തിരുവനന്തപുരത്തുനിന്ന് കാണാതായ അധ്യാപികയെയും കോട്ടയം സ്വദേശികളായ ദമ്പതിമാരെയും അരുണാചല് പ്രദേശില് മരിച്ചനിലയില് കണ്ടെത്തിയ സംഭവത്തില് ആത്മഹത്യാ കുറിപ്പ് കണ്ടെടുത്തു.
കോട്ടയം മീനടം സ്വദേശി നവീന് തോമസ്(35), ഭാര്യ ദേവി(35), ഇവരുടെ സുഹൃത്തായ തിരുവനന്തപുരം വട്ടിയൂര്ക്കാവ് മണികണ്ഠേശ്വരം സ്വദേശി ആര്യ ബി.നായര്(20) എന്നിവരെയാണ് അരുണാചലിലെ ജിറോയിലെ ഹോട്ടല് മുറിയില് മരിച്ചനിലയില് കണ്ടത്. ബ്ലൂപൈന് ഹോട്ടലിലെ 305ാം നമ്പര് മുറിയിലായിരുന്നു നവീനും ദേവിയും സുഹൃത്തായ അധ്യാപിക ആര്യയും താമസിച്ചിരുന്നത്. മൂന്നു പേരുടെയും കൈഞരമ്പുകള് മുറിച്ചനിലയിലായിരുന്നു. ആര്യയുടെ മൃതദേഹം മുറിയിലെ കട്ടിലില് കിടക്കുന്ന നിലയിലാണ് കണ്ടെത്തിയത്. ദേവിയുടെ മൃതദേഹം തറയില് കിടക്കുന്ന നിലയിലായിരുന്നു. നവീന് തോമസിനെ കുളിമുറിയിലാണ് മരിച്ചനിലയില് കണ്ടെത്തിയത്. മൂന്നുപേരുടെയും ശരീരം വരഞ്ഞ് രക്തംവാര്ന്ന നിലയിലാണ്.
ദമ്പതിമാരെ മരിച്ചനിലയില് കണ്ടെത്തിയ മുറിയില്നിന്ന് ആത്മഹത്യാക്കുറിപ്പ് കണ്ടെടുത്തതായാണ് വിവരം. ഒരു കടവുമില്ല, ഞങ്ങള്ക്ക് ഒരു പ്രശ്നവുമില്ല എന്നാണ് കുറിപ്പിലുണ്ടായിരുന്നത്. ഞങ്ങള് എവിടെയാണോ അങ്ങോട്ട് പോകുന്നു എന്നെഴുതി മൂന്നുപേരും കുറിപ്പില് ഒപ്പിട്ടിരുന്നതായാണ് പൊലീസ് നല്കുന്ന വിവരം. കൈഞരമ്പ് മുറിച്ചനിലയിലാണ് ഹോട്ടല് മുറിയില് മരിച്ചനിലയില് കണ്ടെത്തിയതെന്നും അരുണാചല് പോലീസ് പറഞ്ഞു.
കോട്ടയം മീനടം സ്വദേശിയായ നവീന് തോമസും ഭാര്യ ദേവിയും ദുര്മന്ത്രവാദവുമായി ബന്ധപ്പെട്ട സംഘടനയിലെ അംഗങ്ങളെന്നാണു സംശയം. 13 വര്ഷം മുന്പായിരുന്നു ഇവരുടെ വിവാഹം. രണ്ടുപേരും ആയുര്വേദ ഡോക്ടര്മാരായിരുന്നു. തിരുവനന്തപുരത്തായിരുന്നു താമസിച്ചിരുന്നത്.
തിരുവനന്തപുരം ആയുര്വേദ കോളജിലാണു നവീന് പഠിച്ചത്. അവിടെവച്ചാണ് ദേവിയുമായി പ്രണയത്തിലാകുകയും വിവാഹം കഴിക്കുകയും ചെയ്തത്. മിശ്രവിവാഹമായിരുന്നു ഇരുവരുടേതും. എങ്കിലും ഇരുവരും നല്ല സ്നേഹത്തിലാണ് കഴിഞ്ഞുവന്നതെന്നും കോട്ടയം മീനടത്തെ നാട്ടുകാര് പറയുന്നു.
കുട്ടികള് വേണ്ടെന്ന തീരുമാനത്തിലായിരുന്നത്രെ ദമ്പതികള്. സാത്താന് സേവയും ദുര്മന്ത്രവാദവുമായി ബന്ധമുള്ള സംഘടനയുമായി ബന്ധപ്പെട്ടാണ് ഇരുവരും സ്വാധീനിക്കപ്പെട്ടതെന്ന സംശയമാണ് അടുപ്പമുള്ളവര് പ്രകടിപ്പിക്കുന്നത്. നവീന്റെ പിതാവ് എന് എ തോമസ് ആദായനികുതി വകുപ്പ് ഉദ്യോഗസ്ഥനാണ്. മാതാവ് കേരള ഫിനാന്ഷ്യല് കോര്പറേഷന് മാനേജരായിരുന്നു. ഒരു സഹോദരിയും നവീനുണ്ട്. |