ലണ്ടന്‍: യുകെയില്‍ കാന്‍സര്‍ രോഗികളുടെ എണ്ണം ആശങ്കാജനകമായി ഉയരുകയാണ്. കാന്‍സര്‍ റിസര്‍ച്ച് യുകെയുടെ വിലയിരുത്തല്‍ പ്രകാരം, ഓരോ 80 സെക്കന്റിലും ഒരാള്‍ക്ക് കാന്‍സര്‍ സ്ഥിരീകരിക്കുന്നു. വര്‍ഷത്തില്‍ 4,03,000-ത്തിലധികം പേര്‍ക്ക് രോഗം കണ്ടെത്തപ്പെടുന്നു. കഴിഞ്ഞ 10 വര്‍ഷത്തിനിടെ രോഗനിരക്ക് 610ല്‍ നിന്ന് 620 (ഒരു ലക്ഷം ആളില്‍) ആയി ഉയര്‍ന്നതായി കണക്കുകള്‍ സൂചിപ്പിക്കുന്നു. അമിതവണ്ണം കൂടുന്നത് പ്രധാന കാരണങ്ങളിലൊന്നാണ്. നേരത്തെ കണ്ടെത്തുന്ന കേസുകളുടെ ശതമാനം 54%ല്‍ നിന്ന് 55% ആയി ഉയര്‍ന്നിട്ടുണ്ട്.

എന്‍എച്ച്എസിന് (NHS) രോഗികളുടെ സമ്മര്‍ദ്ദം കൈകാര്യം ചെയ്യാന്‍ ബുദ്ധിമുട്ടാണ്. കാന്‍സര്‍ ചികിത്സയ്ക്കുള്ള കാത്തിരിപ്പ് സമയം ചരിത്രത്തിലെ ഏറ്റവും മോശം നിലയിലാണ്. 2025-ല്‍ മാത്രം 1,07,000 രോഗികള്‍ക്ക് 62 ദിവസത്തിലധികം ചികിത്സ തുടങ്ങാന്‍ കാത്തിരിക്കേണ്ടി വന്നു. കഴിഞ്ഞ വര്‍ഷം റെക്കോര്‍ഡ് പരിശോധനകള്‍ നടത്തിയെങ്കിലും, ആരോഗ്യ മേഖലയിലെ സമ്മര്‍ദ്ദം മൂലം വേണ്ടത്ര രോഗികള്‍ക്ക് ചികിത്സ നല്‍കാനാകുന്നില്ല. എന്‍എച്ച്എസിന് 26 ബില്യണ്‍ പൗണ്ട് അധിക ഫണ്ടിംഗ് ലഭിച്ചിട്ടുണ്ട്. 2035 ഓടെ 75 ശതമാനം രോഗികളും രോഗമുക്തരായി അഞ്ചു വര്‍ഷത്തിന് ശേഷവും ജീവിക്കുമെന്നതാണ് ലക്ഷ്യം.