കുവൈത്ത് സിറ്റി: പ്രസംഗത്തിനിടെ അമീര്‍ ശൈഖ് സ്വബാഹ് അല്‍ അഹ്മദ് അസ്വബാഹിനെതിരെ പരാമര്‍ശം നടത്തി എന്ന കേസില്‍ മുന്‍ എം.പിമാരായ ഫലഹ് അല്‍ സവ്വാഹ്, ഖാലിദ് അല്‍ താഹൂസ്, ബദര്‍ അല്‍ ദാഹൂം എന്നിവര്‍ക്ക കോടതി മൂന്നു വര്‍ഷം തടവ് വിധിച്ചു. ഇതേ തുടര്‍ന്ന് ആഭ്യന്തര മന്ത്രാലയത്തിലെ ഉന്നത ഉദ്യോഗസ്ഥരുടെ നേതൃത്വത്തില്‍ മൂന്നു പേരെയും അറസ്റ്റ് ചെയ്തു.
പ്രതിപക്ഷ നേതാക്കളെല്ലാവരും ഫലഹ് അല്‍ സവ്വാഹിന്റെ ഫിന്‍താസിലെ ദീവാനിയയില്‍ ഒരുമിച്ച് കൂടിയ ശേഷമാണ് ഇവര്‍ അറസ്റ്റിന് വഴങ്ങിയത്. തെരഞ്ഞെടുപ്പ് നിയമം ഭേദഗതി ചെയ്യാനുള്ള സര്‍ക്കാര്‍ നീക്കത്തിനെതിരെ മാസങ്ങള്‍ക്ക് മുമ്പ് ജാബിര്‍ അലിയിലെ ദീവാനിയയില്‍ നടന്ന പ്രതിപക്ഷ കൂട്ടായ്മയില്‍വെച്ച് അമീറിനെതിരെ പ്രസംഗിച്ചു എന്നതാണ് ഇവരുടെ മേല്‍ ചുമത്തപ്പെട്ടിരുന്ന കുറ്റം. നേരത്തേ ഇതേ കേസില്‍ മൂന്നു പേര്‍ക്കും പത്ത് ദിവസത്തെ തടവ്് വിധിച്ചിരുന്നു. അതിനെതിരെ ഇവര്‍ നല്‍കിയ അപ്പീല്‍ തള്ളിക്കൊണ്ടാണ് ഇപ്പോള്‍ കോടതി അറസ്റ്റ് ചെയ്യാന്‍ ഉത്തരവിട്ടത്. രാജ്യത്തെ ഭരണഘടന അനുസരിച്ച് അമീറിനെ വിമര്‍ശിച്ച് സംസാരിക്കുന്നത് കുറ്റകരമാണ്. ഇതേ കുറ്റത്തിന് പ്രതിപക്ഷ നിരയിലെ മുസല്ലം അല്‍ ബര്‍റാക്, ഉസാമ അല്‍ മുനവ്വര്‍ എന്നിവരെയും മുമ്പ് അറസ്റ്റ് ചെയ്തിരുന്നു.
