ഓണ്‍ലൈന്‍ വിദ്യാഭ്യാസ രംഗത്തെ പ്രമുഖ സ്റ്റാര്‍ട്ട് അപ്പ് സംരംഭമായ ബൈജൂസില്‍ രണ്ടു വിദേശ കമ്പനികള്‍ 30 കോടി ഡോളര്‍ [2100 കോടി രൂപ] മുതല്‍ മുടക്കും. ജനറല്‍ അറ്റ്‌ലാന്റിക് എന്ന സ്വകാര്യ നിക്ഷേപ സ്ഥാപനവും, സിംഗപ്പൂര്‍ സര്‍ക്കാരിന്റെ ഉടമസ്ഥതയിലുള്ള റ്റീംസെക് ഹോള്‍ഡിങ്‌സ് എന്നീ സ്ഥാപനവുമാണ് നിക്ഷേപത്തിന് ഒരുങ്ങുന്നത്. ഇത് സംബന്ധിച്ച ചര്‍ച്ചകള്‍ ഏതാളനും ആഴ്ചകള്‍ക്കകം പൂര്‍ത്തിയാകുമെന്ന് 'ലൈവ് മിന്റ്' റിപ്പോര്‍ട്ട് ചെയ്തു. ഈ ഡീല്‍ പൂര്‍ത്തിയായാല്‍ ബൈജൂസിന്റെ ഉടമകളായ തിങ്ക് ആന്‍ഡ് ലേണ്‍ പ്രൈവറ്റ് ലിമിറ്റഡ് എന്ന സ്ഥാപനത്തിന്റെ മൂല്യം 240 കോടി ഡോളര്‍ ആയി ഉയരുമെന്ന് വിദഗ്ദ്ധര്‍ പറഞ്ഞു.

പുതിയ ഫണ്ടിങ്ങില്‍ ഈ രണ്ടു സ്ഥാപനങ്ങളും പങ്കെടുക്കുമെന്ന് കമ്പനി വൃത്തങ്ങള്‍ പറഞ്ഞു. എന്നാല്‍ ഇരു കമ്പനികളും ഒരേ സമയം നിക്ഷേപം നടത്തില്ല. ബൈജൂസിന്റെ നിലവിലെ പ്രമുഖ നിക്ഷേപകരായ ചൈനയിലെ റ്റെന്‍സെന്റ് ഹോള്‍ഡിങ്‌സും കൂടുതല്‍ നിക്ഷേപം നടത്താന്‍ താല്പര്യം പ്രകടമാക്കിയിട്ടുണ്ട്.
2017 ജൂലൈയില്‍ റ്റെന്‍സെന്റ് ഹോള്‍ഡിങ്‌സ് ബൈജൂസില്‍ 4 കോടി ഡോളര്‍ നിക്ഷേപം നടത്തിയിരുന്നു. പിന്നീട് വേല്‍ ഇന്‍വെസ്റ്റ് എന്ന കമ്പനി 3 കോടി ഡോളറിന്റെ നിക്ഷേപം നടത്തിയിരുന്നു.

2008ല്‍ പ്രവര്‍ത്തനം തുടങ്ങിയ ശേഷം 24 കോടി ഡോളറിന്റെ നിക്ഷേപം ബൈജൂസ് നേടിയിട്ടുണ്ട്. ചാന്‍ സക്കര്‍ബര്‍ഗ് ഇനിഷ്യറ്റീവ്, സികയാ കാപിറ്റല്‍, ലൈറ്റ് സ്പീഡ് വെന്‍ച്വര്‍ പാര്‍ട്‌നര്‍സ്, ആറിന്‍ ക്യാപിറ്റല്‍ തുടങ്ങിയ സ്ഥാപനങ്ങളാണ് നിക്ഷേപം നടത്തിയത്.
ഈ വര്‍ഷം ജൂണില്‍ കമ്പനിയുടെ മാസവരുമാനം 100 കോടി രൂപ ആയതായി കമ്പനി അറിയിച്ചു. ഈ വര്‍ഷം മൊത്തം 1400 കോടി രൂപയുടെ വരുമാനമാണ് ലക്ഷ്യമിട്ടിരിക്കുന്നത്.