ലണ്ടന്‍: ബ്രിട്ടനില്‍ ലേബര്‍ സര്‍ക്കാര്‍ പ്രഖ്യാപിച്ച 'ഏകീകൃത മിനിമം വേജ്' പദ്ധതി നടപ്പിലാക്കുന്നത് വൈകുമെന്ന് റിപ്പോര്‍ട്ടുകള്‍ സൂചിപ്പിക്കുന്നു. പ്രായഭേദമന്യേ എല്ലാ മുതിര്‍ന്നവര്‍ക്കും തുല്യവേതനം ഉറപ്പാക്കുമെന്ന തിരഞ്ഞെടുപ്പ് വാഗ്ദാനത്തില്‍ നിന്ന് സര്‍ക്കാര്‍ ഭാഗികമായി പിന്നോട്ടുപോകുന്നുവെന്നതാണ് സൂചന.

രാജ്യത്തെ തൊഴിലില്ലായ്മ നിരക്ക് അഞ്ച് വര്‍ഷത്തിനിടയിലെ ഏറ്റവും ഉയര്‍ന്ന നിലയില്‍ എത്തിയതും, യുവാക്കള്‍ക്കിടയിലെ തൊഴില്‍ പ്രതിസന്ധി രൂക്ഷമായതുമാണ് സര്‍ക്കാരിനെ പുനര്‍ചിന്തനത്തിന് പ്രേരിപ്പിച്ചത്.

തിരഞ്ഞെടുപ്പ് പത്രികയില്‍ 'ഡിസ്‌ക്രിഷണറി ഏജ് ബാന്‍ഡുകള്‍' (പ്രായത്തിനനുസരിച്ചുള്ള വേതന വ്യത്യാസം) ഇല്ലാതാക്കുമെന്ന് ലേബര്‍ പാര്‍ട്ടി ഉറപ്പുനല്‍കിയിരുന്നു. 18-20 വയസ്സുകാരും 21 വയസ്സിന് മുകളിലുള്ളവരും ഒരേ നിരക്കില്‍ ശമ്പളം ലഭിക്കുമെന്നതായിരുന്നു ലക്ഷ്യം. എന്നാല്‍ നിലവിലെ സാമ്പത്തിക സാഹചര്യം കണക്കിലെടുത്ത് ഈ വര്‍ധനവ് മന്ദഗതിയിലാക്കാന്‍ മന്ത്രിമാര്‍ ആലോചിക്കുന്നതായി സര്‍ക്കാര്‍ വൃത്തങ്ങള്‍ സ്ഥിരീകരിച്ചു.

പുതിയ നിരക്കുകള്‍ (ഏപ്രില്‍ മുതല്‍)

- 18-20 വയസ്സുകാര്‍: മണിക്കൂറിന് £10.85 (85 പെന്‍സ് വര്‍ധന)

- 21 വയസ്സിന് മുകളിലുള്ളവര്‍: മണിക്കൂറിന് £12.71 (50 പെന്‍സ് വര്‍ധന)

- 18 വയസ്സില്‍ താഴെയുള്ളവര്‍/അപ്രന്റീസുകള്‍: മണിക്കൂറിന് £8.00

രണ്ട് വിഭാഗങ്ങള്‍ തമ്മിലുള്ള £1.86 വേതന വിടവ് 2029-ലെ തിരഞ്ഞെടുപ്പിന് മുന്‍പ് ഘട്ടംഘട്ടമായി ഇല്ലാതാക്കാനാണ് സര്‍ക്കാര്‍ ശ്രമിക്കുന്നത്.

ട്രേഡ് യൂണിയനുകള്‍ ഒരേ ജോലി ചെയ്യുന്നവര്‍ക്ക് പ്രായം കുറവായതിനാല്‍ കുറഞ്ഞ ശമ്പളം നല്‍കുന്നത് അനീതിയാണെന്ന് വാദിക്കുന്നപ്പോള്‍, ഉയര്‍ന്ന ശമ്പളം നല്‍കേണ്ടി വരുന്നത് യുവാക്കളെ ജോലിക്ക് എടുക്കുന്നതില്‍ നിന്ന് തൊഴിലുടമകളെ പിന്തിരിപ്പിക്കുമെന്ന് ബിസിനസ് ഗ്രൂപ്പുകള്‍ മുന്നറിയിപ്പ് നല്‍കി.

തൊഴില്‍ കണക്കുകള്‍

യുകെയിലെ ശരാശരി തൊഴിലില്ലായ്മ നിരക്ക് 5.2 ശതമാനമായി ഉയര്‍ന്നപ്പോള്‍, 16-24 വയസ്സുകാരില്‍ ഇത് 16.1 ശതമാനമായി. കഴിഞ്ഞ പത്ത് വര്‍ഷത്തിനിടയിലെ ഏറ്റവും മോശം സാഹചര്യമാണിതെന്ന് ഓഫിസ് ഫോര്‍ നാഷനല്‍ സ്റ്റാറ്റിസ്റ്റിക്‌സ് ചൂണ്ടിക്കാട്ടുന്നു.

വേതന വര്‍ധനവ് തൊഴില്‍ അവസരങ്ങള്‍ ഇല്ലാതാക്കുമെന്ന വാദം 'അസംബന്ധം' ആണെന്ന് ജി.എം.ബി യൂണിയന്‍ നാഷനല്‍ സെക്രട്ടറി ആന്‍ഡി പ്രെന്‍ഡര്‍ഗാസ്റ്റ് പ്രതികരിച്ചു.

മലയാളി വിദ്യാര്‍ത്ഥികള്‍ക്കും പ്രവാസികള്‍ക്കും ബാധകം

ബ്രിട്ടനിലെ കെയര്‍ ഹോമുകളിലും ഹോസ്പിറ്റാലിറ്റി മേഖലയിലും പാര്‍ട്ട് ടൈം ജോലി ചെയ്യുന്ന ആയിരക്കണക്കിന് മലയാളി വിദ്യാര്‍ത്ഥികളെയും യുവ പ്രവാസികളെയും ഈ തീരുമാനം ബാധിക്കും. ഏകീകൃത വേതനം ഉടന്‍ നടപ്പിലാക്കാത്തതോടെ 20 വയസ്സില്‍ താഴെയുള്ളവര്‍ക്ക് പ്രതീക്ഷിച്ച വരുമാന വര്‍ധനവ് ലഭിക്കില്ല.

എന്നാല്‍, വേതന വര്‍ധനവ് മന്ദഗതിയിലാക്കുന്നത് യുവാക്കള്‍ക്ക് കൂടുതല്‍ തൊഴിലവസരങ്ങള്‍ ലഭിക്കാന്‍ സഹായിക്കുമെന്ന ബിസിനസ് വാദം ശരിയാണെങ്കില്‍, പുതുതായി യുകെയില്‍ എത്തുന്നവര്‍ക്ക് ജോലി ലഭിക്കുന്നത് എളുപ്പമായേക്കാം. ഏറ്റവും പ്രായം കുറഞ്ഞ തൊഴിലാളികള്‍ക്ക് നാഷനല്‍ ഇന്‍ഷുറന്‍സ് വിഹിതം നല്‍കേണ്ടതില്ലെന്ന ആനുകൂല്യം ഇവര്‍ക്ക് ഗുണകരമാകും