|
വിഷ്ണു ഉണ്ണികൃഷ്ണനെ നായകനാക്കി നാദിര്ഷ സംവിധാനം ചെയ്യുന്ന 'മാജിക് മഷ്റൂംസ്' ജനുവരി 16ന് തിയേറ്ററുകളില്. രസകരമായൊരു ഫണ് ഫാമിലി ഫീല് ഗുഡ് എന്റര്ടെയ്നറായാണ് ചിത്രം പ്രേക്ഷകരിലേക്കെത്തുന്നത്. 'കട്ടപ്പനയിലെ ഋത്വിക് റോഷന്' ശേഷം വിഷ്ണു ഉണ്ണികൃഷ്ണനെ നായകനാക്കി നാദിര്ഷ സംവിധാനം ചെയ്യുന്ന സിനിമയാണ് മാജിക് മഷ്റൂംസ്'.
അക്ഷയ ഉദയകുമാറാണ് ചിത്രത്തില് നായികയായെത്തുന്നത്. മഞ്ചാടി ക്രിയേഷന്സ് എന്ന പ്രൊഡക്ഷന് കമ്പനിയുടെ ബാനറില് അഷ്റഫ് പിലാക്കല് നിര്മ്മിക്കുന്ന സിനിമയുടെ കഥയും തിരക്കഥയും സംഭാഷണവും ഒരുക്കിയിരിക്കുന്നത് ആകാശ് ദേവാണ്. ഭാവന റിലീസാണ് ഡിസ്ട്രിബ്യൂഷന്. സിനിമയുടെ 3D ക്യാരിക്കേച്ചര് മോഡലിലുള്ള ഫസ്റ്റ് ലുക്ക് പോസ്റ്റര് ഏറെ ശ്രദ്ധ നേടിയിരുന്നു.
ശങ്കര് മഹാദേവന്, കെ.എസ്. ചിത്ര, ശ്രേയാ ഘോഷാല്, വിനീത് ശ്രീനിവാസന്, ജാസി ഗിഫ്റ്റ്, രഞ്ജിനി ജോസ്, റിമി ടോമി, ഹനാന് ഷാ, ഖദീജ നാദിര്ഷ തുടങ്ങി നിരവധി ശ്രദ്ധേയരാണ് ചിത്രത്തില് ഗാനങ്ങള് ആലപിക്കുന്നത്. തൊടുപുഴ, ഈരാറ്റുപേട്ട, ഒറ്റപ്പാലം എന്നിവിടങ്ങളിലായാണ് സിനിമയുടെ ചിത്രീകരണം നടന്നത്. |
