ലണ്ടന്‍: പണം സമാഹരിക്കാനുള്ള പുതിയ മാര്‍ഗങ്ങള്‍ തേടുന്ന ലേബര്‍ സര്‍ക്കാര്‍, ഇംഗ്ലണ്ടില്‍ വിനോദസഞ്ചാരികള്‍ക്ക് ഹോളിഡേ ടാക്സ് ഏര്‍പ്പെടുത്താന്‍ നീക്കം തുടങ്ങി. എന്നാല്‍, ഈ പദ്ധതി ഉപേക്ഷിക്കണമെന്നാവശ്യപ്പെട്ട് 200-ലധികം ഹോസ്പിറ്റാലിറ്റി, ടൂറിസം മേഖലയില്‍ പ്രവര്‍ത്തിക്കുന്നവര്‍ രംഗത്തെത്തി. അവര്‍ ചാന്‍സലര്‍ റേച്ചല്‍ റീവ്‌സിന് കത്ത് നല്‍കി.

ഒരു രാത്രി ഒരാള്‍ക്ക് £2 എന്ന നിരക്കില്‍ നികുതി ഈടാക്കിയാല്‍, രണ്ടാഴ്ചത്തെ അവധിക്ക് £100 അധികമായി നല്‍കേണ്ടിവരുമെന്നതാണ് പ്രതിഷേധക്കാരുടെ വാദം. ''അവധി ആഘോഷിക്കാനാണ്, നികുതി അടയ്ക്കാനല്ല'' എന്നായിരുന്നു അവരുടെ നിലപാട്.

സര്‍ക്കാര്‍ ആദ്യം നിര്‍ദ്ദേശിച്ചത് താമസ ചെലവിന്റെ ഒരു ശതമാനമായി നികുതി ഈടാക്കുക എന്നതായിരുന്നു. പ്രാദേശിക മേയര്‍മാര്‍ക്കും നേതാക്കള്‍ക്കും തങ്ങളുടെ പ്രദേശത്ത് അനുയോജ്യമായ നിരക്ക് നിശ്ചയിക്കാമെന്ന നിലപാടും ഉണ്ടായിരുന്നു. വിഷയത്തെക്കുറിച്ചുള്ള പൊതു ചര്‍ച്ച ഫെബ്രുവരി 18ന് അവസാനിക്കും.

സ്‌കോട്ലന്‍ഡിലും വെയില്‍സിലും ഇതിനകം പ്രാദേശിക കൗണ്‍സിലുകള്‍ക്ക് Visitor Levy ഏര്‍പ്പെടുത്താനുള്ള അധികാരം ഉണ്ട്. മാഞ്ചസ്റ്ററില്‍ 2023 മുതല്‍ മുറിക്ക് £1 നികുതി ഈടാക്കുന്ന പദ്ധതി നടപ്പിലാക്കി, ആദ്യ വര്‍ഷം £2.8 മില്യണ്‍ സമാഹരിച്ചു.

യുകെയില്‍ ഇതിനകം നികുതി ഭാരം നിലനില്‍ക്കേ, ഹോളിഡേ ടാക്സ് ആഭ്യന്തര വിനോദസഞ്ചാരത്തെ ബാധിക്കുമെന്ന ആശങ്ക ഉയരുന്നു. എന്നാല്‍, പാരിസ്, റോം, ബ്രസ്സല്‍സ് പോലുള്ള നഗരങ്ങളില്‍ ടൂറിസ്റ്റ് നികുതി നിലവിലുണ്ടെന്നതാണ് സര്‍ക്കാരിന്റെ വാദം