ലണ്ടന്: മെയ് 7-ന് നടക്കുന്ന കൗണ്ടി കൗണ്സില് തിരഞ്ഞെടുപ്പില് മലയാളി സമൂഹത്തിന് അഭിമാനകരമായ നേട്ടം ലക്ഷ്യമിട്ട് ബിബിന് ബേബി മത്സരിക്കുന്നു. നിലവില് സ്പ്രൗസ്റ്റണിലെ ടൗണ് കൗണ്സിലറും ജില്ലാ കൗണ്സിലറുമായ അദ്ദേഹം, ലേബര് പാര്ട്ടിയുടെ സ്ഥാനാര്ഥിയായി കൗണ്ടി കൗണ്സിലിലേക്ക് മത്സരിക്കുകയാണ്. സ്പ്രൗസ്റ്റണിലെ ഇരുവാര്ഡുകളും നിലവില് ലേബറിന്റെ കൈവശമാണെന്നും ടൗണ് കൗണ്സിലില് വ്യക്തമായ ഭൂരിപക്ഷം നിലനില്ക്കുന്ന സാഹചര്യത്തില് ബിബിന് ബേബിക്ക് ശക്തമായ നിലപാട് ഉറപ്പിക്കാനായെന്നും രാഷ്ട്രീയ നിരീക്ഷകര് വിലയിരുത്തുന്നു. ജനങ്ങളുമായി നേരിട്ടുള്ള ബന്ധം പുലര്ത്തി പ്രവര്ത്തിക്കുന്ന നേതാവെന്ന ഇമേജാണ് അദ്ദേഹത്തിന്റെ പ്രധാന ശക്തി. വിജയിച്ചാല് ടൗണ്, ജില്ലാ, കൗണ്ടി എന്നീ മൂന്ന് തലങ്ങളിലുമുള്ള ജനപ്രതിനിധിയായി ഒരേസമയം സേവനം അനുഷ്ഠിക്കുന്ന സ്പ്രൗസ്റ്റണിലെ ആദ്യ ഇന്ത്യന് വംശജനായ നേതാവായി ബിബിന് ബേബി മാറും. ബ്രിട്ടിഷ് പ്രാദേശിക രാഷ്ട്രീയത്തില് ഇത് ശ്രദ്ധേയമായ ചരിത്ര നേട്ടമായി രേഖപ്പെടുത്തപ്പെടും.
കോട്ടയം കടുത്തുരുത്തിയില് ജനിച്ചും പൂഴിക്കോലില് വളര്ന്നും ഇന്ത്യയില് നിന്ന് യുകെയിലേക്ക് കുടിയേറി പൊതുസേവന രംഗത്ത് ഉയര്ന്ന ബിബിന്, രണ്ട് ക്വാസി-ജുഡീഷ്യല് കമ്മിറ്റികളിലെ അംഗമായും ഒന്നിന്റെ വൈസ് ചെയര്മാനായും പ്രവര്ത്തിക്കുന്നു. കൂടാതെ പ്രാദേശിക ജില്ലാ ആശുപത്രിയിലെ സ്റ്റാഫ് ഗവര്ണറായി സേവനം അനുഷ്ഠിച്ച അനുഭവവും അദ്ദേഹത്തിനുണ്ട്. ഭാര്യ ടിന്സി ബിബിന്, മക്കള് ബെല്വിന് ബിബിന്, ബെല്മിയ ബിബിന് എന്നിവരോടൊപ്പം കുടുംബജീവിതം നയിക്കുന്ന ബിബിന് ബേബി, കൗണ്ടി കൗണ്സിലില് ലേബര് പാര്ട്ടി ഭൂരിപക്ഷം നേടിയാല് കാബിനറ്റ് തലത്തിലുള്ള ചുമതലകള് ഏറ്റെടുക്കാനുള്ള സാധ്യതയും ഉയര്ന്നിട്ടുണ്ട്. മെയ് 7-ലെ തിരഞ്ഞെടുപ്പ് അടുത്തുവരുമ്പോള്, സ്പ്രൗസ്റ്റണില് ബിബിന് ബേബിയുടെ സ്ഥാനാര്ഥിത്വം രാഷ്ട്രീയ ചര്ച്ചകളില് മുന്നിരയില് തുടരുകയാണ്. വിജയിച്ചാല് അത് ഒരു സാധാരണ വിജയം മാത്രമല്ല, ബ്രിട്ടിഷ് പ്രാദേശിക രാഷ്ട്രീയത്തില് മലയാളിയുടെ ചരിത്ര നേട്ടമായി മാറും.
