കുന്ന വിവിധ പൊതു അവധികളെക്കുറിച്ച് അദ്ദേഹം വീഡിയോയില്‍ വിശദീകരിക്കുന്നു. 'എ.എഫ്.എല്‍ ഗ്രാന്‍ഡ് ഫൈനല്‍' പ്രമാണിച്ച് വെറുതെ ആഘോഷിക്കാന്‍ ഒരു വെള്ളിയാഴ്ച അവധി നല്‍കുന്നു. കുതിരപ്പന്തയത്തിന്റെ പേരില്‍ 'മെല്‍ബണ്‍ കപ്പ് ഡേ'ക്ക് അവധി നല്‍കുന്നു, മേളയില്‍ പങ്കെടുക്കാന്‍ ക്വീന്‍സ്ലാന്റില്‍ 'റോയല്‍ ക്വീന്‍സ്ലാന്റ് ഷോ' അവധി, ഡാര്‍വിനിലെ 'പിക്‌നിക് ഡേ' തുടങ്ങി വിചിത്രവും രസകരവുമായ നിരവധി കാരണങ്ങള്‍ക്കാണ് ഇവിടെ ആളുകള്‍ക്ക് ജോലിയില്‍ നിന്ന് മാറിനില്‍ക്കാന്‍ അവസരം ലഭിക്കുന്നതെന്ന് അദ്ദേഹം ചൂണ്ടിക്കാട്ടുന്നു.
അതേസമയം ഇന്ത്യയിലെ അവധി ദിവസങ്ങളെയും അദ്ദേഹം ഇതിനോട് താരതമ്യം ചെയ്തു. ഇന്ത്യയില്‍ സ്വാതന്ത്ര്യദിനവും ദീപാവലിയും പോലുള്ള പ്രമുഖ ദേശീയ - മതപരമായ ആഘോഷങ്ങള്‍ക്കും പുണ്യദിനങ്ങള്‍ക്കുമാണ് പൊതു അവധി നല്‍കുന്നതെന്ന് അദ്ദേഹം പറഞ്ഞു. ശനി, ഞായര്‍ ദിവസങ്ങളില്‍ വരുന്ന അവധികളെ ഇരു രാജ്യങ്ങളും കൈകാര്യം ചെയ്യുന്ന രീതിയും വീഡിയോയില്‍ ഹാസ്യരൂപേണ വിവരിക്കുന്നുണ്ട്. 'ഇന്ത്യയില്‍ ദീപാവലി ശനിയാഴ്ച വന്നാല്‍ അതൊരു വലിയ നഷ്ടമായി ആളുകള്‍ക്ക് തോന്നും. എന്നാല്‍ ഓസ്ട്രേലിയയില്‍ ശനിയാഴ്ചയാണ് അവധിയെങ്കില്‍, അതിന് പകരം വെള്ളിയാഴ്ച കൂടി സര്‍ക്കാര്‍ അവധി പ്രഖ്യാപിക്കും. ഞായറാഴ്ചയാണെങ്കില്‍ തിങ്കളാഴ്ചയും അവധി നല്‍കും.
വീഡിയോ പങ്കുവെച്ചതോടെ സോഷ്യല്‍ മീഡിയയില്‍ വലിയ രീതിയിലുള്ള പ്രതികരണങ്ങളാണ് ഉയര്‍ന്നുവരുന്നത്. ചിലര്‍ അദ്ദേഹത്തിന്റെ അഭിപ്രായത്തോട് പൂര്‍ണ്ണമായി യോജിച്ചപ്പോള്‍, ന്യൂ സൗത്ത് വെയില്‍സില്‍ ഇത്തരത്തില്‍ വലിയ രീതിയിലുള്ള അവധികളൊന്നുമില്ലെന്ന് ചിലര്‍ അഭിപ്രായപ്പെട്ടു. എന്നാല്‍, ഇന്ത്യയിലാണ് കൂടുതല്‍ അവധികളും ശാന്തമായ ജീവിത സാഹചര്യമുള്ളതെന്നും തെറ്റായ വിവരങ്ങള്‍ നല്‍കരുതെന്നും വിയോജിച്ച് കൊണ്ട് ചിലര്‍ പ്രതികരിച്ചു. ഒരു വര്‍ഷത്തില്‍ ഓസ്ട്രേലിയയില്‍ ആകമാനം എത്ര പൊതു അവധികളുണ്ടെന്ന ഉപയോക്താവിന്റെ ചോദ്യത്തിന്, 'ഏകദേശം 13 എണ്ണം മാത്രം' എന്നാണ് ആദിത്യ മറുപടി നല്‍കിയത്.
