ഇന്ത്യന്‍ ഓഹരി വിപണിയില്‍ ബുധനാഴ്ച വന്‍ കുതിപ്പ്. സെന്‍സെക്‌സും നിഫ്റ്റിയും 2.5 ശതമാനത്തിലധികം നേട്ടത്തോടെയാണ് വ്യാപാരം ആരംഭിച്ചത്. ഇറാന്‍-യുഎസ്-ഇസ്രായേല്‍ സംഘര്‍ഷം ഉടന്‍ അവസാനിച്ചേക്കുമെന്ന പ്രതീക്ഷകളെത്തുടര്‍ന്നാണ് ഈ മാറ്റം. യുഎസ് ഡോളര്‍ സൂചിക 100-ന് താഴേക്ക് പോയതും യുഎസ് 10 വര്‍ഷത്തെ ബോണ്ട് യീല്‍ഡ് 4.29 ശതമാനത്തിലേക്ക് താഴ്ന്നതും ഇന്ത്യന്‍ വിപണിക്ക് ഗുണകരമായി. ഇത് വിദേശ നിക്ഷേപം വര്‍ധിക്കാന്‍ സഹായിക്കും.
സെന്‍സെക്‌സ് 2000 പോയിന്റ് (2.7%) ഉയര്‍ന്ന് 73,918 എന്ന ഉയര്‍ന്ന നിലവാരത്തിലെത്തി. നിഫ്റ്റി 600 പോയിന്റിലധികം നേട്ടമുണ്ടാക്കി 22,938 തൊട്ടു. മിഡ്ക്യാപ്, സ്മോള്‍ക്യാപ് സൂചികകള്‍ 4 ശതമാനം വരെ ഉയര്‍ന്നു. ഈ കുതിപ്പിലൂടെ ബിഎസ്ഇയില്‍ ലിസ്റ്റ് ചെയ്ത കമ്പനികളുടെ ആകെ വിപണി മൂല്യം 412 ലക്ഷം കോടിയില്‍ നിന്ന് 425 ലക്ഷം കോടിയായി ഉയര്‍ന്നു. അതായത് ഒരൊറ്റ ദിവസം കൊണ്ട് നിക്ഷേപകര്‍ക്ക് 13 ലക്ഷം കോടി രൂപയുടെ നേട്ടമുണ്ടായി.