ലണ്ടന്‍: ബ്രിട്ടനിലെ നാഷനല്‍ ഹെല്‍ത്ത് സര്‍വീസിന്റെ (NHS) ശമ്പളവിതരണ സംവിധാനത്തിലെ ഗുരുതരമായ പിഴവുകള്‍ മൂലം ആയിരക്കണക്കിന് ജീവനക്കാര്‍ കടുത്ത മാനസികസമ്മര്‍ദ്ദത്തിലും സാമ്പത്തിക പ്രതിസന്ധിയിലുമാണെന്ന് റിപ്പോര്‍ട്ട്. പേറോള്‍ പിഴവുകള്‍ കാരണം ജീവനക്കാരുടെ അക്കൗണ്ടുകളിലേക്ക് അധികമായി എത്തിയ ശമ്പളം തിരിച്ചുപിടിക്കാന്‍ ഏജന്റുമാരെയും കോടതി നടപടികളെയും (Bailiffs) നിയോഗിച്ചതാണ് വിവാദമായിരിക്കുന്നത്.

വിവരവകാശ നിയമപ്രകാരം ശേഖരിച്ച വിവരങ്ങള്‍ പ്രകാരം, എന്‍എച്ച്എസ് ജീവനക്കാരെ കടം തിരിച്ചുപിടിക്കുന്ന ഏജന്റുമാര്‍ക്ക് കൈമാറുന്ന കേസുകളുടെ എണ്ണത്തില്‍ വലിയ വര്‍ധനവാണ് രേഖപ്പെടുത്തിയിരിക്കുന്നത്. 2020-21 കാലയളവില്‍ 1,807 കേസുകളും, 2024-25 കാലയളവില്‍ 2,683 കേസുകളും റിപ്പോര്‍ട്ട് ചെയ്തു.

ബ്രിട്ടനിലെ 232 ട്രസ്റ്റുകളില്‍ നിന്ന് ലഭിച്ച വിവരങ്ങള്‍ പ്രകാരം, ഓരോ വര്‍ഷവും പതിനായിരക്കണക്കിന് ജീവനക്കാര്‍ക്കാണ് അധിക ശമ്പളം ലഭിക്കുന്നത്. ലെസ്റ്റര്‍ യൂണിവേഴ്‌സിറ്റി ഹോസ്പിറ്റല്‍ എന്‍എച്ച്എസ് ട്രസ്റ്റാണ് ഏറ്റവും കൂടുതല്‍ ജീവനക്കാരെ (226 പേര്‍) കടം തിരിച്ചുപിടിക്കുന്ന ഏജന്‍സികള്‍ക്ക് കൈമാറിയത്. കോടതി സമന്‍സുകള്‍ മൂലം ജീവനക്കാരെ 'കൗണ്ടി കോര്‍ട്ട് ജഡ്ജ്‌മെന്റ്' കരിമ്പട്ടികയില്‍ ഉള്‍പ്പെടുത്തുന്നത് അവരുടെ ക്രെഡിറ്റ് സ്‌കോറിനെ ബാധിക്കുകയും ഭാവിയില്‍ വായ്പ, വീട് വാങ്ങല്‍, ക്രെഡിറ്റ് കാര്‍ഡ് അപേക്ഷകള്‍ എന്നിവ തടസ്സപ്പെടുകയും ചെയ്യും.

പിഴവിന്റെ കാരണം

- കാലഹരണപ്പെട്ട സോഫ്റ്റ്വെയറുകള്‍

- സങ്കീര്‍ണ്ണമായ ഷിഫ്റ്റ് സംവിധാനങ്ങള്‍

- അധിക സമയം ജോലി ചെയ്തതും അവധി മാറ്റങ്ങളും സമയത്ത് അപ്‌ഡേറ്റ് ചെയ്യാത്തത്

- ശമ്പള വിഭാഗത്തില്‍ ജീവനക്കാരുടെ കുറവ്

- പുറംകരാര്‍ ഏജന്‍സികള്‍ വഴി ശമ്പള വിതരണം, ആശയവിനിമയ തടസ്സം

പ്രതികരണം

ബ്രിട്ടിഷ് മെഡിക്കല്‍ അസോസിയേഷന്‍ (BMA), ജിഎംബി (GMB) യൂണിയന്‍ എന്നിവര്‍ ഈ നടപടിയെ ശക്തമായി അപലപിച്ചു. ''സ്വന്തം ഉടമസ്ഥര്‍ വരുത്തിയ പിഴവിന് ജീവനക്കാരെ വേട്ടയാടുന്നത് അംഗീകരിക്കാനാവില്ല'' എന്ന നിലപാടാണ് യൂണിയനുകള്‍ എടുത്തത്. ഹെല്‍ത്ത് മിനിസ്റ്റര്‍ ട്രസ്റ്റുകള്‍ക്ക് മാനുഷികമായ പരിഗണന നല്‍കണമെന്ന് നിര്‍ദേശം നല്‍കിയിട്ടുണ്ട്.

യുകെയിലെ എന്‍എച്ച്എസ് ലോകത്തിലെ തന്നെ ഏറ്റവും വലിയ തൊഴില്‍ദാതാക്കളില്‍ ഒന്നായിട്ടും, ശമ്പളവിതരണത്തിലെ ഇത്തരം ഭരണപരമായ പരാജയം ആരോഗ്യപ്രവര്‍ത്തകരുടെ വിശ്വാസത്തെയും ജീവിതത്തെയും ബാധിക്കുന്നുവെന്നതാണ് പ്രധാന ആശങ്ക