ഐസിയു പീഡനക്കേസില് അതിജീവിതയെ പിന്തുണച്ച നഴ്സ് പി ബി അനിതയെ കോഴിക്കോട് മെഡിക്കല് കോളജില് തന്നെ നിയമിച്ച് ഉത്തരവിറക്കി. മെഡിക്കല് വിദ്യാഭ്യാസ ഡയറക്ടറാണ് ഉത്തരവിറക്കിയത്. ഉത്തരവിന്റെ പകര്പ്പ് ട്വന്റിഫോറിന് ലഭിച്ചു. ഹൈക്കോടതിയുടെ അന്തിമവിധിയ്ക്ക് വിധേയമായാണ് നിയമനം.
ഹൈക്കോടതി ഉത്തരവുണ്ടായിട്ടും അനിതയെ കോഴിക്കോട് മെഡിക്കല് കോളേജില് ജോലിയില് പ്രവേശിപ്പിക്കാത്തത് വിവാദമായിരുന്നു. ഇതിനെതിരേ അനിത മെഡിക്കല് കോളേജില് നടത്തിവരുന്ന സമരം ആറാംദിവസത്തേക്ക് കടന്ന സാഹചര്യത്തിലാണ് സര്ക്കാരില്നിന്ന് അനുകൂല തീരുമാനമുണ്ടാകുന്നത്. സര്ക്കാര് തീരുമാനത്തെ സ്വാഗതം ചെയ്യുന്നതായി അനിത പ്രതികരിച്ചു.
ഐസിയു പീഡനക്കേസില് അതിജീവിതയ്ക്ക് അനുകൂലമായി മൊഴിനല്കിയ അനിതയെ ഇടുക്കി മെഡിക്കല് കോളേജിലേക്കാണ് സ്ഥലംമാറ്റിയിരുന്നത്. ഇതിനെതിരേ അനിത ഹൈക്കോടതിയെ സമീപിച്ചു. ഏപ്രില് ഒന്നിന് കോഴിക്കോട് മെഡിക്കല് കോളേജില് തന്നെ ജോലിയില് പ്രവേശിക്കാനുള്ള ഉത്തരവുകിട്ടി.
എന്നാല്, കോടതി ഉത്തരവുമായി എത്തിയിട്ടും അനിതയെ ജോലിയില് പ്രവേശിപ്പിച്ചില്ല. സെക്രട്ടേറിയറ്റില്നിന്നുള്ള ഉത്തരവില്ലാതെ ജോലിയില് പ്രവേശിപ്പിക്കാനാകില്ലെന്നായിരുന്നു അധികൃതരുടെ നിലപാട്. ജോലിയില് പ്രവേശിക്കാന് അനുവദിക്കണമെന്ന് അനിത കരഞ്ഞുപറഞ്ഞിട്ടും അധികൃതര് അതിന് തയാറായില്ല.
ഇതോടെ അനിത മെഡിക്കല് കോളേജ് പ്രിന്സിപ്പിലിന്റെ ഓഫീസിന് മുന്നില് സമരം ആരംഭിച്ചു. അനിതയ്ക്ക് പിന്തുണയുമായി ഐസിയു പീഡനക്കേസിലെ അതിജീവിതയും വിവിധ രാഷ്ട്രീയകക്ഷി നേതാക്കളും സമരപന്തലില് എത്തിയിരുന്നു. |